Daniel

5 Shi na sha nohamba Belsassar, oya li ya ningila ovaleli vayo eyovi oshivilo shinene, noya li tai nu omaviinyu i li komesho yavo. 2 Ofimbo Belsassar a li a kolwa komaviinyu, okwa yandja elombwelo ku etwe oikwatelwa yoshingoli noyoshisilveri oyo xe, Nebukadnesar, a kufa kotembeli muJerusalem, opo ohamba novaleli vayo, ovakulukadi vayo vopomunghulo novakulukadi vayo vakwao va dule okunwina mo. 3 Opo nee ova eta oikwatelwa yoshingoli oyo ya kufwa kotembeli meumbo laKalunga muJerusalem, nohamba novaleli vayo, ovakulukadi vayo vopomunghulo novakulukadi vayo vakwao ova nwina mo. 4 Ova nwa omaviinyu nova tanga oikalunga yoshingoli noyoshisilveri, yongopolo, yoshivela shilaula, yoiti noyomamanya.

5 Pefimbo opo tuu opo, opa li pa holoka ominwe deke lomunhu, noda li da hovela okushanga kekuma lombala yohamba popepi noshikwatelwalamba, nohamba oya li i wete kombada yeke, eshi la li tali shange. 6 Opo nee olutu lohamba ola pemba,* nomadiladilo ayo okwe i tilifa, neenho dayo oda kakama, neengolo dayo oda hovela okulidenga mumwe.

7 Ohamba oya ingida mokule ku ongelwe ovanyanekeli, Ovakaldea* novanyanekeli veenyofi. Ohamba oya lombwela ovalumenhu ovanaendunge vomuBabilon ya ti: “Omunhu keshe oo ta lesha eshangelo eli nokulombwela nge efatululo lalo, ota ka djalekwa oshikutu shipeepela, ta ka dikwa okalyenge koshingoli mofingo yaye nota ka pangela e li omutitatu mouhamba.”

8 Opo nee ovalumenhu aveshe ovanaendunge vohamba ove uya mo, ashike kava li tava dulu okulesha eshangelo, ile okulombwela ohamba efatululo. 9 Onghee ohamba Belsassar oya li ya tila neenghono, noshipala shayo osha li sha pemba; novaleli vayo ova li va lyalyakana.

10 Omolweendjovo dohamba nodovaleli vayo, ina yohamba okwa ya monduda omo mwa li mu na oitendele. Ina yohamba okwa ti: “Akutu ohamba, kala nomwenyo fiyo alushe. Ino efa omadiladilo oye e ku tilife, noino efa oshipala shoye shi pembe. 11 Ope na omulumenhu* mouhamba woye, oo e na omhepo yookalunga vayapuki. Pefimbo laxo, ouyelele, neendunge nounongo, ngaashi ounongo wookalunga, owa li wa monika muye. Ohamba Nebukadnesar, xo, oye mu nangeka po e li elenga ekulunhu lovapristeri veemhule, lovanyanekeli, lOvakaldea* nolovanyanekeli veenyofi; xo okwa ninga ngaho, omwene ohamba. 12 Osheshi Daniel, oo ohamba ya luka Beltesasar, okwa li e na omhepo ye likalekelwa, eshiivo neendunge dokufatulula eendjodi, dokuyelifa eetumbutumbu nodokukandula po omaupyakadi a kwata moiti.* Paife, Daniel na ifanwe, note ke ku lombwela efatululo.”

13 Onghee Daniel okwa li a etwa mo koshipala shohamba. Ohamba oya pula Daniel ya ti: “Oove Daniel womeenghwate daJuda, oo tate, ohamba, a kufa kuJuda? 14 Onda uda shi na sha naave kutya ou na omhepo yookalunga, nouyelele neendunge nounongo wa shiya ko owa monika mwoove. 15 Opo nee ovalumenhu ovanaendunge novanyanekeli ova li va etwa mo koshipala shange va leshe eshangelo eli nokulombwela nge efatululo lalo. Ashike kava li tava dulu okulombwela nge efatululo letumwalaka. 16 Ndele onda uda shi na sha naave kutya oto dulu okuyandja omafatululo nokukandula po omaupyakadi a kwata moiti.* Paife ngeenge oto dulu okulesha eshangelo eli nokulombwela nge efatululo lalo, oto ka dikwa oshikutu shipeepela, to ka dikwa okalyenge koshingoli mofingo yoye noto ka pangela u li omutitatu mouhamba.”

17 Opo nee Daniel okwa nyamukula ohamba ta ti: “Oto dulu okukala neeshali doye nokuyandja oinima yoye kuvamwe. Ashike ohandi leshele ohamba eshangelo noku i lombwela efatululo lalo. 18 Shi na sha naave, omwene ohamba, Kalunga Omukombadambada okwa yandja kuNebukadnesar, xo, ouhamba, nounene nefimano neenghono. 19 Omolwounene oo E mu pa, ovanhu aveshe, oiwana neengudu domalaka okwa kakama koumbada koshipala shaye. Okwa li ha dipaa keshe oo a hala, ile a efe a kale nomwenyo, nokwa li ha tumbaleke keshe oo a hala, ile e mu fife ohoni. 20 Ndele eshi omutima waye we linenepeka, nomhepo yaye ya tangalala, nokwa katuka nounhwa, okwa li a tulwa pedu, a kufwa ko kolukalwapangelo louhamba waye, nokwa li a kufwa efimano laye. 21 Okwa li a tewa mo mokati kovanhu, nomutima waye owa li wa ningwa ngaashi oo woshinamwenyo, nokwa li ha kala pamwe neendongi domoixwa. Okwa li a pewa omwiidi a lye ngaashi eengobe deemhedi, nolutu laye ola li la tutikwa komume yokeulu, fiyo osheshi a shiiva kutya Kalunga Omukombadambada oye Omupangeli mouhamba wovanhu, note u yandje kukeshe oo a hala.

22 “Ashike ove, omonamati waye, Belsassar, ino lininipika momutima woye, nonande ou shii oinima aishe ei. 23 Ponhele yaasho, owe litumbalekela Omwene weulu, nowe va ningifa ve ku etele oikwatelwa yeumbo laye. Opo nee ove novaleli voye, ovakulukadi voye vopomunghulo novakulukadi voye vamwe omwa nwina mo omaviinyu, ndele tamu tange oikalunga yoshisilveri noyoshingoli, yongopolo, yoshivela shilaula, yoiti noyomamanya, oikalunga oyo ihai mono ko noihai udu ko nokai na eshi i shii. Ndele ove ino fimaneka Kalunga oo meke laye mu na omufudo woye neendjila doye adishe. 24 Onghee eke ola li la tumwa kuye, neshangelo eli ola li la shangwa. 25 Naali olo eshangelo olo la shangwa: MENE, MENE, TEKEL nosho yo PARSIN.

26 “Aa oo omafatululo oitya: MENE, Kalunga okwa valula omafiku ouhamba woye, note ke u xulifa po.

27 “TEKEL, owa tulwa koshiyelekifo, nowa monika kutya owa kambela sha.

28 “PERES, ouhamba woye owa tukaulwa, notau ka yandjwa kOvamedia nokOvapersia.”

29 Opo nee Belsassar okwa yandja elombwelo, nova dika Daniel oshikutu shipeepela nove mu dika okalyenge koshingoli mofingo yaye; nova shiivifa shi na sha naye kutya ota ka ninga omupangeli omutitatu mouhamba.

30 Oufiku oo tuu oo, Belsassar, ohamba yOvakaldea, okwa li a dipawa. 31 Na Darius, Omumedia, okwa li a pewa ouhamba; okwa li e na eedula 62 lwaapo.