Ovatokolipangeli
16 Pomhito imwe, Simson okwa li a ya kuGasa, nokwa mona ko ombwada, ndele ta i meumbo layo. 2 Ovagasa ova li va lombwelwa kutya: “Simson okwe uya mo omu.” Onghee ova li ve mu kondeka, noku mu nangela oufiku aushe poshivelo shoshilando. Ova kala po oufiku aushe va mwena, tave lilombwele tava ti: “Ngeenge etango la piti, ohatu mu dipaa.”
3 Ashike Simson okwa kala a nangala omo fiyo omokati koufiku. Opo nee okwa penduka mokati koufiku, nokwa kwata omuvelo woshilando nosho yo oikulo ivali yomuvelo, ndele te i dikula mo pamwe noshihakifo. Okwe i tula komapepe aye, ndele te i humbata fiyo okoxulo yomhunda oyo i li popepi naHebron.
4 Lwanima, okwa ka kala a hokwa omukainhu womEfilu laSorek wedina Delila. 5 Onghee ovapangeli vOvafilisti ova ya kuye, ndele tava ti: “Mu heka* u mone kutya openi ha hange eenghono odo dinene, nanghee hatu dulu oku mu dula eenghono noku mu manga, opo tu mu finde. Ngeenge owa ningi ngaho, keshe umwe womufye ote ke ku pa oisilveri 1 100.”
6 Lwanima, Delila okwa tya kuSimson: “Alikana, lombwele nge opo hapa di eenghono doye dinene, naasho tashi dulu okulongifwa, opo u mangwe nou findwe.” 7 Simson okwa tya kuye: “Ngeenge ova mange nge neefipa* heyali douta dipe, odo inadi kukuta, ohandi ka kanifa eenghono, ndele handi kala ngaashi ovalumenhu vakwetu.” 8 Ovapangeli vOvafilisti ove mu etela eefipa heyali douta dipe, odo inadi kukuta, ndele Delila te di mu mangifa. 9 Ova li ve mu nangela monduda yomeni, nomukainhu oo okwe mu ingida, ta ti: “Ovafilisti ovovo Simson!” Simson okwa tokaula eefipa domauta noupu, ngaashi ashike ongodi yoshimeno, omo hamu longwa oliina, hai tokoka ngeenge ya pya komundilo. Opo hapa di eenghono daye kapa li pa shiivika.
10 Opo nee Delila okwa tya kuSimson: “Tala, ove owa kengelela nge* nowa lombwela nge oipupulu. Alikana, lombwele nge osho to dulu okumangifwa.” 11 Onghee Simson okwa tya kuye: “Ngeenge ova mange nge neengodi dipe, odo inadi longifwa nale, ohandi ka kanifa eenghono, ndele handi kala ngaashi ovalumenhu vakwetu.” 12 Onghee Delila okwa kufa eengodi dipe, ndele te di mu mangifa, nokwa ingida mokule, ta ti: “Ovafilisti ovovo Simson!” (Efimbo alishe olo, ovalumenhu ova kala ve mu nangela monduda yomeni.) Simson okwe di tokaula mo moikesho yaye ngaashi eengodi dokuhondja.
13 Konima yaasho, Delila okwa tya kuSimson: “Natango owa kengelela nge, nowa lombwela nge oipupulu. Lombwele nge osho to dulu okumangwa nasho.” Simson okwa tya kuye: “Ongeenge wa tatele kumwe omapando aheyali oo e li momutwe wange neengodi dokutunga oiyata.” 14 Onghee okwe di tata noku di pameka noshitungifi shoiyata, ndele ta ingida, ta ti: “Ovafilisti ovovo, Simson!” Simson okwa penduka mo meemhofi, nokwa shila mo meexwiki daye oshitungifi osho nosho yo eengodi doiyata.
15 Delila okwa tya kuSimson: “Omolwashike to tile ou hole nge, ngeenge ino lineekela nge?* Oikando aishe oyo itatu owa kengelela nge, noino lombwela nge opo hapa di eenghono doye dinene.” 16 Molwaashi efiku keshe Delila okwa kala te mu kondjifa noku mu fininika, Simson* okwa li a loloka fiyo osheshi a li ita dulu vali okulididimika nandenande. 17 Xuuninwa, Simson okwe mu mbubulila omutima waye, a ti: “Momutwe wange inamu enda nale okambi, molwaashi ame Omunasiri waKalunga okudja pedalo.* Ngeenge onda kululwa, eenghono dange otadi ka dja mo mwaame, noitandi ka kala vali ndi na eenghono dihapu. Ohandi ka kala ashike nda fa ovalumenhu aveshe.”
18 Eshi Delila a mona kutya Simson okwe mu mbubulila omutima waye, okwa ifana diva ovapangeli vOvafilisti, a ti: “Ileni paife, osheshi okwa mbubulila nge omutima waye.” Onghee ovapangeli vOvafilisti ove uya kuye, va etelela oimaliwa. 19 Delila okwa ningifa Simson a kofele komatundji aye. Opo nee okwa ifana omulumenhu, ndele te mu lombwele a kulule Simson omapando aheyali oo e li momutwe waye. Konima yaasho, Delila okwa hovela oku mu pangela, molwaashi okwa li ta ende ta kanifa eenghono. 20 Delila okwa ingida, a ti: “Ovafilisti ovovo Simson!” Simson okwa penduka, ndele ta ti: “Ohandi ningi ngaashi handi ningi shito, ndele handi faduka po.” Ashike Simson ka li e shi shii kutya Jehova okwa dja po puye. 21 Onghee Ovafilisti ove mu kwata, ndele tava kolola mo omesho aye. Opo nee ove mu twala kuGasa, ndele tave mu mange nomalyenge avali ongopolo, nokwa kala modolongo ha tu oilya. 22 Ashike konima eshi a kululwa, eexwiki daye oda hovela vali okukula.
23 Ovapangeli vOvafilisti ova li va ongala, opo va yambele kalunga kavo, Dagon, eyambo linene nokutyapula, osheshi ova li tava ti: “Kalunga ketu okwa yandja Simson, omutondi wetu, momake etu.” 24 Eshi ovanhu ve mu mona, ova tanga kalunga kavo tava ti: “Kalunga ketu okwa yandja omutondi wetu momake etu, oo a longa oushada medu letu, nokwa dipaa ovanhu vahapu vomufye.”
25 Molwaashi omitima davo oda li da hafa unene, ova tya: “Ifaneni Simson e uye e tu ningile po oiyolifa.” Onghee ova kufa mo Simson modolongo e uye e va hafife. Ova li ve mu kaleka ofika pokati keengudi mbali. 26 Opo nee Simson okwa lombwela omumati, oo a li e mu kwete meke, a ti: “Efe nge ndi kwate eengudi deumbo, opo ndi dule okuyaamena ko.” 27 (Meumbo olo omwa li mu yadi ovalumenhu novakainhu. Ovapangeli aveshe vOvafilisti omo va li, nopombada yeumbo opa li ovalumenhu novakainhu 3 000, ovo va li tava tale Simson, eshi a li ta ningi oiyolifa.)
28 Simson okwa pula ekwafo kuJehova, a ti: “Omwene Jehova, Omunamapangelo aeshe, alikana, dimbuluke nge nokupameka nge. Kwafele nge ashike lumwe Kalunga kange, ndi shunifile Ovafilisti owii omolweisho lange limwe.”
29 Opo nee Simson okwa kwatelela meengudi mbali dopokati, odo di kwete eumbo. Okwa li a yaamena kudo, kombinga imwe onokwooko kwaye kwokolulyo nokombinga ikwao onokwooko kwaye kwokolumosho. 30 Simson okwa ingida, a ti: “Nandi* fye pamwe nOvafilisti!” Opo nee okwa undula neenghono daye adishe, ndele eumbo tali wile ovapangeli novanhu aveshe ovo va li mo. Onghee pefyo laye okwa dipaa ovanhu vahapu ve dulife ovo a dipaa nale mokukalamwenyo kwaye.
31 Lwanima, ovamwaxe noukwaneumbo aushe waxe ova ya kuGasa va ka tale ko omudimba waye. Ove u kufa ko, ndele tave u pake pokati kaSora naEstaol mombila yaxe, Manoa. Okwa kala omutokoli muIsrael oule weedula 20.