Jesaja

65 “Onda efa ndi kongwe kwaavo inava pula kombinga yange;

Onda efa ndi monike kwaavo inava konga nge.

 2 Efiku keshe, onda yelulila omake ange ovanhu, ovo ve na omitwe dikukutu,

Kwaavo hava ende mondjila, oyo ihe fi iwa,

Tava shikula omadiladilo avo vene;

 3 Ovanhu, ovo hava handukifa nge alushe koshipala shange,

Tava yambele moikunino nokuningila omatwiminoyambo keedopi.

 4 Ohava kala omutumba mokati keembila,

Nohava nangala oufiku meenhele da hondama,*

Tava li ombelela yoingulu,

Nomunghoka woinima itondifa* ou li momatiti avo.

 5 Ohava ti, ‘Kala oko; ino uya kwaame,

Osheshi ame ondimuyapuki ndi ku dule.’*

 6 Tala! Osha shangwa moipafi yange;

Itandi kala nda mwena,

Ashike ohandi ke va shunifila,

Ohandi ke va shunifila pauyadi,*

 7 Omolwomapuko avo nomolwomapuko ooxekulululwa,”

“Osheshi ova ningila omatwiminoyambo keemhunda,

Nova shekela nge koikulundudu,

Tete, ohandi ke va yelekela ondjabi yavo pauyadi,”* Jehova osho ta ti.

“Ngaashi ashike omaviinyu mape haa di meshila lomandjebele,

Naumwe ota ti, ‘Ino li nyonauna po, osheshi mulo omu na sha shiwa,’*

Naame osho handi ka ninga omolwovapiya vange;

Aveshe itandi ke va hanauna po.

 9 Ohandi ka kufa oludalo muJakob,

NomuJuda oyoo ta ka fyuulula eemhunda dange;

Ovahoololwa vange otave ke shi nangala,

Novapiya vange otava ka kala mo.

10 Sharon otashi ka ninga oulifilo weedi,

Nefilu laAkor onhele yokwoombela eengobe,

Omolwovanhu vange, ovo tava kongo nge.

11 Ashike ove ou li mokati kaavo tave liteeka Jehova,

Ovo tava dimbwa omhunda iyapuki,

Ovo tava longekidile kalunga kElao oshitaafula,

Naavo hava yadekele kalunga kOnakwiiwa omaholo omaviinyu a lumbakanifwa.

12 Onghee ohandi mu yandje keongamukonda,

Naamushe otamu ka twa eengolo, mu dipawe,

Molwaashi onda ifana, ashike inamu nyamukula,

Onda popya, ashike inamu pwilikina;

Omwa twikila okulonga osho shii momesho ange,

Nomwa hoolola osho inashi wapalela nge.”

14 Tala! Ovapiya vange otava ka hafa unene omolwehafo lokomutima,

Ndele nye otamu ka lila omolwouyehame wokomutima,

Notamu ka kwenauka omolwomhepo ya nyanyauka.

15 Otamu ka fiya po edina, olo ovahoololwa vange tava ka longifa onga efingo,

NOmwene Omunamapangelo aeshe, Jehova, ota ka dipaa keshe umwe womunye,

Ashike ovapiya vaye mwene ote ke va ifana nedina limwe;

16 Onghee keshe oo te likongele enangekonoupuna kombada yedu,

Ota ka nangekwa noupuna kuKalunga koshili,*

Nakeshe oo ta ningi eano kombada yedu,

Ota ka ana kuKalunga koshili.*

Osheshi omaudjuu* onale otaa ka dimbiwa;

Otaa ka holekwa omesho ange.

17 Osheshi tala! Ame ohandi shiti eulu lipe nedu lipe;

Noinima ikulu itai ke uya vali momadiladilo,*

Noitai ke uya vali momutima.

Osheshi tala! Ame ohandi shitile Jerusalem osheetifi shehafo,

Novanhu vasho osheetifi shenyaku.

19 Nohandi ka hafela Jerusalem nokunyakukilwa ovanhu vange;

Nomusho itamu ka udika vali ondaka yekweno, ile yelilo omolwoudjuu.”

20 “Monhele oyo itamu ka kala vali okahanana, oko taka kala ko ashike omafiku manini,

Nomunamido ita ka fya, ofimbo ina mana ko omafiku aye.

Osheshi keshe oo ta ka fya e na eedula efele ota ka talika ko okaana,

Nomunyoni ota ka fingwa, nonande oku na eedula efele.*

21 Otava ka tunga omaumbo, ndele tava kala mo,

Notava ka ninga oikunino yomandjebele, ndele tava li oiimati yayo.

22 Itava ka tunga, mu kale hamu di vamwe,

Noitava ka twika, vamwe va lye.

Osheshi omafiku ovanhu vange otaa ka kala ngaashi omafiku omuti,

Novahoololwa vange otava ka hafela pauyadi oilonga yomake avo.

23 Itave ke lilolola* epwanga,*

Nounona vavo itave ke va dala vali va kale tava mono oixuna,

Molwaashi ovo oludalo laavo va etwa po kwaavo va nangekwa noupuna kuJehova,

Nomaludalo avo oku li puvo.

24 Nokuli ofimbo inava ifana, ohandi ka nyamukula;

Ofimbo natango tava popi, ohandi ka uda ko.

25 Embungu nodjona otai ka lila pamwe,

Onghoshi otai ka lya omwiidi ngaashi ashike ongobe yomhedi,

Noikulya yeyoka otai ka kala ondwi.