Levitikus

26 “‘Inamu liningila ookalunga vehe na ekwafo lasha, noinamu honga oihongwafano, ile eengudimanya diyapuki, nokamu na okutula oihongwafano yomamanya medu leni, opo mu linyongamene kuyo, molwaashi aame Jehova, Kalunga keni. 2 Omu na okudiinina omashabata ange nomu na okufimaneka* filufilu onhele yange iyapuki. Aame Jehova.

3 “‘Ngeenge omwa twikile okweenda meenghedimhango dange nokudiinina oipango yange noku i wanifa po, 4 ohandi ke mu lokifila odula pefimbo la wapala, nedu otali ka menifa oimeno yalo, nomiti otadi ka ima oiimati yado. 5 Efimbo leni lokuxwa otali i fiyo opefimbo leni lokulikola omandjebele, nefimbo lokulikola omandjebele otali i fiyo opefimbo lokukuna; otamu ka lya omungome weni fiyo mwa kuta notamu ka kala medu leni mwa amenwa. 6 Ohandi ka kaleka ombili medu leni, notamu ka kofa nopehe na oo te mu ningile omatilifo. Medu olo ohandi ka kufa mo oifitukuti oyo ya nyika oshiponga, nokape na oo te ke mu lwifa neongamukonda loita. 7 Otamu ka finda ovatondi veni filufilu, notava ka wila po moipafi yeni keongamukonda. 8 Vatano vomunye otava ka finda 100, nefele lomunye otali ka finda 10 000, ovatondi veni otava ka wila po moipafi yeni keongamukonda.

9 “‘Ohandi ke mu nangeka noupuna nohandi ke mu ningifa mu dalafane noku mu hapupalifa, nohandi ka diinina ehangano lange nanye. 10 Ofimbo tamu li natango oilikolomwa oyo ikulu yomudo wa tetekela, omwa pumbwa okukufa mo oyo ikulu meemhungulilo, opo mu dule okuya oyo ipe. 11 Ohandi ka tula etwalihangano lange mokati keni, noitandi* mu ekeleshi. 12 Ohandi ka kala mokati keni, nokuninga Kalunga keni, nanye otamu ka ninga ovanhu vange. 13 Aame Jehova, Kalunga keni, oo e mu kufa mo medu laEgipiti, opo muha kale vali ovapika vavo, nonda teya ondjoko yeni youpika, ndele handi mu ningi mu ende mwa yelula omitwe deni pombada.*

14 “‘Ashike ngeenge itamu pwilikine kwaame, ile itamu diinine oipango aishe ei, 15 nongeenge omwa ekeleshi eenghedimhango dange, nongeenge omwa* tondo omatokolo ange, opo muha diinine oipango yange aishe nokunyona ehangano lange, 16 ohandi ke mu ningila oinima ei: Ohandi ke mu handukila moku mu etela oudjuu, o-TB noshidu shidjuu. Omesho eni otaa ka enda taa twika nomalutu eni otaa ka fipatela. Eembuto deni otamu di kunine epwanga, molwaashi ovatondi veni otava ka lya po oikunomwa yeni. 17 Ohandi ke mu ekelashi, notamu ka findwa kovatondi veni, naavo ve mu tonde otave ke mu fininika, notamu ka ya onhapo, nonande kape na oo te mu taataa.

18 “‘Nonande osho inashi mu ningifa mu pwilikine kwaame, ohandi ke mu handukila filufilu luheyali omolwomanyono eni. 19 Ohandi ke mu tulifa po ounhwa weni wa pitilila nohandi ka ningifa eulu leni ngaashi oshivela nosho yo edu leni ngaashi ongopolo. 20 Otamu ka hepeka eenghono deni, molwaashi edu leni itali ka menifa oimeno yalo, nomiti itadi ka ima oiimati.

21 “‘Ngeenge omwa twikile okukala omhinge naame nomwa anye okupwilikina kwaame, ohandi ka hapupalifa ehandukilo leni luheyali omolwomanyono eni. 22 Ohandi ka tuma oifitukuti mokati keni, notai ka lya po ovana veni nosho yo oinamwenyo yeni yopovanhu, nokuninipika omuvalu weni, neendjila deni otadi ka fita po.

23 “‘Ngeenge omwa anye okutambula ko epukululo lange nonande omwa ningilwa oinima oyo, notamu twikile okukala omhinge naame, 24 naame ohandi ka kala omhinge nanye, nohandi ka hapupalifa ehandukilo leni luheyali omolwomanyono eni. 25 Ohandi ka ningifa ovatondi veni ve mu ponokele neongamukonda, opo ndi mu handukile eshi mwa nyona ehangano. Ngeenge omwa ongala moilando yeni, ohandi ka tuma omukifi mokati keni, notamu ka yandjwa momake ovatondi veni. 26 Ngeenge onda hanauna po eemhungulilo* deni domingome,* ovakainhu omulongo otava ka dula ashike okuteleka omingome deni mefiya limwe, notave ke di yeleka, nanye otamu ke di lya, ashike itamu kuta.

27 “‘Ngeenge natango itamu pwilikine kwaame, notamu twikile okukala mu li omhinge naame, 28 itandi ka kala nde mu hokwa nandenande, nohandi ke mu handukila luheyali omolwomanyono eni. 29 Otamu ka lya ombelela yovanamati veni, notamu ka lya ombelela yovanakadona veni. 30 Ohandi ka hanauna po eenhele deni diyapuki dokoikulundudu nohandi ka teyaula po eealtari deni dokutwimina, nohandi ka ongela oimhu yeni kombada yoityanghaukile yoikalunga yeni itondifa,* nohandi* ke mu nyonyodola noku mu fiya po. 31 Ohandi ka yandja oilando yeni i ponokelwe neongamukonda, nohandi ka ningifa eenhele deni diyapuki di hanaunwe po noitandi ka uda edimba liwa* lomayambo eni. 32 Ohandi ka mbuwaleka edu, novatondi veni ovo ve li mo otave ke li tala va kumwa. 33 Ohandi ke mu lihanifila mokati koiwana, nohandi ka ningifa ovatondi veni ve mu lwife neongamukonda; edu leni otali ka mbuwala noilando yeni otai ka hanaunwa po.

34 “‘Pefimbo opo, edu otali ka futila po omashabata alo moule wefimbo alishe olo tali ka kala eputu, ofimbo mu li medu lovatondi veni. Natango, edu otali ka tulumukwa,* molwaashi oli na okufutila po omashabata alo. 35 Moule wefimbo alishe olo tali kala eputu, otali ka tulumukwa, molwaashi kala li la tulumukwa momashabata eshi mwa li mo.

36 “‘Ovo tava ka xupa po, ohandi ka yadifa omitima davo noumbada medu lovatondi vavo, notava ka ya onhapo nokuli nokelinyengo lefo tali pepwa komhepo, ndele tava i onhapo ngaashi omunhu ta i onhapo eongamukonda nokulidenga po nopehe na oo te va taataa. 37 Otave ke lipundula ngaashi ovo tava faduka po eongamukonda, nonande kape na oo te va taataa. Itamu ka dula okukondjifa ovatondi veni. 38 Otamu ka fila mokati koiwana, nedu lovatondi veni otali ke mu pona po. 39 Vamwe vomunye ovo tava ka xupa po otava ka mona oixuna medu lovatondi veni omolwomanyono eni. Otava ka mona oixuna omolwomanyono ooxe. 40 Opo nee otava ka hepaulula omanyono avo nomanyono ooxe nosho yo okuhenoudiinini kwavo, notava ka dimina kutya ova kala vehe fi ovadiinini, eshi va li omhinge naame. 41 Naame kanda li yo nde va hokwa, eshi nde va twala medu lovatondi vavo.

“‘Otashi dulika omitima davo inadi pita etanda* di ninipikwe, ndele tava futile po omanyono avo. 42 Ohandi ka dimbuluka ehangano lange olo nda ninga naJakob, ehangano lange olo nda ninga naIsak, nohandi ka dimbuluka ehangano lange olo nda ninga naAbraham, nohandi ka dimbuluka edu olo. 43 Eshi va li ve liteeka edu, ola li tali futu omashabata alo, nola li la mbuwala, eshi vali vehe mo, nova li tava futu omolwomanyono avo, molwaashi ova anya omatokolo ange noinava* dulika keenghedimhango dange. 44 Kakele koinima aishe ei, ofimbo ve li medu lovatondi vavo, itandi ke ve liteeka po filufilu, ile ndi va ekeleshi fiyo oposhitwa shoku va hanauna po, molwaashi osho otashi nyono ehangano olo nda ninga navo, osheshi aame Jehova, Kalunga kavo. 45 Omolwavo, ohandi ka dimbuluka ehangano olo nda ninga nooxekulululwa, ovo nda kufa medu laEgipiti moipafi yoiwana, opo ndi ulike kutya aame Kalunga kavo. Aame Jehova.’”

46 Odo eenghedimhango, omatokolo neemhango odo Jehova a tula po okupitila muMoses pokati kaye nOvaisrael komhunda yaSinai.