Habakuk
2 Ohandi ka kala nda fikama ponhele yange yokunangela,
Nohandi ka kala ndi li pohotekuma.
Ohandi kala oupafi ndi tale kutya okwa hala ndi popye shike
Nonokutya ohandi ka nyamukula ngahelipi, ngeenge nda pukululwa.
2 Jehova okwa nyamukula nge, a ti:
“Shanga emoniko noku li takela koipelende la yela,
Opo keshe ou ta lesha ko mokule e shi ninge noupu.*
3 Emoniko otali uya peufwafimbo lalo,
Otali endelele fiyo opexulilo* lalo, noitali ka kala inali uya.
Ngeenge ola kala ko,* kala we li teelela!*
Itali kala inali wanifwa.
Itali shelelelwa!
Ashike omuyuki ota ka kala nomwenyo omolwoudiinini* waye.
5 Oshoshili omaviinyu ohaa ningifa omunhu oinima ii,
Omunhu oo e na ounhwa ita hange elalakano laye.
Iha kuta nandenande noku na efukutu ngaashi ashike Ombila;*
Ngaashi ashike efyo, naye iha wanenwa.
Ota twikile okwoongela oiwana aishe
Note liongelele ovanhu aveshe.
6 Mbela aveshe ovo itave ke mu sheka nomayeletumbulo, omipopyofano neetumbutumbu?
Otava ka tya:
‘Woo kwaao ta nyeke ko osho shihe fi shaye
Nota twikile okuhapupalifa eendjo daye!
Fiyo onaini ta twikile okuninga ngaho?
7 Mbela ovo u na eendjo davo itave ke ku katukila onghatu diva?
Otava ka fikama, ndele tave ku ndjungandjunga nonyanya,
Notave ke ku ninga oshihakanwa ve ku nyeke oinima.
8 Molwaashi owa nyeka oiwana ihapu,
Ovanhu aveshe otave ke ku nyeka,
Molwaashi owa tilashi ohonde yovanhu
Nowa longa oukolokoshi kombada yedu,
Moilando nokovakalimo.
9 Woo kwaao ta likolele eumbo laye emona la dja moukolokoshi,
Opo a tungile oshihadi shaye pombada,
Opo a henuke okuhangika komupya!
10 Owa fifa eumbo loye ohoni.
Eshi wa hanauna po ovanhu vahapu, owe lietela enyono ove mwene.*
11 Osheshi emanya otali ka kuwa okudja kekuma,
Noiti oyo ya tungifwa moshihokohoko* sheumbo otai ke li nyamukula.
12 Woo kwaao ta tileshi ohonde, opo a tunge oshilando,
Naao te shi tungu shihe li pauyuki!
13 Tala, mbela ke fi Jehova womatangakwaita, oo a ningifa ovanhu va longe noudiinini oshilando osho tashi ka pya po komundilo,
Noiwana i lilolole epwanga?
14 Edu otali ka yadifwa eshiivo lokushiiva efimano laJehova,
Ngaashi omeva a tuvikila efuta.
15 Woo kwaao ta pe ookaume kaye sha shokunwa,
Ta weda ko kefulakato nokehandu, e va kolwife,
Opo a tale epenge lavo!
16 Ponhele yokufimanekwa, oto ka fifwa ohoni filufilu.
Naave oto ka nwa, noto ka ulika epenge loye nonokutya ino pita etanda.*
Jehova ote ke ku nwefa meholo olo li li kolulyo laye,
Noto ka fifwa ohoni ponhele yokufimanekwa;
17 Oukolokoshi oo wa longwa muLibanon otau ke ku hanga,
Nehanauno olo la li la tilifa oilyani otali ke ku hanga,
Molwaashi owa tilashi ohonde yovanhu
Nowa longa oukolokoshi kombada yedu,
Moilando nokovakalimo.
18 Oshihongwafano osho sha hongwa komunhu
Oshi na ekwafo lashike?
Oshikalunga shoshivela* nomuhongi omunaipupulu oi na ekwafo lashike,
Nonande oo e shi honga okwe shi lineekela,
Ta ningi oikalunga ihe na ekwafo lasha noihai popi?
19 Woo kwaao ta lombwele oshiti ta ti, “Kala oupafi!”
Ile ta ti kemanya olo ihali popi, “Penduka! Tu pa omalombwelo!”
Tala, ola vaekwa noshingoli noshisilveri,
Nomulo kamu na omufudo nandenande.
20 Jehova oku li motembeli yaye iyapuki.
Edu alishe nali kale la mwena moipafi yaye!’”