Exodus
21 Ou na oku va lombwela eemhango edi:
2 “Ngeenge owa lande omupika Omuheberi, ota ka longa e li omupika oule womido hamano, ashike momudo omutiheyali, ota ka mangululwa nopehe na ofuto yasha. 3 Ngeenge okwe u yile oye aeke, ota ka ya oye aeke. Ngeenge omulumenhu okwe uyile nomukulukadi, omukulukadi waye oku na okuya naye. 4 Ngeenge omwene waye okwe mu pa omukulukadi, ndele omukulukadi te mu dalele ovamati noukadona, omukulukadi oo nounona vaye otava ningi vomwene waye, nomupika oo ota ka ya oye aeke. 5 Ndele ngeenge omupika oo okwa kala ta kondjifa kutya, ‘Ondi hole omwene wange, omukulukadi wange novana vange; inandi hala okumangululwa,’ 6 omwene waye oku na oku mu eta koshipala shaKalunga kashili. Opo nee oku na oku mu eta a yaamene pomuvelo, ile pongudi yomuvelo, nomwene waye ote ke mu tyuula mokutwi nonhisho, nota kala omupika waye onghalamwenyo yaye aishe.
7 “Ngeenge omunhu okwa landifa po omonakadona waye e li omupika, ita ka mangululwa ngaashi omulumenhu omupika ta mangululwa. 8 Ngeenge omwene wokakadona oko okapika ine ka hokwa vali noina hala ka ninge omukulukadi waye wopomunghulo, ndele okwa hala e ka landife po kuumwe e lili,* ke na oufemba woku ka landifa po kovanailongo, molwaashi okwe ka kengelela. 9 Ngeenge okwe ka kongele omonamati waye, oku na okuungaunga nako ngaashi okamonakadona kaye. 10 Ngeenge okwe likufile vali omukulukadi umwe, ke na okweefa po okupa omukulukadi waye wotete oikulya, oikutu nosho yo okunangala naye. 11 Ngeenge ite mu ningile oinima aishe oyo yopatatu, omukulukadi na ye ashike nopehe na ofuto yasha.
12 “Keshe oo ta denge omunhu, ndele ta fi, oku na okudipawa. 13 Ndele ngeenge ine shi ningila owina, na Kalunga kashili okwa efa shi ningwe, ohandi ke mu ulikila onhele oko ta dulu okuya onhapo. 14 Ngeenge omunhu okwa handukile mukwao neenghono, ndele te mu dipaele owina, omunhu oo oku na okufya, nonande owe mu kufa koaltari yange. 15 Ou ta denge xe, ile ina oku na okudipawa.
16 “Keshe oo ta kwata po omunhu ombabyona, ndele te mu landifa po, ile a hangika e mu kwete, oku na okudipawa.
17 “Keshe oo ta fingi* xe, ile ina oku na okudipawa.
18 “Eshi osho shi na okuningwa po, ngeenge ovalumenhu tava tanguna, ndele umwe ta denge mukwao nemanya, ile nongonyo,* ndele ina fya, ashike okwa mona oshiponga nokukala a nangala momutala waye: 19 Ngeenge ota dulu okufikama nokweendaenda pondje, ta endele kodibo, ou e mu denga oku na okumanguluka ko kehandukilo olo. Oku na ashike okufuta efimbo olo oo a mona oshiponga a kala ita dulu okulonga, fiyo osheshi a veluka filufilu.
20 “Ngeenge omulumenhu okwa denge noshiti omupika waye omulumenhu, ile omupika waye okakadona, ndele ta fi eshi e mu denga neke laye, omulumenhu oo oku na okuhandukilwa. 21 Ashike ngeenge okwa kala nomwenyo oule wefiku limwe, ile avali, omwene waye ke na okuhandukilwa, molwaashi okwe mu landa noimaliwa yaye.
22 “Ngeenge ovalumenhu tava lu, ndele tava ngwadjula omukulukadi e na eteelelo, ndele ta mono okaana eteelelo inali fika,* ashike ye, ile okaana inaka fya,* ou e mu ngwadjula oku na okufuta oshinima shi fike pwaasho ta pulwa komushamane womukulukadi oo. Oifuta oyo oku na oku i yandja she likolelela ketokolo lovatokoli. 23 Ndele ngeenge umwe womuvo okwa fi, ou na okuyandja omwenyo omomwenyo, 24 eisho omeisho, eyoo omeyoo, eke omeke, omhadi omomhadi, 25 okuxwika omokuxwikwa, oshipute omoshipute, ombole omombole.
26 “Ngeenge omunhu okwa denge omupika waye omulumenhu, ile omupika waye okakadona keisho, ndele eisho tali twike, oku na okumangulula omupika nokufuta eisho laye. 27 Ngeenge okwa denge mo eyoo lomupika waye omulumenhu, ile lomupika waye okakadona, oku na okumangulula omupika nokufuta eyoo laye.
28 “Ngeenge ongobe yomhedi oya tu omulumenhu, ile omukainhu, ndele ta fi, omhedi oyo oi na okudipawa nomamanya, nombelela yayo kai na okuliwa. Ashike mwene womhedi oyo okwa manguluka ko kehandukilo. 29 Ndele ngeenge omhedi oyo oya kala hai tu ovanhu, na mwene wayo okwa kala ha londwelwa, ashike ihe i pashukile, ndele tai dipaa omulumenhu, ile omukainhu, omhedi oyo oi na okudipawa nomamanya namwene wayo oku na yo okudipawa. 30 Ngeenge okwa pulwa oikulila,* oku na okuyandja ofuto ya yeleka omwenyo waye, ashishe osho a pulwa. 31 Kutya nee oya tu omumati, ile okakadona, mwene wayo oku na okuningilwa osho sha tokolwa kovatokoli. 32 Ngeenge ongobe yomhedi oya tu omupika omulumenhu, ile okakadona, ota futu eesekeli 30* kumwene womupika, nomhedi oyo oi na okudipawa nomamanya.
33 “Ngeenge omulumenhu okwa tuula kelambo, ile a fa elambo, noine li tuvika, ndele tamu wile ongobe yomhedi, ile ondongi, 34 mwene welambo olo oku na okufuta. Oku na okufuta ondado kumwene woshinamwenyo osho, noshinamwenyo osho sha fya oshi na okuninga shaye. 35 Ngeenge ongobe yomhedi yaumwe oya monifa oshiponga omhedi ikwao, ndele tai fi, ove na okulandifa po omhedi oyo i na omwenyo nokutukula oimaliwa oyo va landifa, nomhedi oyo ya fya ove na yo oku i tukula. 36 Ile ngeenge omhedi oya li ya shiivikila okutwana, ashike mwene wayo ina kala te i pashukile, oku na okufuta ongobe yomhedi momhedi, naayo ya fya oi na okuninga yaye.