Samuel wotete
22 David okwa dja po opo, ndele ta ka hondama kekololo laAdullam. Eshi ovamwaxe noukwaneumbo aushe waxe we shi uda, owa ya ko kuye. 2 Ovanhu aveshe ovo va li moupyakadi, ve na eendjo nova nyika oluhodi, ova ongala puye, ndele ta ningi omuwiliki wavo. Ovalumenhu aveshe ovo va li pamwe naye ova li 400 lwaapo.
3 Lwanima, David okwa ya kuMispe muMoab, ndele ta lombwele ohamba yaMoab ta ti: “Alikana, pitika tate nameme va kale naave, fiyo osheshi nda shiiva osho Kalunga ta ka ningila nge.” 4 Onghee okwe va fiya nohamba yaMoab, nova kala nayo efimbo alishe olo David a kala moshihondamenolando.
5 Mokweendela ko kwefimbo, omuprofeti Gad okwa tya kuDavid: “Ino kala moshihondamenolando. Dja mo, ndele to i kedu laJuda.” Onghee David okwa dja mo, ndele ta i mofuka yaHeret.
6 Saul okwa li a uda kutya David novalumenhu ovo a li pamwe navo ova monika. Saul okwa li e li omutumba muGibea, momuti womutamarisk, koshikulundudu e na eonga meke laye, novapiya vaye aveshe ova li ofika ve mu dingilila. 7 Opo nee Saul okwa lombwela ovapiya vaye, ovo va li ofika ve mu dingilila, a ti: “Alikana, pwilikineni, nye Ovabenjamin. Mbela omonamati waIsai naye ote ke mu pa omapya noikunino yomandjebele amushe? Mbela ote ke mu nangeka po amushe mu li omalenga taa pashukile omayovi nomalenga taa pashukile omafele? 8 Amushe omu li nge koshi. Kape na nande oumwe womunye a lombwela nge, eshi omonamati wange a ninga ehangano nomonamati waIsai. Kape na nande oumwe womunye a udila nge oukwao wananghali nokulombwela nge kutya omonamati wange okwa nwefa mo omupiya wange a nangele nge, ngaashi te shi ningi paife, opo a ponokele nge.”
9 Onghee Doeg, Omuedom, oo a li a fikama mokati kovapiya vaSaul, okwa nyamukula a ti: “Onda mona omonamati waIsai e uya muNob kuAhimelek, omonamati waAhitub. 10 Opo nee okwe mu pulila ewiliko kuJehova, ndele te mu pe oikulya. Okwe mu pa yo eongamukonda lOmufilisti Goliat.” 11 Ohamba oya tuma diva i etelwe Ahimelek, omonamati womupristeri Ahitub, novapristeri aveshe vomeumbo laxe, ovo va li muNob. Opo nee aveshe ove uya kohamba.
12 Onghee Saul okwa tya: “Alikana, omonamati waAhitub, pwilikina.” Ahimelek okwa nyamukula a ti: “Eewa, omwene wange.” 13 Saul okwa tya kuye: “Omolwashike mu li nge koshi, nye nomonamati waIsai, eshi we mu pa omungome neongamukonda nowe mu pulila ewiliko kuKalunga? Oku li omhinge naame nokwa nangela nge, a teelela okumona omhito, opo a ponokele nge.” 14 Opo nee Ahimelek okwa nyamukula ohamba a ti: “Olyelye omulineekelwa* mokati kovapiya voye aveshe ngaashi David? David oshitenya shohamba, omukulunhu wovanangeli voye nokwa tumbalekwa meumbo loye. 15 Mbela eshi osho oshikando shotete handi mu pulile ewiliko kuKalunga? Itandi dulu nande okuninga oshinima osho to popi. Ohamba, ino handukila omupiya woye nosho yo eumbo latate alishe, molwaashi omupiya woye ke shii sha nandenande kombinga yoshinima osho.”
16 Ashike ohamba oya ti: “Ahimelek ou na okufya pamwe noukwaneumbo waxo aushe.” 17 Ohamba oya tya kovanangeli,* ovo va li ofika ve i dingilila: “Indeni mu ka dipae ovapristeri vaJehova, molwaashi ova ama kombinga yaDavid. Ova li ve shi shii kutya okwa faduka po, ndele inava lombwela nge.” Ashike ovapiya vohamba kava li va hala okudipaa ovapristeri vaJehova. 18 Opo nee ohamba oya tya kuDoeg: “Inda, ove u ka dipae ovapristeri.” Onghee Doeg, Omuedom, okwa ya diva, ndele ta dipaa ovapristeri. Mefiku olo okwa dipaa ovalumenhu 85 va djala outetahema voliina. 19 Okwa dipaa yo neongamukonda ovanhu vomuNob, oshilando shovapristeri. Okwa dipaa neongamukonda ovalumenhu, ovakainhu, ounona nouhanana, eengobe, eendongi needi.
20 Abjatar, umwe womovanamati vaAhimelek, omonamati waAhitub, okwa faduka po a shikula David. 21 Abjatar okwa lombwela David a ti: “Saul okwa dipaa ovapristeri vaJehova.” 22 Opo nee David okwa tya kuAbjatar: “Onde shi didilika efiku linya eshi Doeg, Omuedom, a li mwinya, kutya oku na oku shi lombwela Saul. Aame ndi na ondjo omolwefyo lovanhu aveshe* vomeumbo laxo. 23 Kala pamwe naame. Ino tila, osheshi keshe oo ta kendabala oku ku dipaa ota kendabala yo okudipaa nge. Ou li meameno lange.”