Daniel
8 Modula onhinhatu yokupangela kwohamba Belsassar, ame Daniel, onda mona emoniko konima yaalo nda mona tete. 2 Onda mona emoniko, naashi nda li handi tale, onda li muSusan,* oshilando sha dingililwa komakuma,* osho sha li moshitukulwalongo* shaElami; onda tala emoniko, nonda li ndi li popepi nondjila yomeva aUlai. 3 Eshi nda yelula omesho ange, tala! opa li odi yondume ya fikama popepi nondjila yomeva, noya li i na eembinga mbali. Eembinga odo mbali oda li dile, ashike imwe oya li ile unene i dule ikwao, naayo ile oyo ya mena xuuninwa. 4 Onda mona odi yondume tai umhile kouninginino, kolundume nokolukadi, nokapa li oshifitukuti sha li tashi dulu oku i ya moshipala, nokapa li oo ta dulu okuxupifa sha keenghono* dayo. Oya ninga keshe osho tashi i wapalele, noye litumbaleka.
5 Eshi nda kala handi tale, tala! opa li oshikombo shoshipedi tashi uya tashi di kouninginino,* tashi tavakana kombada yedu alishe inashi lyata pedu. Noshikombo osho osha li shi na oluvinga la kula pokati komesho asho. 6 Osha li sha finda kodi yondume, oyo i na eembinga mbali, oyo nda mona ya fikama popepi nondjila yomeva; osha li tashi tondoka sha finda kuyo sha fula onya neenghono.
7 Onda mona tashi ehene popepi nodi yondume, nosha li she i handukila neenghono. Osha twa odi yondume, nosha teya eembinga dayo mbali, nodi yondume kaya li vali i na eenghono dokufikama po i shi lwife. Osha undulila pedu odi yondume, noshe i lyataulila po, nokapa li oo te i xupifa keenghono* dasho.
8 Opo nee oshikombo shoshipedi oshe litumbaleka unene, ashike diva eshi sha nghonopala, oluvinga lasho la kula ola li la teka; opo nee eembinga nhee da kula oda mena ponhele yoluvinga limwe, da taalela keemhepo nhee deulu.
9 Moluvinga limwe lomudo omwa mena oluvinga limwe linini, nola kula, ndele tali ningi linene la taalela kolukadi, nola taalela koushilo,* nola taalela kEwapalo.* 10 Ola kula neenghono, la twa fiyo oketangakwaita lokeulu, nola ningifa vamwe metangakwaita olo nosho yo eenyofi dimwe di wile kombada yedu nole di lyataulila pedu. 11 Ole linenepekela nokuli Ohamba yetangakwaita, noya li ya kufwa eyambo laalushe,* nonhele oyo ya li ya tulwa po yomouyapuki waye oya li ya hanaunwa po. 12 Netangakwaita ola li la yandjwa pamwe neyambo laalushe* omolwomatauluko; nola kala tali kupulashi oshili kombada yedu, nola katuka onghatu nokupondola.
13 Nonda uda omuyapuki ta popi, nomuyapuki mukwao okwa pula oo ta popi a ti: “Fiyo onaini emoniko leyambo laalushe* noletauluko tali twikile okweetifa oupyakadi, li ningife oinima iyapuki netangakwaita li lyataulwe?” 14 Onghee okwa tya kwaame: “Fiyo eenguloshi neengula 2 300; nonhele iyapuki otai ka tungululwa shili i kale ngaashi i na okukala.”
15 Ofimbo ame, Daniel, nda li handi tale emoniko nokukendabala oku li uda ko, ohaluka, onda mona umwe oo a fa omunhu a fikama komesho yange. 16 Opo nee onda uda ondaka yomunhu pokati komulonga waUlai, nokwa ingida mokule ta ti: “Gabriel, yelifila omunhu oo a ude ko osho a mona.” 17 Opo nee okwe uya popepi naapo nda li nda fikama, ndele eshi e uya popepi, onda li nda tila neenghono, onghee onde linyongamena oshipala shange sha twa pedu. Okwa tya kwaame: “Uda ko, akutu omona womunhu, kutya emoniko oli na sha nefimbo lexulilo.” 18 Ashike ofimbo a li ta popi naame, onda kofa eemhofi didjuu oshipala shange sha twa medu. Onghee okwa kuma nge nokwa kaleka nge ofika opo nda li nda fikama nale. 19 Opo nee okwa lombwela nge a ti: “Paife, ohandi ku ningifa u shiive osho tashi ka ningwa po pexulilo letokolo, molwaashi oli na sha nefimbo lexulilo olo la tulwa po.
20 “Odi yeembinga mbali, oyo wa mona oi lile po eehamba daMedia naPersia. 21 Oshikombo shoshipedi shomandjafufu oshi lile po ohamba yaGreka; noluvinga la kula, olo la li pokati komesho asho, oli lile po ohamba yotete. 22 Shi na sha noluvinga olo la teka, opo pa mene eembinga nhee ponhele yalo, otashi ti ope na omauhamba ane taa di moshiwana shayo tae ke uya, ndele hakeenghono dayo.
23 “Nopefimbo lexulilo elela louhamba wado, eshi ovanyoni va wanifa po owii,* ohamba ikwanyanya oyo hai udu ko oinima ya kitakana,* otai ka holoka. 24 Eenghono dayo otadi ka ninga dinene, ndele hakeenghono dayo vene. Otai ka etifa ehanauno monghedi ikumwifi,* notai ka pondola nokukatuka eenghatu nomupondo. Otai ka xulifa po ovanaenghono nosho yo ovayapuki. 25 Nomokukengelela kwayo, otai ka longifa oukengeleledi i pondole, notai ke litumbaleka momutima wayo. Nopefimbo leameno* otai ka xulifa po vahapu. Otai ka fikama nokuli i kondjife Ohamba yeehamba, ashike otai ka teyaulwa, ndele hakeke lomunhu.
26 “Osho sha li sha popiwa memoniko shi na sha neenguloshi nosho yo neengula oshoshili, ashike ou na okukaleka emoniko oshiholekwa, osheshi otali ulike kefimbo lomafiku mahapu okudja paife.”*
27 Ashike ame, Daniel, onda li nda loloka nonda li handi vele omafiku amwe. Opo nee onda fikama, nonda twikila okuwanifa po oshilonga shohamba. Ndele onda li nda kanghwa kwaasho nda li nda mona, nokapa li pe na oo ta dulu oku shi uda ko.