Esra
8 Edi odo omitwe domaukwaneumbo omapata avo nomusholondodo womadina omaukwaneumbo, oo e lishangifa pashikulafano lao, aavo va dja pamwe naame muBabilon pefimbo lepangelo lohamba Artasasta: 2 movanamati vaPinehas, oGersom; movanamati vaItamar, oDaniel; movanamati vaDavid, oHattus; 3 movanamati vaSekania womovanamati vaParos, oSakaria, nokwa li pamwe novalumenhu 150, ovo ve lishangifa pashikulafano; 4 movanamati vaPahat-moab, oEliehoenai, omonamati waSerahia, nokwa li pamwe novalumenhu 200; 5 movanamati vaSattu, oSekania, omonamati waJahasiel, nokwa li pamwe novalumenhu 300; 6 movanamati vaAdin, oEbed, omonamati waJonatan, nokwa li pamwe novalumenhu 50; 7 movanamati vaElami, oJesaya, omonamati waAtalia, nokwa li pamwe novalumenhu 70; 8 movanamati vaSefatia, oSebadia omonamati waMikael, nokwa li pamwe novalumenhu 80; 9 movanamati vaJoab, oObadja omonamati waJehiel, nokwa li pamwe novalumenhu 218; 10 movanamati vaBani, oSelomit, omonamati waJosifiya, nokwa li pamwe novalumenhu 160; 11 movanamati vaBebai, oSakaria, omonamati waBebai, nokwa li pamwe novalumenhu 28; 12 movanamati vaAsgad, oJohanan, omonamati waHakkatan, nokwa li pamwe novalumenhu 110; 13 movanamati vaAdonikam, ovo va li vaxuuninwa, omadina avo oyaa: Elifelet, Jeiel naShemaia, nova li pamwe novalumenhu 60; 14 movanamati vaBigvai oUtai naSabbud, nova li pamwe novalumenhu 70.
15 Onde va ongela pomulonga, oo we uya puAhava, notwa onga onhanda opo oule womafiku atatu. Ashike eshi nda konakona mokati kovanhu nokovapristeri, inandi mona mo Ovalevi. 16 Onghee onda tuma ndi ka talelwe Elieser, Ariel, Shemaia, Elnatan, Jarib, Elnatan, Natan, Sakaria naMesullam, ovalumenhu ovo va li tava kwatele komesho, nosho yo Jojarib naElnatan, ovo va li ovahongi. 17 Opo nee onde va pa elombwelo li na sha naIddo, omuwiliki wonhele hai ifanwa Kasifia. Onde va tuma va lombwele Iddo nosho yo ovamwaxe, ovapiya votembeli,* ovo va li muKasifia, ve tu etele ovayakuli vomotembeli yaKalunga ketu. 18 Molwaashi eke laKalunga ketu ola li pamwe nafye, ove tu etela omulumenhu omunaendunge womovanamati vaMahli, omutekulu waLevi, omonamati waIsrael, wedina Serebia, ovanamati vaye novamwainamati ovalumenhu 18; 19 Hashabia pamwe naJesaja womOvamerari, ovamwaina nosho yo ovanamati vavo, ovalumenhu 20. 20 Opa li ovapiya votembeli* 220, ovo David nomalenga va yandja va yakule Ovalevi, aveshe ovo va tumbulwa momusholondodo pamadina avo.
21 Opo nee onda lombwela ovanhu aveshe ve lidilike pomulonga waAhava, tu lininipike koshipala shaKalunga ketu, notu konge ewiliko laye omolwolweendo letu, omolwetu, ovana vetu noinima yetu aishe. 22 Onda li nda fya ohoni okupula ohamba i tu pe ovakwaita novalondinghambe, ve tu amene kovatondi molweendo letu, molwaashi otwa lombwela ohamba twa ti: “Eke liwa laKalunga ketu oli li pamwe nakeshe oo te mu kongo, ashike ota ka handukila neenghono aveshe ovo tave mu liteeka po.” 23 Otwe lidilika notwa konga ewiliko kuKalunga ketu omolwolweendo letu, nokwa uda eindilo letu.
24 Onda hoolola ovapashukili 12 vovapristeri, Serebia naHashabia novamwainamati vavo omulongo. 25 Onde va pa oshisilveri noshingoli nosho yo oilongifo, konima eshi nde i yeleka, nosho yo omayambidido oo ohamba, ovayandjimayele vayo, omalenga ayo nOvaisrael aveshe ovo va li po, va yandjela otembeli yaKalunga ketu. 26 Eshi nde i yeleka, onda yandja momake avo oitalenti* yoshisilveri 650, oilongifo yoshisilveri 100, i na ongushu yoitalenti 2, oitalenti yoshingoli 100, 27 ouyaxa voshingoli vanini 20, ve na ongushu yeedariki* 1 000, oilongifo 2 ya longwa mongopolo iwa, tai vema noi na ongushu ngaashi oyo ya longwa moshingoli.
28 Opo nee onde va lombwela nda ti: “Nye ovayapuki kuJehova, noilongifo oiyapuki; oshisilveri noshingoli omayambo ehalo liwa kuJehova, Kalunga kooxokulululwa. 29 I pashukileni, fiyo osheshi mwe i yelekela ovapashukili vovapristeri novOvalevi nomalenga omitwe domapata omaukwaneumbo Ovaisrael muJerusalem, meenduda* domotembeli yaJehova.” 30 Ovapristeri nOvalevi ova kufa oshisilveri, oshingoli noilongifo, oyo va yelekelwa, opo ve i twale kuJerusalem kotembeli yaKalunga ketu.
31 Opo nee otwa dja po pomulonga waAhava mefiku eti-12 lomwedi wotete twa finda kuJerusalem, neke laKalunga ketu ola li pamwe nafye. Okwe tu xupifa momake ovatondi vetu nokwaavo hava kala va nangela pondjila. 32 Otwe uya muJerusalem notwa kala mo oule womafiku atatu. 33 Mefiku etine, otwa yeleka oshisilveri, oshingoli noilongifo yomotembeli yaKalunga ketu. Otwe i yandja kuMeremot, omonamati womupristeri Uria, oo a li pamwe naEliaser, omonamati waPinehas, nova li pamwe nOvalevi, Josabad, omonamati waJesua, naNoadia, omonamati waBinnui. 34 Oinima aishe oya li ya valulwa noya yelekwa, nondjudo yayo aishe oya li ya shangwa. 35 Ovo va dja moukwatwa, ovo va li nale eenghwate, ova yamba omaxwikiloyambo kuKalunga kaIsrael, eengobe deemhedi 12 omolwOvaisrael aveshe, eedi deendume 96, eedjona deendume 77 noikombo yoindume 12 i li etimbayambo; aishe oyo oya li exwikiloyambo kuJehova.
36 Opo nee otwa yandja omalombwelo ohamba komalenga* ohamba nokoongoloneya voshitukulwa shoKombada yOmulonga,* nova yambidida ovanhu nosho yo otembeli yaKalunga kashili.