Josua
11 Diva eshi Jabin, ohamba yaHasor, e shi uda, okwa tuma ondjovo kuJobab, ohamba yaMadon, nokohamba yaSimron, ohamba yaAksaf, 2 keehamba odo da li kolundume loshitukulwa shokeemhunda, odo da li momaluhaela,* kolukadi laKinneret, odo da li muShefela nomomalufilu aDor fiyo okouninginino, 3 Ovakaanan ovo va li koushilo nokouninginino, Ovaamori, Ovaheti, Ovaperesi, Ovajebusi, ovo va li koshitukulwa shokeemhunda, nOvahevi, ovo va li komhunda yaHermon, medu laMispa. 4 Onghee ode uya nomatangakwaita ado aeshe mahapu neenghono ngaashi ehekedu lopomunghulo wefuta, pamwe neenghambe dihapu nosho yo omatemba oita. 5 Eehamba adishe odo oda li da dimina di shakene, noda ya, ndele tadi ongo onhanda pomeva omuMerom di ka lwife Israel.
6 Opo nee Jehova okwa lombwela Josua, ta ti: “Ino tila omolwavo, osheshi mongula pefimbo eli, aveshe ohandi ke va yandja kuIsrael e va dipae. Eenghambe davo omu na oku di teta omifipa domaulu, nomatemba avo omu na oku a xwika po nomundilo.” 7 Opo nee Josua pamwe nomatangakwaita ove va ponokela ombadilila pomeva omuMerom. 8 Jehova okwe va yandja meke lOvaisrael nove va finda, ndele tave va taataa fiyo okuSidon Shinene nokuMisrefot-maim nokEfilu laMispe fiyo okoushilo, ndele tave va dipaa fiyo ve va mana po. 9 Josua okwa ninga naanaa ngaashi Jehova e mu lombwela; okwa teta omifipa domaulu eenghambe davo nokwa xwika po omatemba avo nomundilo.
10 Opo nee Josua okwa shuna, ndele ta kwata ko Hasor nokudipaa ohamba yasho neongamukonda, molwaashi Hasor osho sha li oshinaenghono momauhamba aeshe oo. 11 Ova ponokela keshe umwe,* oo a li mo, neongamukonda, nove va hanauna po. Inamu fyaala nande oshinamufudo. Opo nee ova xwika po Hasor nomundilo. 12 Josua okwa kwata ko oilando aishe yeehamba odo, nokwa finda eehamba dayo adishe neongamukonda. Okwe di hanauna po, ngaashi ashike Moses, omupiya waJehova, a li e mu lombwela. 13 Ashike Israel ka li a xwika po nande oilando oyo ya li koikulundudu inini; Hasor osho ashike sha li sha xwikwa po kuJosua. 14 Ovaisrael ova li va nyeka ko oixuulwa* aishe yoilando oyo noimuna, i ninge po yavo. Ashike ova ponokela ovanhu aveshe neongamukonda fiyo osheshi ve va hanauna po aveshe. Inava fiya mo nande omunhu e na omwenyo. 15 Osho Jehova a lombwela omupiya waye, Moses, osho Moses a lombwela Josua, na Josua osho a ninga. Okwa ninga oinima aishe oyo Jehova a li a lombwela Moses.
16 Josua okwa kwata ko edu alishe eli, oshitukulwa shokeemhunda, Negeb ashishe, edu alishe laGosen, Shefela, Araba noshitukulwa shokeemhunda shaIsrael, noikulundudu yasho. 17 Okudja komhunda Halak, oyo ya ya fiyo okuSeir, nosho yo fiyo okuBaal-gad, osho shi li mEfilu laLibanon komhunda yaHermon, nokwa kwata ko eehamba davo adishe nokwe di finda, e di dipaa. 18 Josua okwa lwifa eehamba adishe odo oule wefimbo lonhumba. 19 Kapa li oshilando sha ninga ombili naIsrael, kakele kOvahevi ovo va li hava di muGibeon. Ovaisrael ova finda ovanhu aveshe moita. 20 Jehova oye a li a efa va kukutike omitima davo, va lwife Israel, opo e va hanaune po nopehe na oku va fila onghenda. Ova li ve na okuhanaunwa po, ngaashi ashike Jehova a li a lombwela Moses.
21 Pefimbo olo, Josua okwa hanauna po Ovaanak, okudja koshitukulwa shokeemhunda, kuHebron, Debir, Anab nokoshitukulwa ashishe shokeemhunda shaJuda nosho yo koshitukulwa ashishe shokeemhunda shaIsrael. Josua okwe va hanauna po noilando yavo. 22 Medu lOvaisrael kamwa li mwa xupa Ovaanak, ova li ashike muGasa, muGat nomuAsdod. 23 Onghee Josua okwa kwata ko edu alishe, ngaashi ashike Jehova a li a udanekela Moses, na Josua okwe li yandja li li efyuululo kOvaisrael paitukulwa yavo, li tukulilwe omapata avo. Medu olo kamwa li vali oita.