Rut
1 Eshi ovatokolipangeli va li tava pangele, moshilongo omwa li mwe uya ondjala. Omulumenhu umwe nomukulukadi waye novanamati vavo vavali, ovo va dja muBetlehem shomuJuda, ova li va ya va ka kale ovanailongo koshitukulwa shaMoab. 2 Edina lomulumenhu oo oElimelek,* nedina lomukulukadi waye oNaomi.* Ovanamati vavo vavali ova li Mahlon* naKilion.* Ova li hava di muBetlehem Efrat shomuJuda. Ova li va ya koshitukulwa shaMoab, naako oko va kala hava di.
3 Lwanima, Elimelek okwa ka fya, ndele Naomi ta fyaala po novanamati vaye vavali. 4 Mokweendela ko kwefimbo, ovanamati vaye ova ka hombola ovakainhu Ovamoab; edina laumwe ola li Orpa nolamukwao ola li Rut. Koshilongo oko ova kala ko oule womido omulongo lwaapo. 5 Lwanima, ovanamati vaNaomi vavali, Mahlon naKilion, ova ka fya, noka li vali e na omushamane novanamati. 6 Okwa li a tokola okudja mo muMoab pamwe noitenya yaye, osheshi okwa li a uda kutya Jehova okwa dimbuluka oshiwana shaye nokwe shi pa omungome.*
7 Okwa dja ko konhele oko a li ha di noitenya yaye. Ofimbo va li mondjila tava shuna kuJuda, 8 Naomi okwa lombwela oitenya yaye a ti: “Indeni, shuneni, keshe umwe naye keumbo laina. Jehova ne mu ulikile ohole i na oudiinini, ngaashi oyo mwa ulikila nge nomwa ulikila ovashamane veni. 9 Jehova ne mu kwafele mu mone ovashamane, opo mu kale mwa tulumukwa.”* Opo nee Naomi okwe va xupita, ndele tava hovele okulila mokule. 10 Ova kala tave mu lombwele tava ti: “Ahowe, otwa hala okuya naave koshiwana sheni.” 11 Naomi okwa tya kuvo: “Ovamwange, shuneni. Omolwashike mwa hala okuya naame? Itandi dulu vali okudala ovamati ve mu hombole po. 12 Ovamwange, shuneni. Indeni, osheshi ame onda kulupa; itandi dulu vali okuhombolwa. Ndele nande ondi mone omushamane oufiku wonena, ndele handi dala ovamati, 13 mbela otamu dulu okukala mwe va teelela fiyo osheshi va kula? Mbela otamu ka anya okuhombolululwa omolwavo? Ahowe, ovamwange, onda nyika oluhodi omolweni, osheshi Jehova okwa handukila nge.”*
14 Natango ova lila mokule, opo nee Orpa okwa xupita inamweno, ndele ta i. Ashike Rut okwa tokola okukala nainamweno. 15 Naomi okwa tya kuye: “Hautenya mukweni okwa shuna koshiwana shavo nokookalunga kavo. Shuna nahautenya mukweni.”
16 Rut okwa ti: “Ino lombwela nge vali ndi ku fiye po, ndiha ye naave; osheshi apa to i, naame opo handi i, naapa to ka kala, naame opo handi ka kala. Oshiwana shoye otashi ningi oshiwana shange, naKalunga koye ota ningi Kalunga kange. 17 Apa to file naame opo handi file, nopo handi ka pakwa. Jehova na handukile nge sha kwata moiti, ngeenge onde ku fiye po omolwoshinima shimwe shihe fi efyo.”
18 Eshi Naomi a mona kutya Rut ota kondjifa okuya naye, ina kendabala vali oku mu lombwela a shune. 19 Ova twikila nondjila yavo fiyo omuBetlehem. Diva eshi va fika muBetlehem, ovanhu aveshe moshilando ova li tave va tale, novakainhu ova tya: “Oye ngoo Naomi ou?” 20 Okwe va lombwela a ti: “Inamu ifana nge Naomi.* Ifanei nge Mara,* osheshi Omunaenghono adishe okwa djuupaleka onghalamwenyo yange. 21 Onda ile noinima ihapu, ndele Jehova okwa ningifa nge ndi aluke eenyala dongaho. Omolwashike tamu ifana nge Naomi, ngeenge Jehova Omunaenghono adishe okwa efa nge nokwa etela nge omaupyakadi?”
22 Naomi osho a dja mo ngaho muMoab, pamwe noshitenya shaye Rut, Omumoab. KuBetlehem ova li va ya ko pehovelo leteyo loilya yo-barley.