Omafimbo omativali
18 Josafat okwa li e na oupuna muhapu nokwa li a fimanekwa neenghono, ashike okwa li oshitenya shaAhab. 2 Onghee konima yeedula donhumba, okwa ya kuAhab, kuSamaria, na Ahab okwa li a yamba eedi neengobe dihapu omolwaye nomolwovanhu, ovo va li pamwe naye. Ahab okwa li a ladipika* Josafat va ye pamwe naye va ka lwife Ramot-gilead. 3 Opo nee Ahab, ohamba yaIsrael, okwa pula Josafat, ohamba yaJuda, a ti: “Oto i ngoo pamwe naame kuRamot-gilead?” Josafat okwe mu nyamukula, a ti: “Fye naave vamwe aveke. Ovanhu vange novanhu voye vamwe aveke, nohatu ke ku yambidida moita.”
4 Ashike Josafat okwa tya kohamba yaIsrael: “Alikana, tete pula ewiliko kuJehova.” 5 Onghee ohamba yaIsrael oya ongela pamwe ovaprofeti, ovalumenhu 400, ndele tai ti kuvo: “Natu ye ngoo tu ka lwife Ramot-gilead, ile nandi shi efe?” Ove mu nyamukula, va ti: “Inda, na Kalunga kashili ote ke shi yandja momake ohamba.”
6 Opo nee Josafat okwa ti: “Apa kape na hano omuprofeti waJehova? Natu puleni yo ewiliko okupitila muye.” 7 Onghee ohamba yaIsrael oya tya kuJosafat: “Ope na natango omulumenhu umwe, oo hatu dulu okupula ewiliko kuJehova okupitila muye, ashike kandi mu hole, molwaashi iha xunganeke oinima iwa kombinga yange, ndele alushe oyoyo ashike ii. Edina laye oMikaia, omonamati waImla.” Ashike Josafat okwa ti: “Ohamba, ino popya vali oshinima sha tya ngaho.”
8 Onghee ohamba yaIsrael oya ifana elenga, ndele tai ti kulo: “Ifana diva Mikaia, omonamati waImla.” 9 Ohamba yaIsrael nosho yo Josafat, ohamba yaJuda, ova li omutumba, keshe umwe kolukalwapangelo laye, va djala oikutu youhamba; ova li ve li omutumba poshipale shoposhivelo shaSamaria, novaprofeti aveshe ova li tava xunganeke moipafi yavo. 10 Opo nee Sedekia, omonamati waKenaana, okwe liningila eembinga doivela, ndele ta ti: “Jehova okwa ti, ‘Eembinga edi odo to twifa* Ovasiria, fiyo osheshi we va xulifa po.’” 11 Ovaprofeti aveshe vakwao ova li tava xunganeke oshinima sha faafana, tava ti: “Inda u ka lwife Ramot-gilead noto ka findana; Jehova ote ke shi yandja meke lohamba.”
12 Onghee omutumwa, oo a tumwa a ka ifane Mikaia, okwa tya kuye: “Tala, ovaprofeti aveshe ova xunganeka oinima iwa i na sha nohamba. Alikana, naave eendjovo doye nadi kale diwa ngaashi davo, ndele to xunganeke oinima iwa i na sha nohamba.” 13 Ashike Mikaia okwa ti: “Ohandi ane kuJehova, Kalunga omunamwenyo, kutya keshe osho Kalunga kange ta lombwele nge, osho handi popi.” 14 Opo nee Mikaia okwe uya kohamba, noye mu pula, ya ti: “Mikaia, natu ye ngoo tu ka lwife Ramot-gilead, ile nandi shi efe?” Okwe i nyamukula, a ti: “Inda noto ka findana; otava ka yandjwa momake oye.” 15 Onghee ohamba oya tya kuye: “Olungapi ndi na oku ku anifa uha lombwele nge vali oipupulu, ndele ou lombwele nge ashike oshili medina laJehova?” 16 Okwa ti: “Ondi wete Ovaisrael aveshe ve lihanena keemhunda, ngaashi eedi dihe na omufita. Jehova okwa ti: ‘Kave na omupashukili. Keshe umwe na ye keumbo laye nombili.’”
17 Opo nee ohamba yaIsrael oya tya kuJosafat: “Inandi ku lombwela kutya, ‘Ita ka xunganeka oinima iwa i na sha naame, ndele oyoyo ashike ii’?”
18 Mikaia okwa ti: “Pwilikina kondjovo yaJehova: Onda mona Jehova e li omutumba kolukalwapangelo laye nosho yo etangakwaita alishe lomeulu la fikama kolulyo nokolumosho laye. 19 Opo nee Jehova okwa ti, ‘Olyelye ta ka kengelela Ahab, ohamba yaIsrael, opo a ye a ka lwife Ramot-gilead, ndele ta file oko?’ Ashike omweengeli umwe okwa li ta popi oshinima shimwe, ofimbo omweengeli mukwao a li ta popi oshinima shi lili. 20 Opo nee omweengeli* umwe okwe uya nokwa fikama moipafi yaJehova, ndele ta ti, ‘Ohandi ke mu kengelela.’ Jehova okwe mu pula, a ti, ‘Oto ke shi enda ngahelipi?’ 21 Omweengeli okwa nyamukula, a ti: ‘Ohandi ka ningifa ovaprofeti vaye aveshe va popye oipupulu.’ Onghee Kalunga okwa ti, ‘Oto ke mu kengelela noto ka pondola. Inda, ndele to ka ninga ngaho.’ 22 Paife Jehova okwa ningifa ovaprofeti voye ava va popye oipupulu, ashike Jehova okwa tokola oku ku etela oudjuu.”
23 Sedekia, omonamati waKenaana, okwa ya nokwa denga Mikaia kolupanda, ndele ta ti: “Omhepo yaJehova oya enda nge peni, opo i ka popye naave?” 24 Mikaia okwe mu nyamukula, a ti: “Tala, oto ke shi mona mefiku olo to ka hondama medimo lomeni elela.” 25 Opo nee ohamba yaIsrael oya ti: “Kufa Mikaia, ndele to ke mu yandja kuAmon, elenga loshilando, nosho yo kuJoas, omonamati wohamba. 26 Va lombwela to ti, ‘Ohamba oya ti: “Tuleni omulumenhu ou modolongo noku mu pa omungome nosho yo omeva manini, fiyo osheshi nda aluka nombili.”’” 27 Ashike Mikaia okwa ti: “Ngeenge owa aluka nombili, osha yela kutya Jehova ina popya naame.” Okwa weda ko a ti: “Amushe shi didilikeni.”
28 Onghee ohamba yaIsrael nosho yo Josafat, ohamba yaJuda, ova ya va ka lwife Ramot-gilead. 29 Ohamba yaIsrael oya tya kuJosafat: “Ohandi ka djala oikutu imwe, opo ndiha dimbulukiwe, ndele handi i molwoodi, ashike ove djala oikutu yoye youhamba.” Onghee ohamba yaIsrael oya djala oikutu imwe, ndele tava i molwoodi. 30 Ohamba yaSiria oya yandja elombwelo kovawiliki vayo vomatemba, ya ti: “Inamu lwa nomunhu umwe e lili, kutya nee omunini, ile omukulunhu, kakele ashike kohamba yaIsrael.” 31 Diva eshi ovawiliki vomatemba va mona Josafat, ova lombwelafana tava ti: “Ohamba yaIsrael oyo ngaho.” Onghee ova piluka ve mu lwife, na Josafat okwa li a pula ekwafo, na Jehova okwa li e mu kwafela, eshi e va ningifa va aluke ko kuye. 32 Eshi ovawiliki vomatemba va mona kutya haye ohamba yaIsrael, ova efa po diva oku mu shikula.
33 Ashike omulumenhu umwe okwa umba oshikuti shaye momhepo,* ndele ta yashe ohamba yaIsrael pokati koipapa yokandjafa koukwaita. Onghee ohamba oya tya kwaao a li ta shingi etemba layo: “Piluka, ndele to kufa nge mo molwoodi,* osheshi onda ehamekwa unene.” 34 Olwoodi ola kwata efiku alishe, nohamba yaIsrael oya li ya fikama metemba, ya taalela Ovasiria, fiyo okomatango; oya fya, eshi etango tali ningine.