Eehamba eenhivali
12 Momudo omutiheyali wepangelo laJehu, Joas okwa ninga ohamba, nokwa pangela muJerusalem oule weedula 40. Edina laina oSibia, a dja kuBer-seba. 2 Joas okwa twikila okulonga osho sha yuka momesho aJehova efimbo alishe olo omupristeri Jehoiada a kala te mu wilike. 3 Ashike eenhele dokoikulundudu kada li da hanaunwa po, novanhu ova li natango tava yambele keenhele dokoikulundudu nokutwimina ko omayambo.
4 Joas okwa lombwela ovapristeri, a ti: “Kufeni oimaliwa aishe, oyo ya etwa keumbo laJehova, i li omayambo mayapuki, oimaliwa oyo ovapristeri hava pewa kovanhu, ovo va ninga eano, oimaliwa oyo i na okuyandjwa i fike pwaayo ya tengenekelwa ongushu yomunhu,* noimaliwa aishe oyo keshe umwe a yandja tashi di komutima keumbo laJehova. 5 Ovapristeri ohave i kufa kwaavo ve i eta,* ndele tave i longifa okuwapekulula eumbo, keshe opo pa nyonauka.”*
6 Ovapristeri kava li natango va wapekulula eumbo opo la nyonauka, fiyo omomudo omuti-23 wepangelo laJoas. 7 Onghee ohamba Joas oya ifana omupristeri Jehoiada novapristeri vakwao, ndele tai va pula, tai ti: “Omolwashike inamu wapekulula eumbo opo la nyonauka? Onghee hano, inamu kufa vali oimaliwa kuvakweni, okuninga tai longifwa mokuwapekululifa otembeli.” 8 Ovapristeri ova li va dimina okuhakufa vali oimaliwa kovanhu nosho yo okuhakala noshinakuwanifwa shokuwapekulula eumbo.
9 Omupristeri Jehoiada okwa kufa okakefa, ndele te ka tu ombululu moshituviko, nokwe ka tula popepi noaltari, ka ama kombinga yokolulyo lomunhu oo a finda meumbo laJehova. Ovapristeri, ovo ve li ovapashukili vopoivelo, omo hava tula oimaliwa aishe oyo ya etwa keumbo laJehova. 10 Ngeenge ova mono kutya mokakefa omu na oimaliwa ihapu, hamushanga wohamba nomupristeri munene ohave uya, ndele tave i kufa mo* nokuvalula oimaliwa aishe oyo ya etwa keumbo laJehova. 11 Ohava yandje oimaliwa oyo ya valulwa kwaavo va tulwa po va pashukile oilonga, oyo tai longwa meumbo laJehova. Opo nee ohave i futu ovateti vomiti, ovatungi ovo tava longo keumbo laJehova, 12 ovanhu ovo ve na ounghulungu mokuteta nosho yo ovahongi vomamanya. Ova landa yo omiti nomamanya a hongwa okuwapekulula eumbo laJehova. Ova longifa oimaliwa aishe moilonga ikwao yokuwapekulula eumbo, keshe opo pa nyonauka.
13 Ashike oimaliwa, oyo ya etwa keumbo laJehova, inai longifwa nande mokuninga oiyaxa yoshisilveri, oidimifo yomundilo, ouyaxa, omanghuma, ile oinima yoshingoli noyoshisilveri yomeumbo laJehova. 14 Ove i yandja ashike kwaavo va longa oilonga, nove i longifa mokuwapekulula eumbo laJehova. 15 Itava ka kala vali tava pula ovalumenhu ovo va pewa oimaliwa, opo ve i yandje kovanailonga, molwaashi ova li ovalineekelwa. 16 Ashike oimaliwa yelivelombediyambo noyetimbayambo kaya li hai etwa keumbo laJehova, ndele oya li hai ningi yovapristeri.
17 Opo nee Hasael, ohamba yaSiria, okwa ya a ka lwife Gat, ndele te shi kwata ko. Konima yaasho, okwa li a tokola oku ka lwifa* Jerusalem. 18 Joas, ohamba yaJuda, okwa kufa omayambo aeshe mayapuki oo xekulululwa Josafat, Jehoram naAhasia, eehamba daJuda, va yapula, omayambo aye mayapuki noshingoli ashishe, osho sha li meemhungulilo domeumbo laJehova nosho yo meumbo* lohamba, ndele te i tumine Hasael, ohamba yaSiria. Onghee ina ka lwifa vali Jerusalem.
19 Ondjokonona aishe yaJoas, ashishe osho a ninga, mbela inai shangwa membo londjokonona yopefimbo leehamba daJuda? 20 Ashike ovapiya vaJoas ova waimina momhangela yoku mu ponokela, ndele tave mu dipaele meumbo lokoshikulundudu,* mondjila oyo ya finda kuSilla. 21 Ovapiya vaye, Josakar, omonamati waSimeat, naJosabad, omonamati waSomer, ovo ve mu denga, ndele tave mu dipaa. Ove mu paka pooxekulululwa, mOshilando shaDavid, nomonamati waye, Amasia, okwa ninga ohamba ponhele yaye.