Omuudifi
6 Ope na vali oshiponga* shimwe osho nda mona koshi yetango noshi li mokati kovanhu aveshe: 2 Kalunga kashili okwa pa omunhu oupuna, emona nefimano, opo a kale e na ashishe osho a hala;* ashike Kalunga kashili ihe mu efa e i hafele, ndele oha efa i hafelwe kwaao ine i longela. Osho oshongaho elela nemono loixuna. 3 Nonande omunhu oku dale ounona efele nokukala ko omido dihapu fiyo osheshi a kulupa, ndele ita* hafele oinima iwa oyo e na, fimbo ina ya mombila,* ondi wete kutya okaana oko ka pitilila po oke li xwepo ke mu dule. 4 Oke uya po epwanga. Oka fa ka fila momilaulu nokake na edina. 5 Nonande inaka mona etango nandenande nokake na eshi ke shii, natango oke li xwepo* ke dule omunhu, oo a popiwa metetekelo. 6 Otashi kwafa shike okukala nomwenyo oule womido omayovi avali, ndele ku na eshi to hafele? Mbela ovanhu aveshe ihava i monhele imwe?
7 Omunhu oha longo oilonga aishe idjuu, opo a kutife edimo laye, ndele omwenyo waye ihau wanenwa nandenande. 8 Ouwa washike omunaendunge ha mono, eshi e dule elai, ile oshi na ouwa washike, eshi ohepele i shii okulixupifa?* 9 Oshiwa okuhafela osho u wete nomesho oye, ponhele yokukala wa hala oinima oyo ito dulu okumona. Osho nasho oshongaho elela, ngaashi okutaataa omhepo.
10 Keshe osho she uya po osha hangwa nale sha lukwa, noshitwe yomunhu oya hololwa; noita dulu okulipopila* moipafi yaao e na eenghono dinene e mu dule. 11 Eendjovo* dihapu odongaho elela; otadi etele omunhu ouwa washike? 12 Olyelye e shii ouwa oo omunhu ta dulu okulonga mokukalamwenyo kwaye kuxupi nokwongaho, oko taku vilola po ngaashi omudidimbe? Olyelye ta dulu okulombwela omunhu osho tashi ka ningwa koshi yetango, ngeenge okwa fi?