Eehamba dotete
16 Ondjovo yaJehova tai popi kombinga yaBaasha, oye uya kuJehu, omonamati waHanani, tai ti: 2 “Onde ku kufa poluhepo,* ndele handi ku ningi omuwiliki woshiwana shange Israel, ashike owa kala nokweenda mondjila yaJerobeam, nowa ningifa oshiwana shange Israel shi nyone, nosha nyematifa nge omolwomanyono asho. 3 Ohandi ka komba po filufilu Baasha neumbo laye, nohandi ka ninga eumbo laye ngaashi eumbo laJerobeam, omonamati waNebat. 4 Keshe umwe womeumbo laBaasha, oo ta file moshilando, ota ka lika po keembwa; nakeshe oo ta ka fila mofuka ota ka lika po keedila dokeulu.”
5 Ondjokonona aishe yaBaasha, osho a ninga nosho yo eenghono daye, mbela inai shangwa membo londjokonona yopefimbo leehamba daIsrael? 6 Opo nee Baasha okwa nangekwa pooxekulululwa, nokwa pakwa muTirsa, nomonamati waye, Ela, okwa ninga ohamba ponhele yaye. 7 Natango, Jehova okwa popya shi na sha naBaasha neumbo laye, okupitila momuprofeti Jehu, omonamati waHanani, omolwowii aushe oo a ninga momesho aJehova, moku mu nyemateka noilonga yomake avo, nova ninga ngaashi eumbo laJerobeam, nomolwaasho e mu* dipaa.
8 Momudo omuti-26 wepangelo laAsa, ohamba yaJuda, Ela, omonamati waBaasha, okwa ninga ohamba yaIsrael muTirsa, nokwa pangela oule weedula mbali. 9 Omupiya waye, Simri, ondjai yetata letangakwaita, olo hali lu nomatemba oita, okwe mu enda medu, ofimbo a li muTirsa ta nu ta kolwa, meumbo laArsa, oo a li ha pashukile eumbo laye muTirsa. 10 Simri okwe uya mo nokwe mu ponokela, ndele te mu dipaa momudo omuti-27 wepangelo laAsa, ohamba yaJuda, nokwa ninga ohamba ponhele yaye. 11 Eshi a ninga ohamba, diva ashike eshi a kala omutumba kolukalwapangelo laye, okwa dipaa eumbo alishe laBaasha. Ina xupifa po nande omulumenhu,* kutya nee omupambele* waye, ile okaume kaye. 12 Kungaho, Simri okwa hanauna po eumbo alishe laBaasha, metwokumwe nondjovo oyo Jehova a popya kombinga yaBaasha okupitila momuprofeti Jehu. 13 Osho osha ningwa omolwomanyono aeshe oo Baasha nomonamati waye, Ela, va nyona, nova ningifa Ovaisrael va nyone mokuhandukifa Jehova, Kalunga kaIsrael, omolwoikalunga yavo ihe na ekwafo lasha. 14 Ondjokonona aishe yaEla, ashishe osho a ninga, mbela inai shangwa membo londjokonona yopefimbo leehamba daIsrael?
15 Momudo omuti-27 wepangelo lohamba yaJuda, Asa, Simri okwa ninga ohamba oule womafiku aheyali muTirsa, ofimbo omatangakwaita a li a onga onhanda muGibbeton, osho sha li shOvafilisti. 16 Mokweendela ko kwefimbo, eshi omatangakwaita a li a onga onhanda, okwa uda taku tiwa: “Simri okwa enda ohamba medu, ndele te i dipaa.” Mefiku olo, Ovaisrael aveshe monhanda ova hoolola Omri, ondjai yetangakwaita, a ninge ohamba yaIsrael. 17 Omri nOvaisrael aveshe, ovo va li pamwe naye, ova dja mo muGibbeton, ndele tava ka nangela Tirsa. 18 Eshi Simri a mona kutya oshilando osha kwatwa ko, okwa ya moshungongulu ya pama, yeumbo* lohamba, nokwe lixwikila meumbo, ndele ta fi. 19 Osho osha ningwa omolwenyono olo a ninga, eshi a ninga osho shii momesho aJehova mokweenda mondjila yaJerobeam nokwa ningifa Israel shi nyone. 20 Ondjokonona aishe yaSimri, eshi a li a enda medu Ela, mbela inai shangwa membo londjokonona yopefimbo leehamba daIsrael?
21 Onghee Ovaisrael ova li va tukulwa meengudu dopavali. Ongudu imwe oya shikula Tibni, omonamati waGinat, ya hala oku mu ninga ohamba, ofimbo ongudu ikwao ya shikula Omri. 22 Ashike ovanhu ovo va li tava shikula Omri ova finda ovanhu ovo va li tava shikula Tibni, omonamati waGinat. Onghee Tibni okwa fya, na Omri oye a li a ninga ohamba.
23 Momudo omuti-31 wepangelo laAsa, ohamba yaJuda, Omri okwa ninga ohamba yaIsrael, nokwa pangela oule weedula 12. MuTirsa okwa pangela mo oule weedula hamano. 24 Okwa landa omhunda yaSamaria kuSemer koitalenti* ivali yoshisilveri, ndele ta tungu oshilando komhunda. Oshilando osho a tunga okwe shi luka Samaria,* e shi lukila Semer, oo a li mwene womhunda. 25 Omri okwa kala nokulonga osho shii momesho aJehova, nokwa longa owii muhapu u dule oo wa longwa kwaaveshe ovo ve mu tetekela. 26 Okwa enda meendjila adishe daJerobeam, omonamati waNebat, nokwa ningifa Ovaisrael va nyone mokuhandukifa Jehova, Kalunga kaIsrael, omolwoikalunga yavo ihe na ekwafo lasha. 27 Ondjokonona aishe yaOmri, osho a ninga nosho yo oilonganghono yaye, mbela inai shangwa membo londjokonona yopefimbo leehamba daIsrael? 28 Opo nee Omri okwa nangekwa pooxekulululwa, nokwa pakwa muSamaria. Omonamati waye, Ahab, okwa ninga ohamba ponhele yaye.
29 Ahab, omonamati waOmri, okwa ninga ohamba yaIsrael momudo omuti-38 wepangelo laAsa, ohamba yaJuda, na Ahab, omonamati waOmri, okwa pangela Israel muSamaria oule weedula 22. 30 Ahab, omonamati waOmri, okwa ninga osho shii momesho aJehova e dule aveshe ovo ve mu tetekela. 31 Ka li e wete sha wana, eshi a nyona mokushikula omanyono aJerobeam, omonamati waNebat. Onghee okwe likufila vali Isabel, omonakadona waEtbaal, ohamba yOvasidon, ndele ta hovele okulongela Baal nokulinyongamena kuye. 32 Natango, okwa tungila Baal oaltari keumbo* laBaal, olo a tunga muSamaria. 33 Ahab okwa ninga yo opala iyapuki,* a longa owii muhapu nokwa nyematifa Jehova, Kalunga kaIsrael, e dulife eehamba adishe daIsrael odo de mu tetekela.
34 Pefimbo olo Ahab a li ta pangele, Hiel, Omubetel, okwa tungulula Jeriko. Eshi a dika po ekanghameno lasho, okwa filwa omonamati waye woshiveli, Abiram, naashi a tula po omivelo dasho, okwa filwa onghelo yaye, Segub, metwokumwe neendjovo odo Jehova a popya okupitila muJosua, omonamati waNun.