Omafimbo otete
22 Opo nee David okwa ti: “Eli eumbo laJehova, Kalunga kashili, naai oaltari yomaxwikiloyambo Ovaisrael.”
2 Onghee David okwa yandja elombwelo ku ongelwe ovanailongo, ovo hava di medu laIsrael, nokwe va pa oshilonga shokuteta nokuyukililifa omamanya okutunga eumbo laKalunga kashili. 3 David okwa longekida yo oshivela shilaula shihapu neenghono shokuninga eemboxa domivelo nomakandula, ongopolo ihapu neenghono, oyo ya li itai dulu okuyelekwa, 4 nomiti domisederi dihapu unene, molwaashi Ovasidon nOvatirus ova etela David omiti domisederi dihapu neenghono. 5 David okwa tya: “Omonamati wange, Salomo, omunyasha noke na owino,* neumbo, olo tali tungilwa Jehova, oli na okukala la tumbala neenghono, opo efimano newapalo lalo li shiivike koilongo aishe. Onghee ohandi mu ningile omalongekido.” Opo nee David okwa longekida oitungifo ihapu neenghono, ofimbo ina fya.
6 Natango, okwa ifana omonamati waye, Salomo, ndele te mu lombwele a tunge eumbo laJehova, Kalunga kaIsrael. 7 David okwa lombwela omonamati waye, Salomo, a ti: “Onda li nda halelela okutungila edina laJehova, Kalunga kange, eumbo. 8 Ashike ondjovo yaJehova oye uya kwaame, tai ti: ‘Ove owa tilashi ohonde ihapu neenghono, nowa lwa oita inene. Ito ka tunga eumbo lokufimanekifila edina lange, molwaashi owa tilashi ohonde ihapu neenghono moipafi yange, kombada yedu. 9 Tala, oto ka dala omonamati, oo ta ka kala omulumenhu wombili;* ohandi ke mu pa etulumuko, moku mu amena kovatondi vaye aveshe, ovo ve mu dingilila, nedina laye otali ka kala Salomo,* nohandi ka pa Israel ombili netulumuko pefimbo laye. 10 Oye ta ka tunga eumbo lokufimanekifila edina lange. Ota ka ninga omonamati wange, naame ohandi ka ninga xe. Ohandi ka pameka olukalwapangelo louhamba waye fiyo alushe muIsrael.’
11 “Paife, omumwange, Jehova na kale pamwe naave, opo u pondole mokutungila Jehova, Kalunga koye, eumbo, ngaashi ashike a popya shi na sha naave. 12 Jehova ne ku pe eendunge neudeko, ngeenge okwe ku pe eenghonopangelo muIsrael, opo u dule okudiinina omhango yaJehova, Kalunga koye. 13 Opo nee oto ka pondola, ngeenge owa diinine filufilu omaufomhango nomatokolo, oo Jehova a pa Moses e a yandje kOvaisrael. Kala u na ouladi nowa pama. Ino kala wa tila, ile u mbadapale. 14 Onda longa noudiinini ndi longekidile eumbo laJehova oitalenti* yoshingoli 100 000, oitalenti yoshisilveri 1 000 000 nosho yo omuvalu muhapu wongopolo nowoshivela shilaula itau dulu okuyelekwa. Onda longekida yo omiti nomamanya, ashike oto ka weda ko kuyo. 15 Ou li pamwe novalongi vahapu, ovateti vomamanya, ovahongi vomamanya, ovateti vomiti novahongi vomaunghulungu e lili noku lili. 16 Oshingoli, oshisilveri, ongopolo noshivela shilaula itai dulu okuyelekwa. Fikama, ndele to hovele oilonga, na Jehova na kale pamwe naave.”
17 Opo nee David okwa lombwela omalenga aeshe omuIsrael a kwafele omonamati waye, Salomo, a ti: 18 “Mbela Jehova, Kalunga keni, ke li pamwe nanye, noine mu pa etulumuko keembinga adishe? Molwaashi okwa kwafela nge ndi finde ovakalimo vomoshilongo, paife oshilongo oshi li momake aJehova nosho yo oshiwana shaye. 19 Paife tokoleni nomutima weni aushe nomwenyo* weni aushe mu konge Jehova, Kalunga keni, ndele tamu hovele okutunga onhele iyapuki yaJehova, Kalunga kashili, opo mu ete oshikefa shehangano laJehova noilongifo iyapuki yaKalunga kashili keumbo, olo tali tungilwa edina laJehova.”