Eehamba dotete
9 Diva eshi Salomo a manifa okutunga eumbo laJehova, eumbo* lohamba noinima aishe oyo a li a hala okuninga, 2 Jehova okwe lihololela Salomo oshikando oshitivali, ngaashi a li e mu lihololela muGibeon. 3 Jehova okwa tya kuye: “Onda uda eilikano loye, naashi wa li wa pula nge ekwafo. Onda yapula eumbo eli wa tungila nge, opo edina lange li fimanekelwe mo alushe, nohandi li pashukile noku li amena efimbo keshe. 4 Ngeenge owa ende mondjila yange, ngaashi xo, David, a li a ninga, we lininipika momutima noho longo ouyuki, mokuninga keshe osho handi ku lombwele, nokudulika komalombwelo nokomatokolo ange, 5 ohandi ka pameka olukalwapangelo louhamba woye muIsrael fiyo alushe, ngaashi ashike nda udanekela xo, David, nda ti: ‘Kolukalwapangelo laIsrael otaku ka kala alushe omulumenhu womoludalo loye.’ 6 Ashike ngeenge ove novanamati voye omwa efa po okushikula nge nomwa kala ihamu diinine oipango yange neenghedimhango dange, odo nde mu pa, ndele tamu ka longela ookalunga vamwe noku ve linyongamena, 7 ohandi ka xulifa po Ovaisrael medu olo nde va pa, nokuhanauna po eumbo olo nda yapula omolwedina lange, nOvaisrael otava ka yolwa* nokushekwa kovanhu aveshe. 8 Eumbo eli otali ka ninga onduba yomakulukuma. Keshe umwe, oo ta ka enda pulo, ote ke li tala a kumwa nokushika omwilwa, ndele ta ti: ‘Omolwashike Jehova a ningila oshilando neumbo eli ngaha?’ 9 Opo nee otava ka nyamukula tava ti: ‘Omolwaashi ova efa po Jehova, Kalunga kavo, oo a kufa mo ooxekulululwa medu laEgipiti, nova hoolola ookalunga vamwe, ve linyongamene kuvo noku va longela. Nomolwaasho Jehova e va etela oudjuu aushe oo.’”
10 Pexulilo leedula 20, odo Salomo a kala ta tungu omaumbo oo opavali, eumbo laJehova neumbo* lohamba, 11 Hiram, ohamba yaTirus, okwa pa Salomo omiti domisederi nomiti domidjenipa nosho yo oshingoli shihapu osho a li a hala, nohamba Salomo oya pa Hiram oilando 20 medu laGalilea. 12 Onghee Hiram okwa dja muTirus a ka tale oilando, oyo a pewa kuSalomo, ashike kaya li ye mu wanena.* 13 Okwa ti: “Mumwameme, oilando oya tya ngahelipi ei wa pa nge?” Onghee oya ka kala hai ifanwa edu laKabul* fiyo okunena. 14 Mokweendela ko kwefimbo, Hiram okwa tumina ohamba oitalenti* 120 yoshingoli.
15 Eli ehokololo li na sha naavo ohamba Salomo ya longifa va tunge eumbo laJehova, eumbo* laye, va tunge Milo,* ekuma laJerusalem, Hasor, Megiddo naGeser. 16 (Farao, ohamba yaEgipiti, okwe uya nokwa kwata ko Geser noku shi xwika po nomundilo, ndele ta dipaa Ovakaanan ovo va li hava di moshilando osho. Opo nee okwe shi yandja po komonakadona waye, omukulukadi waSalomo, shi li oshali yoposhivilo.*) 17 Salomo okwa tunga* Geser, Bet-horon shomefilu, 18 Baalat naTamar, osho shi li mombuwa, medu olo 19 nosho yo oilando aishe yaSalomo yokutuvikila, oilando yomatemba, oilando yovalondinghambe, nakeshe osho Salomo a li a hala okutunga muJerusalem, muLibanon nomedu alishe olo li li mepangelo laye. 20 Ovanhu aveshe, ovo va li va xupa po, va dja mOvaamori, mOvaheti, mOvaperesi, mOvahevi nomOvajebusi, ovo inava dja mOvaisrael, 21 oludalo lavo, olo la li la fyaala moshilongo, olo Ovaisrael va li inava dula okuxulifa po, ola li la kufwa po kuSalomo, nokwa kala he li longifa oilonga idjuu li li ovapika vaye fiyo okunena. 22 Ashike Salomo ina ninga Ovaisrael ovapika, molwaashi ova li ovakwaita vaye, ovapiya, omalenga, ovayakuli vovakwaita nomalenga aye, oo taa pashukile omatemba aye oita, novalondinghambe. 23 Opa li omalenga omakulunhu 550, oo a li taa pashukile oilonga yaSalomo, taa pashukile ovanhu ovo va li tava longo.
24 Ndele omonakadona waFarao okwa dja kOshilando shaDavid e uya keumbo laye, olo a tungilwa kuSalomo, opo nee Salomo okwa tunga Millo.
25 Salomo okwa kala ha yambele koaltari oyo a tungila Jehova omaxwikiloyambo nomayambo oukumwe lutatu modula. Okwa li yo ha twimine omayambo koaltari oyo ya li koshipala shaJehova, opo nee okwa manifa okutunga eumbo.
26 Ohamba Salomo oya li yo ya longa eeskepa dihapu muEsion-geber, osho sha li popepi naElot, komunghulofuta wEfuta Litilyana, medu laEdom. 27 Hiram okwa li a tuma ovapiya vaye va ye neeskepa, ovanailonga vomefuta va pyokoka, va ka longe pamwe novapiya vaSalomo. 28 Ova ya kuOfir, nova kufa ko oitalenti yoshingoli 420, ndele tave i twala kohamba Salomo.