Samuel wotete

18 Diva eshi David a mana okupopya naSaul, Jonatan naDavid ova panga oukaume wopofingo,* na Jonatan okwa hovela okukala e mu hole ngaashi e lihole ye mwene.* 2 Okudja efiku olo, Saul okwa twikila okukala naDavid noka li e mu efa a shune keumbo laxe. 3 Jonatan naDavid ova ninga ehangano, molwaashi Jonatan okwa kala e hole David ngaashi e lihole ye mwene.* 4 Jonatan okwa dula mo okandjafa, oko a li a djala kehe na omaoko, ndele te ka pe David pamwe noikutu yaye imwe, eongamukonda laye, outa waye nosho yo ekwamo* laye. 5 David okwa kala ha i keshe opo Saul te mu tumu, nokwa kala ha pondola.* Onghee Saul okwa li e mu ninga omuwiliki wovakwaita, naasho osha li sha hafifa ovanhu aveshe novapiya vaSaul.

6 Ngeenge David navakwao va li va aluka kolwoodi, eshi va li tava lwifa Ovafilisti, ovakainhu va dja moilando aishe yaIsrael ohava i va ka shakeneke ohamba Saul, tava imbi va hafa notava dana ve na oungoma noishikomwa imwe vali. 7 Ovakainhu ovo ova li tava dana tava imbi tava ti:

8 Saul okwa li a handuka neenghono, neimbilo olo kala li le mu hafifa, osheshi okwa ti: “Otava tange David nomayovi omilongo, ofimbo ame onomayovi. Mafiku otave mu ningi ohamba.” 9 Okudja efiku olo, Saul okwa kala alushe ta konenene eenghatu daDavid.

10 Mefiku la shikula ko, Kalunga okwa efa omhepo ii i kwate Saul,* nokwa hovela okulihumbata nai* meumbo, ofimbo David a li ta shiki okaxumbafeta ngaashi ha ningi shito. Saul okwa li e na eonga meke laye, 11 nokwa umba eonga, ndele te lipopile ta ti: ‘David ohandi mu twile kekuma.’ Ashike David okwe mu faduka po oikando ivali. 12 Opo nee Saul okwa li a tila David, molwaashi Jehova okwa li pamwe naye, ndele ka li vali pamwe naSaul. 13 Onghee Saul okwa lekela David, ndele te mu nangeke po e li elenga tali pashukile eyovi, na David okwa kala ha wilike etangakwaita molwoodi.* 14 David okwa kala ha pondola* mwaashishe osho a ninga, na Jehova okwa li pamwe naye. 15 Eshi Saul a mona kutya David okwa li ha pondola unene, okwa li e mu tila. 16 Ashike Ovaisrael nOvajuda aveshe ova kala ve hole David, molwaashi okwa kala he va kwatele komesho, ngeenge tava i komalwoodi.

17 Lwanima, Saul okwa lombwela David ta ti: “Ou omonakadona wange woshiveli, Merab. Ohandi mu ku pe a ninge omukulukadi woye. Ashike ou na okutwikila okuulikila nge ouladi woye, nokulwa oita yaJehova.” Onghee Saul okwe lipopila ta ti: ‘Itandi dipaa David; Ovafilisti ovo nave mu dipae.’ 18 Opo nee David okwa tya kuSaul: “Aame lyelye, novapambele vange ovo oolyelye, ovapambele vatate muIsrael, opo ndi ninge oshitenya shohamba?” 19 Ashike eshi efimbo la fika Saul a yandje omonakadona waye, Merab, kuDavid, okwa hangwa a yandja nale Merab a ninge omukulukadi waAdriel, Omumeholati.

20 Omonakadona waSaul, Mikal, okwa li e hole David, na Saul okwa li e shi lombwelwa, nosha li she mu hafifa. 21 Onghee Saul okwa tya: “Ei omhito iwa nokukwata David. Ngeenge onda yandje omonakadona wange e mu hombole, ondi wete kutya Ovafilisti otave ke mu dipaa.” Opo nee Saul okwa lombwela David oshikando oshitivali ta ti: “Ninga oshitenya shohamba paife.” 22 Saul okwa lombwela vali ovapiya vaye ta ti: “Popyeni naDavid meholeko tamu ti, ‘Tala, ohamba oye ku panda, novapiya vayo aveshe ove ku hafela. Paife ninga oshitenya shohamba.’” 23 Eshi ovapiya vaSaul va lombwela David oinima oyo, David okwa ti: “Mbela otamu diladila kutya oshinima shipu kwaame okuninga oshitenya shohamba, ngeenge ame ohepele noinandi fimana?” 24 Opo nee ovapiya vaSaul ove mu lombwela tava ti: “Eendjovo odo odo David a popya.”

25 Konima yaasho, Saul okwa tya: “Ka lombweleni David tamu ti, ‘Ohamba inai hala oyoonda, kakele koipa yokoxulo youlumenhu i li 100 yOvafilisti, opo ohamba i handukile ovatondi vayo.’” Osheshi Saul okwa li ta kengelele David, opo a dipawe kOvafilisti. 26 Onghee ovapiya vaye ova lombwela David eendjovo odo, na David okwa li a hafa okuninga oshitenya shohamba. Ofimbo efimbo inali pwa ko, 27 David okwa ya pamwe novakwaita vaye, ndele tava dipaa ovalumenhu Ovafilisti 200, na David okwa etela ohamba omuvalu we lixwa po woipa yokoxulo youlumenhu, opo a ninge oshitenya shohamba. Opo nee Saul okwa yandja omonakadona waye, Mikal, a ninge omukulukadi waDavid. 28 Saul okwa li a mona kutya Jehova oku li pamwe naDavid nonokutya omonakadona waye, Mikal, oku hole David. 29 Osho osha li sha ningifa Saul a kale a tila unene David, na Saul okwa ninga omutondi waDavid onghalamwenyo yaye aishe.

30 Omalenga Ovafilisti okwa kala haa i molwoodi, naalushe eshi a kala haa i, David okwa kala ha pondola unene* e dule ovapiya aveshe vaSaul, nokwa li a tumbalekwa unene.