Hesekiel
40 Momudo omuti-25 woukwatwa wetu, pehovelo lomudo, mefiku etimulongo lomwedi, momudo omuti-14, konima eshi oshilando sha teka po, mefiku tuu olo, eke laJehova ola li kombada yange, ndele ta twala nge koshilando. 2 Kalunga okwa twala nge kedu laIsrael okupitila momamoniko, nokwa tula nge komhunda ileile, oko kwa li ku na omutungilo wa fa woshilando kombinga yokolukadi.
3 Eshi a twala nge oko, onda mona omulumenhu e na eholokepo la fa longopolo. Okwa li e na meke laye ongodi ya longwa momundele nosho yo olumbungu lokuyelekifa,* nokwa li a fikama moshivelo. 4 Omulumenhu okwa tya kwaame: “Omona womunhu, tala nawa, pwilikina nawa nokuyandja elitulemo* kwaashishe osho handi ku ulikile, osheshi osho wa etelwa oku. Lombwela eumbo laIsrael ashishe osho wa mona.”
5 Onda mona ekuma la dingilila otembeli.* Meke lomulumenhu omwa li olumbungu lokuyelekifa li na oule womukokomoko womaludimbo ahamano (koludimbo keshe okwa wedwa omutamo weke).* Okwa hovela okuyeleka ekuma, nounene* walo owa li olumbungu limwe, noule wopombada walo owa li olumbungu limwe.
6 Opo nee okwe uya koshivelo, osho sha taalela koushilo, ndele ta londo keetalapa dasho. Eshi a yeleka oshikulo shoposhi yoshivelo, omutamo washo owa li olumbungu limwe, nomutamo woshikulo shoposhi shikwao owa li yo olumbungu limwe. 7 Okanduda keshe komunangeli oka li ke na oule womukokomoko wolumbungu limwe nosho yo ounene wolumbungu limwe, nopa li omaludimbo atano pokati kounduda vovanangeli. Oshikulo shoposhi yoshivelo, osho shi li popepi nokanduda kokufikila, osho sha taalela meni, osha li shi fike polumbungu limwe.
8 Okwa yeleka okanduda kokufikila koposhivelo shomeni, noka li ke na olumbungu limwe. 9 Opo nee okwa yeleka okanduda kokufikila koposhivelo, oko ka li ke na omaludimbo ahetatu; nokwa yeleka eengudi dako domomunghulo, odo da li di na omaludimbo avali; nokanduda kokufikila koposhivelo oka li ka taalela ombinga yomeni.
10 Opa li ounduda vovanangeli vatatu kombinga keshe yokoshivelo shokoushilo. Ounduda ovo vatatu ova li ve fike pamwe, neengudi odo di li momunghulo kombinga keshe oda li di fike pamwe.
11 Opo nee okwa yeleka ounene wokomesho yoshivelo, oo wa li omaludimbo 10; noule woshivelo owa li omaludimbo 13.
12 Onhele, oyo i li komesho younduda vovanangeli keembinga adishe, oya li i na oludimbo limwe. Ounduda vovanangeli keembinga adishe ova li ve na omaludimbo ahamano keshe kamwe.
13 Opo nee okwa yeleka oshivelo okudja pombada yokanduda keshe komunangeli* fiyo opombada yakakwao, nosha li shi na omaludimbo 25 mounene; oshivelo shimwe osha li sha taalelafana noshivelo shikwao. 14 Opo nee okwa yeleka eengudi domomunghulo, odo da li di na oule wopombada womaludimbo 60 nosho yo eengudi domomunghulo dopoivelo, oyo ya dingilila omukala. 15 Okudja komesho yoshivelo fiyo okomesho yokanduda kokufikila meni loshivelo, opa li pe na omaludimbo 50.
16 Opa li omakende ounduda vovanangeli, oo haa andjuka ombinga imwe, ofimbo ikwao hai kala inini, ngeenge taa yeululwa,* neengudi donduda domomunghulo oda li meni loshivelo keembinga adishe. Meni lounduda vokufikila omwa li yo omakende kombinga keshe, nokeengudi domomunghulo okwa li kwa fanekwa omafano omilunga.
17 Opo nee okwa eta nge momukala wokondje, nonda mona eenduda* dokulila nosho yo okalupanda ka dingilila omukala. Opa li eenduda 30 dokulila pokalupanda. 18 Okalupanda, oko ke li kombinga yomivelo, oka li ke na oule u fike pwaao womivelo . . . aka oka li okalupanda kopedu.
19 Opo nee okwa yeleka oshinano* okudja komesho yoshivelo osho shi li pedu fiyo oponhele oyo ya dingilila omukala womeni. Osha li shi na omaludimbo 100 koushilo nosho yo kolundume.
20 Omukala wokondje owa li u na oshivelo sha taalela kolundume, nokwa yeleka oule washo nosho yo omutamo washo. 21 Opa li ounduda vatatu vovanangeli kombinga keshe. Eengudi davo domomunghulo nosho yo okanduda kokufikila oya li i fike pamwe noshivelo shotete. Oda li di na oule womukokomoko womaludimbo 50 nosho yo ounene womaludimbo 25. 22 Omakende ao, okanduda kao kokufikila nosho yo omafano ao omilunga oya li i fike pamwe naayo yokoshivelo shokoushilo. Ovanhu ova li hava i ko tava londo eetalapa heyali, nokanduda kao kokufikila oka li komesho yado.
23 Meni lomukala womeni omwa li oshivelo sha taalelafana noshivelo shokolundume nosho yo shimwe sha taalelafana noshivelo shokoushilo. Okwa yeleka oshinano okudja koshivelo shimwe fiyo okushikwao, nopa li pe na omaludimbo 100.
24 Opo nee okwa twala nge lwokolukadi, nonda mona oshivelo kombinga yokolukadi. Okwa yeleka eengudi domomunghulo washo nosho yo okanduda kokufikila kasho, noya li i fike pamwe naikwao. 25 Opa li omakende kombinga keshe yasho nosho yo okanduda kokufikila kasho, ngaashi omakende makwao. Osha li shi na oule womukokomoko womaludimbo 50 nosho yo ounene womaludimbo 25. 26 Opa li eetalapa heyali da yuka kusho, nokanduda kasho kokufikila oka li komesho yado. Nosha li shi na omafano omilunga keengudi dasho odo di li momunghulo, imwe kombinga keshe.
27 Omukala womeni owa li u na oshivelo sha taalela kolukadi; okwa yeleka okudja koshivelo shimwe, fiyo okushikwao kombinga yokolukadi, nopa li oshinano shomaludimbo 100. 28 Opo nee okwa eta nge momukala womeni okupitila koshivelo shokolukadi; eshi a yeleka oshivelo shokolukadi, osha li shi fike pwiikwao. 29 Ounduda vasho vovanangeli, eengudi dasho domomunghulo nosho yo okanduda kasho kokufikila oya li i fike pwiikwao. Opa li omakende kombinga keshe yasho nosho yo okanduda kokufikila kasho. Osha li shi na oule womaludimbo 50 nosho yo ounene womaludimbo 25. 30 Ounduda vokufikila voivelo aishe ova li ve na oule womukokomoko womaludimbo 25 nounene womaludimbo 5. 31 Okanduda kasho kokufikila oka li ka taalela omukala wokondje, nokeengudi dasho domomunghulo okwa li omafano omilunga, nopa li eetalapa hetatu da yuka kusho.
32 Eshi a eta nge momukala womeni okudja koushilo, okwa yeleka oshivelo, nosha li shi fike pwiikwao. 33 Ounduda vao vovanangeli, eengudi dao domomunghulo nosho yo okanduda kao kokufikila oya li i fike pwiikwao, nopa li omakende kombinga keshe yao nosho yo okanduda kokufikila kao. Owa li u na oule womukokomoko womaludimbo 50 nosho yo ounene womaludimbo 25. 34 Okanduda kao kokufikila oka li ka taalela omukala wokondje, nokeengudi dao adishe domomunghulo okwa li omafano omilunga, nopa li eetalapa hetatu da yuka kuo.
35 Opo nee okwa eta nge koshivelo shokolundume, nokwe shi yeleka; osha li shi fike pwiikwao. 36 Ounduda vasho vovanangeli, eengudi dasho domomunghulo nosho yo okanduda kasho kokufikila oya li i fike pwiikwao. Osha li shi na omakende kombinga keshe. Osha li shi na oule womukokomoko womaludimbo 50 nosho yo ounene womaludimbo 25. 37 Eengudi dasho domomunghulo oda li da taalela omukala wokondje, nokeengudi dasho adishe domomunghulo okwa li omafano omilunga, nopa li eetalapa hetatu da yuka kusho.
38 Onduda yokulila nosho yo oshivelo shayo oya li popepi neengudi domomunghulo woivelo, oko kwa li haku koshelwa omaxwikiloyambo aeshe.
39 Opa li oitaafula ivali kombinga keshe yokanduda kokufikila koposhivelo, oko haku dipaelwa omaxwikiloyambo aeshe, omatimbayambo nosho yo elivelombediyambo. 40 Mondjila, oyo ya yuka koshivelo shokolundume, omwa li oitaafula ivali kondje yoshivelo. Opa li yo oitaafula ivali kombinga ikwao yokanduda kokufikila koposhivelo. 41 Opa li oitaafula ine kombinga keshe yoshivelo, aishe kumwe oya li oitaafula ihetatu, oko kwa li haku dipaelwa omayambo. 42 Oitaafula ine yomaxwikiloyambo aeshe oya li ya longwa momamanya a hongwa. Oya li i na oule womukokomoko woludimbo limwe netata, nounene woludimbo limwe netata nosho yo oule wopombada woludimbo limwe. Kuyo okwa li haku tenhekwa oinima, oyo hai longifwa okudipaa omaxwikiloyambo nosho yo omayambo makwao. 43 Eelaka, di na ounene womutamo weke limwe, oda li da tulwa mo da dingilila omakuma omeni; nombelela yeeshaliyambo oya li hai tulwa poitaafula.
44 Pondje yoshivelo shomeni opa li eenduda dokulila dovaimbi; oda li momukala womeni, popepi noshivelo shokolundume, da taalela kolukadi. Opa li vali onduda yokulila, popepi noshivelo shokoushilo, ya taalela kolundume.
45 Okwa tya kwaame: “Onduda ei yokulila ya taalela kolukadi oyovapristeri ovo ve na oshinakuwanifwa shokuyakula motembeli. 46 Onduda yokulila oyo ya taalela kolundume oyovapristeri ovo ve na oshinakuwanifwa shokuyakula koaltari. Ove li ovanamati vaSadok, ovo va dja mOvalevi, ovo va nangekwa po va holoke koshipala shaJehova va longe oilonga yaye.”
47 Opo nee okwa yeleka omukala womeni. Owa li u na oule womukokomoko womaludimbo 100, nounene womaludimbo 100, eembinga nhee di fike pamwe. Oaltari oya li komesho yotembeli.
48 Opo nee okwa eta nge meni lokanduda kokufikila kotembeli, nokwa yeleka ongudi yomomunghulo yokanduda kokufikila, noya li i na omaludimbo atano kombinga imwe nosho yo omaludimbo atano kombinga ikwao. Omutamo woshivelo owa li u na omaludimbo atatu kombinga imwe nosho yo omaludimbo atatu kombinga ikwao.
49 Okanduda kokufikila oka li ke na oule womukokomoko womaludimbo 20 nosho yo ounene womaludimbo 11.* Ovanhu ova li hava i ko tava londo eetalapa. Opa li eengudi momunghulo, imwe kombinga keshe.