Deuteronomion
2 “Opo nee otwa tanauka ko, ndele hatu i kombuwa nondjila oyo ya finda kEfuta Litilyana, ngaashi Jehova a lombwela nge, notwa enda po oule womafiku mahapu hatu kunghula nomhunda yaSeir. 2 Xuuninwa, Jehova okwa lombwela nge, a ti: 3 ‘Omwa kala tamu kunghula nomhunda ei efimbo lile. Paife tanaukileni kolundume. 4 Ovanhu va lombwela ngaha: “Otamu ka pita peengaba dovamwaxo, oludalo laEsau, ovo hava di muSeir, notava ka kala ve mu tila, nomu na okukala mwa lungama filufilu. 5 Inamu va tonda,* molwaashi itandi ke mu pa nande oshipambu shimwe shomedu lavo, nokuli nonhele i fike pomhadi,* molwaashi onda yandja omhunda Seir kuEsau i li emona laye. 6 Omu na oku va pa oimaliwa yoikulya oyo tamu ka lya, nomu na okufuta omeva oo tamu ka nwa. 7 Jehova, Kalunga koye, okwe ku nangeka noupuna mwaaishe oyo wa ninga. Oku shi shii filufilu nghee wa enda mombuwa ei inene. Jehova, Kalunga koye, okwa kala pamwe naave eedula odo 40, ndele kwa li wa pumbwa sha.”’ 8 Otwa pita po povamwameme, oludalo laEsau, ovo hava di muSeir, tu li kokule nondjila yaAraba, yaElat noyaEsion-geber.
“Opo nee otwa tanauka, ndele hatu i nondjila oyo ya finda kombuwa yaMoab. 9 Jehova okwa lombwela nge, a ti: ‘Ino tonda Moab, ile u lwe naye, osheshi itandi ke ku pa nande oshitukulwa shasha shedu laye shi ninge po shoye, molwaashi onda yandja koludalo laLot oshitukulwa shaAr shi ninge shavo. 10 (Ovaemim ova li ovanaenghono, vahapu neenghono novale ngaashi Ovaanak. 11 Ovarefaim navo ova li va talika ko va fa Ovaanak, nOvamoab ova li have va ifana Ovaemim. 12 Ovahori nale ova li hava di muSeir, ashike oludalo laEsau ole va taataa mo noku va hanauna po, ndele tali kala monhele yavo, ngaashi ashike Israel ta ka ningila edu olo li li emona laye, olo Jehova te ke mu pa filufilu.) 13 Indeni paife, ndele tamu tauluka efilu laSered. Opo nee otwa tauluka Efilu laSered. 14 Otwa enda po eedula 38, okudja kuKades-barnea fiyo twa tauluka Efilu laSered, fiyo epupi alishe olo la wana okuya moita la xula po monhanda, ngaashi Jehova a li e va lombwela. 15 Jehova okwe va yelulila eke laye, opo e va hanaune po monhanda fiyo va xula po.
16 “Diva eshi ovalumenhu aveshe ovo va wana okuya moita va fya, 17 Jehova okwa lombwela nge vali, a ti: 18 ‘Nena ou na okupita moshitukulwa shaMoab, sha hala okutya, muAr. 19 Ngeenge owe uya popepi nOvaammoni, ino va hepeka, ile u va shinde, osheshi itandi ke ku pa nande oshitukulwa shasha shedu lOvaammoni, molwaashi onde li yandja koludalo laLot li ninge lalo. 20 Nalo ola li la talika ko yo li li edu lOvarefaim. (Ovarefaim oko va li hava di oko, nOvaammoni ova li have va ifana Ovasamusumi. 21 Ova li ovanaenghono, vahapu novale ngaashi Ovaanak, ashike Jehova okwe va hanauna po moipafi yOvaammoni, nove va taataa mo, ndele tava kala hava di monhele yavo. 22 Osho osho a ningila oludalo laEsau, olo paife hali di muSeir, eshi a hanauna po Ovahori moipafi yavo, opo ve va taatae mo nokukala hava di meenhele davo fiyo okunena. 23 Ovaavim ova li hava di komikunda daGasa fiyo osheshi Ovakaftori ovo va dja muKaftori,* ve va hanauna po, ndele tava kala hava di monhele yavo.)
24 “‘Fikameni, ndele tamu tauluka Efilu laArnon. Taleni, Sihon, Omuamori, ohamba yaHesbon, onde mu yandja momake eni. Kufei ko edu laye, ndele tamu mu lwifa. 25 Nena ohandi ka ningifa ovanhu aveshe, ovo ve li kombada yedu, ovo tava udu ehokololo kombinga yoye, va tile nokukakama. Otava ka piyaanekwa nokudekweta* omolwoye.’
26 “Opo nee ohandi ka tuma ovatumwa tava di mombuwa yaKedemot kuSihon, ohamba yaHesbon, neendjovo edi dombili: 27 ‘Kwafele nge ndi pite medu loye. Ohandi ka enda mondjila, noitandi ka kandukila kolulyo, ile kolumosho. 28 Ohandi ka lya ashike oikulya nokunwa omeva oo handi ka landa kwoove. Pitike nge ashike ndi ende mo kolupadi. 29 Osho osho oludalo laEsau olo hali di muSeir, nOvamoab ovo hava di muAr va ningila nge, fiyo nda tauluka omulonga waJordan, nokuya medu olo Jehova Kalunga te tu pe.’ 30 Ndele Sihon, ohamba yaHesbon, ine tu efa tu pite mo, molwaashi Jehova, Kalunga koye, okwe mu efa a tangalale, noku kukutike omutima waye, opo e mu yandje momake eni ngaashi e shi ninga paife.
31 “Jehova okwa lombwela nge, a ti: ‘Tala, onda hovela nale okuyandja Sihon nosho yo edu laye kwoove. Kufa ko edu laye li ninge loye.’ 32 Eshi Sihon netangakwaita laye alishe ve uya oku tu shakeneka molwoodi puJahas, 33 Jehova, Kalunga ketu, okwe mu yandja kufye, opo tu mu finde, ovanamati vaye novanhu vaye aveshe. 34 Pefimbo opo otwa li twa kwata ko oilando yaye aishe, ndele hatu hanauna po oilando aishe, mwa kwatelwa ovalumenhu, ovakainhu nounona. Inatu xupifa mo nande omunhu. 35 Otwa nyeka ko ashike oimuna i ninge yetu, pamwe noixuulwa* oyo ya dja moilando oyo twa kwata ko. 36 Okudja muAroer, osho shi li komunghulo wEfilu laArnon (mwa kwatelwa oshilando osho shi li mefilu), fiyo okuGilead, kapa li odoolopa oyo twa li inatu finda. Jehova, Kalunga ketu, okwe va yandja aveshe kufye. 37 Ashike inamu ya medu lOvaammoni, Efilu alishe laJabbok nomoilando, oyo i li koshitukulwa shokeemhunda, ile keenhele dimwe oko Jehova, Kalunga ketu, e tu lombwela tuha ye ko.