Ovatokolipangeli

20 Ovaisrael aveshe ova dja ko kuDan va ya kuBer-seba, nova dja yo kedu laGilead, ndele ongudu aishe tai ongala koshipala shaJehova muMispa, i li moukumwe.* 2 Onghee omalenga ovanhu nomapata aeshe aIsrael okwa ongala mokati keongalo loshiwana shaKalunga, ovakwaita vokolupadi 400 000, va homata omaongamukonda.

3 Ovabenjamin ova uda kutya ovalumenhu Ovaisrael ova ya kuMispa.

Opo nee ovalumenhu Ovaisrael ova tya: “Tu lombwela kutya oshinima osho shinyanyalifi osha ningwa ngahelipi?” 4 Onghee omulumenhu Omulevi, omushamane womukainhu oo a dipawa, okwa nyamukula, a ti: “Onda li nda ya nomukulukadi wange wopomunghulo kuGibea shomuBenjamin oko tu ka nangale. 5 Opo nee ovakalimo* vomuGibea ova ponokela nge nova li va dingilila eumbo oufiku. Ova li va hala okudipaa nge, ashike ponhele yaasho, ova kwata onghonga omukulukadi wange wopomunghulo, ndele ta fi. 6 Onghee onda kufa oshimhu shaye, nonde shi tetaula, ndele oinhimbu handi i tumine moitukulwa aishe yefyuululo laIsrael, molwaashi ova longa oshilonga shififa ohoni noshitondifa muIsrael. 7 Paife Ovaisrael amushe kundafaneni oshinima osho, ndele tamu tokola osho shi na okuningwa po.”

8 Ovanhu aveshe ova fikama ve li moukumwe,* ndele tava ti: “ Kape na nande oumwe womufye ta i ketwali laye, ile ta shuna keumbo lavo. 9 Gibea ohatu ke shi ningila ngaha: Ohatu ka umba oshihoololifo, ndele hatu ke shi lwifa. 10 Momapata aeshe aIsrael ohatu ka kufa mo ovalumenhu 10 vomovalumenhu 100, ovalumenhu 100 vomovalumenhu 1 000, ovalumenhu 1 000 vomovalumenhu 10 000 va longekide oikulya yetangakwaita, opo va katukile onghatu Gibea shomuBenjamin omolwoilonga itondifa oyo va longa muIsrael.” 11 Ovalumenhu aveshe Ovaisrael ova li va ongala ve li moukumwe* va ponokele oshilando osho.

12 Opo nee omapata aIsrael okwa tuma ovalumenhu kovalumenhu aveshe vomepata laBenjamin, va ti: “Omolwashike mokati keni mwa longwa oshilonga shinyanyalifi sha tya ngaho? 13 Eteni ovalumenhu ovo ovakolokoshi vomuGibea, opo tu va dipae notu kombe mo osho shii muIsrael.” Ashike Ovabenjamin inava pwilikina kovamwaxe Ovaisrael.

14 Opo nee Ovabenjamin ova ongala kondje yoilando va ye kuGibea va ka lwife ovalumenhu Ovaisrael. 15 Efiku olo Ovabenjamin ova ifana ovalumenhu 26 000 moilando yavo va homata omaongamukonda, inamu kwatelwa ovalumenhu 700, ovo va hoololwa vomuGibea. 16 Ovalumenhu 700 vometangakwaita eli, ovo va hoololwa, ova li ve na olumosho. Keshe umwe womovalumenhu ovo okwa li ta dulu okushoneka oxwiki nemanya, ndele ite i shekuna.

17 Ovalumenhu vomomapata aIsrael, inamu kwatelwa Ovabenjamin, ova li va ifana ovalumenhu 400 000, va homata omaongamukonda, nakeshe umwe okwa li omukwaita a pyokoka. 18 Ova fikama, ndele tava i kuBetel va ka pule ewiliko kuKalunga. Opo nee Ovaisrael ova ti: “Olyelye womufye ta ka kwatela komesho, eshi hatu ka lwifa Ovabenjamin?” Jehova okwa nyamukula, a ti: “Juda oye ta kwatele komesho.”

19 Konima yaasho, Ovaisrael ova penduka ongula, ndele tava ka onga onhanda puGibea.

20 Ovalumenhu Ovaisrael ova ya va ka lwife Ovabenjamin. Ova li ve liunganekela olwoodi ve va lwife puGibea. 21 Onghee Ovabenjamin ova dja mo muGibea, ndele tava dipaa ovalumenhu Ovaisrael 22 000 mefiku olo. 22 Ovalumenhu vometangakwaita laIsrael ova li va nyatipala, ndele natango tave lilongekidile olwoodi ponhele opo va li mefiku lotete. 23 Opo nee Ovaisrael ova ya nova lilila koshipala shaJehova fiyo okonguloshi, tava pula ekwafo kuJehova tava ti: “Natu ye natango molwoodi tu ka lwife ovamwatate, Ovabenjamin?” Jehova okwa ti: “Indeni mu ke va lwife.”

24 Mefiku etivali, Ovaisrael ova ehena popepi nOvabenjamin. 25 Ovabenjamin navo ove uya va dja muGibea ve va shakeneke mefiku etivali, nova dipaa natango Ovaisrael 18 000, aveshe va homata omaongamukonda. 26 Opo nee ovalumenhu aveshe Ovaisrael ova ya kuBetel. Ova lila nova kala omutumba oko koshipala shaJehova, ndele tave lidilike mefiku olo fiyo okonguloshi, nova yambela ko omaxwikiloyambo nomayambo oukumwe koshipala shaJehova. 27 Konima yaasho, ovalumenhu Ovaisrael ova pula ewiliko kuJehova, molwaashi oshikefa shehangano laKalunga kashili osha li kuBetel pefimbo opo. 28 Pinehas, omonamati waEliaser, omonamati waAron, oye a li ta yakula* pusho pefimbo opo. Ova pula va ti: “Natu ye natango tu ka lwife ovamwatate, ovalumenhu Ovabenjamin, ile inatu ya?” Jehova okwa nyamukula, a ti: “Indeni, molwaashi ohandi va yandje momake eni mongula.” 29 Opo nee Israel okwa tuma ovalumenhu va ka nangele va dingilila Gibea ashishe.

30 Ovaisrael ova ya va ka lwife Ovabenjamin mefiku etitatu, nova li ve lilongekidila olwoodi va lwife Gibea, ngaashi va li ve shi ninga oikando ikwao. 31 Ovabenjamin ova dja mo va ka shakeneke etangakwaita nova li va ya kokule noshilando. Ngaashi va li ve shi ninga oikando ikwao, ova hovela okuponokela nokudipaa ovalumenhu vamwe mondjila oyo ya finda kuBetel, nomondjila ikwao oyo ya finda kuGibea, nova fiya va dipaela moixwa ovalumenhu 30 Ovaisrael. 32 Onghee Ovabenjamin ova ti: “Ohatu va findi filufilu ngaashi shito.” Ashike Ovaisrael ova ti: “Ohatu va kengelele, ndele hatu va twala kokule noshilando keendjila odo.” 33 Onghee ovalumenhu aveshe Ovaisrael ova dja mo meenhele davo, ndele tave lilongekidile olwoodi puBaal-tamar, ofimbo Ovaisrael vakwao va dja po peenhele opo va li va nangela moshitukulwa shaGibea. 34 Ovalumenhu aveshe vOvaisrael 10 000 ove uya popepi naGibea, ndele tava lu olwoodi la kwata moiti. Ashike Ovabenjamin kava li ve shii kutya ove li pokuhangwa koupyakadi.

35 Jehova okwa finda Ovabenjamin moipafi yOvaisrael, nomefiku olo Ovaisrael ova dipaa Ovabenjamin 25 100, aveshe va homata omaongamukonda.

36 Ndele Ovabenjamin ova li tava diladila kutya ova finda Ovaisrael, eshi va li tave va faduka po. Ashike ova li tava faduka po, molwaashi ova li ve lineekela ovo va li va nangela Gibea. 37 Ovo va li va nangela ova katuka onghatu diva nova ponokela Gibea. Opo nee ove lihanena oshilando ashishe, ndele tava dipaa ovakalimo aveshe neongamukonda.

38 Ovalumenhu Ovaisrael ova udafana novalumenhu, ovo va li va nangela oshilando, ve va ningile edidiliko mokulundumukifa omwifi mombada.

39 Eshi Ovaisrael va alukila kolwoodi, ovalumenhu Ovabenjamin ova hovela oku va ponokela nova dipaa ovalumenhu Ovaisrael 30 lwaapo, ndele tava ti: “Ohatu va findi filufilu ngaashi ashike twa li twe va finda nale.” 40 Moshilando osho omwa li tamu lundumuka omwifi wa yuka pombada, oo u li edidiliko. Eshi Ovabenjamin va piluka va tale, ova mona oshilando ashishe tashi pi po komundilo. 41 Opo nee Ovaisrael ova li va tanauka, ndele tave va ponokele, nOvabenjamin ova li va tila neenghono, molwaashi ova mona kutya oshiponga oshe va hanga. 42 Onghee ova faduka po Ovaisrael va finda moixwa, ashike Ovaisrael ove va shikula. Ovalumenhu, ovo va dja moilando, ove va waimina ve va dipae. 43 Ova li va dingilila Ovabenjamin nove va taataa nopehe na olufuwo. Ove va finda filufilu popepi naGibea, kombinga yokoushilo. 44 Xuuninwa, Ovabenjamin 18 000 ova fya, ovakwaita aveshe ovanaenghono.

45 Ovabenjamin ova piluka, ndele tava faduka po va finda mombuwa kemanya Rimmon, nOvaisrael ova dipaela* 5 000 meendjila odo, nova twikila oku va taataa fiyo okuGidom. Ova ka dipaa natango ovalumenhu 2 000. 46 Ovabenjamin aveshe ovo va dipawa mefiku olo ova li ovalumenhu 25 000 va homata omaongamukonda, ovakwaita aveshe ovanaenghono. 47 Ashike Ovabenjamin 600 ova faduka po va ya mombuwa, kemanya Rimmon, nova kala kemanya olo, Rimmon, oule weemwedi nhee.

48 Ovalumenhu Ovaisrael ova piluka, ndele tava lwifa Ovabenjamin nova dipaa ovo va li moshilando neongamukonda, ovanhu noimuna, nakeshe osho sha li sha xupa mo. Natango, ova xwika po nomundilo oilando aishe omo va enda.