Samuel wotete
23 Mokweendela ko kwefimbo, David okwa li a lombwelwa kutya: “Ovafilisti otava lwifa Keila, notava hanauna po oilikolomwa poipale.” 2 Onghee David okwa pula Jehova a ti: “Nandi ye ngoo ndi ka ponokele Ovafilisti ovo?” Jehova okwa tya kuDavid: “Inda u ka ponokele Ovafilisti, ndele to xupifa Keila.” 3 Ovakwaita vaDavid ova tya kuye: “Tala, otwa tila ofimbo tu li omu muJuda; mbela ngeenge otwa i kuKeila tu ka lwife Ovafilisti, itatu ka kala twa tila unene?” 4 Onghee David okwa pula vali Jehova. Jehova okwe mu nyamukula a ti: “Fikama, ndele to i kuKeila, molwaashi ohandi ka yandja Ovafilisti momake oye.” 5 Opo nee David okwa ya novakwaita vaye kuKeila, ndele tava lwifa Ovafilisti. Okwa kwata ko oimuna yavo, ndele ta dipaa vahapu vomuvo, nokwa li a xupifa ovakalimo vomuKeila.
6 Abjatar, omonamati waAhimelek, okwa tondoka a ya kuDavid kuKeila, e kwete okatetahema. 7 Saul okwa lombwelwa kutya: “David okwe uya kuKeila.” Opo nee Saul okwa tya: “Kalunga okwe mu yandja kwaame,* molwaashi okwe lieta ye mwene, eshi a ya moshilando shi na omivelo noihakifo.” 8 Saul okwa tuma ovakwaita vaye aveshe koita kuKeila va ka kwate po David novakwaita vaye. 9 Eshi David a uda kutya Saul ote mu pangelele omhangela, okwa lombwela omupristeri Abjatar, a ti: “Eta okatetahema oku.” 10 Opo nee David okwa tya: “Jehova Kalunga kaIsrael, omupiya woye okwa uda shili kutya Saul okwa hala okuuya kuKeila a hanaune po oshilando omolwange. 11 Mbela ovawiliki* vomuKeila otava ka yandja nge ngoo momake aye? Mbela Saul ote ke uya ngaashi omupiya woye a uda? Jehova Kalunga kaIsrael, alikana, lombwela omupiya woye.” Opo nee Jehova okwa tya kuye: “Heeno ote uya.” 12 David okwa pula a ti: “Mbela ovawiliki vomuKeila otava ka yandja nge pamwe novakwaita vange momake aSaul?” Jehova okwa nyamukula a ti, “Heeno otave ke ku yandja.”
13 David okwa ya diva novakwaita vaye 600 lwaapo, nova dja mo muKeila, ndele tava i keenhele da yoolokafana, oko tava dulu oku ka kala. Eshi Saul a uda kutya David okwa dja mo muKeila, ina dja mo e mu shikule. 14 David okwa kala mombuwa, keenhele odo didjuu nokuya, koshitukulwa shokeemhunda shomombuwa yaSif. Saul okwa kala noku mu konga lwoikando, ashike Jehova ine mu yandja momake aye. 15 Eshi David a li mombuwa yaSif kuHores, okwa li e shi shii kutya* Saul okwa li te mu kongo e mu dipae.
16 Jonatan, omonamati waSaul, okwa ya kuDavid, muHores, nokwe mu kwafela a konge eenghono* kuJehova. 17 Okwa tya kuye: “Ino tila, osheshi tate, Saul, ite ke ku mona. Oto ka ninga ohamba yaIsrael, nohandi ka ninga omutivali woye, na tate, Saul, oku shi shii.” 18 Ova ninga ehangano koshipala shaJehova, ndele David ta kala muHores, na Jonatan okwa ya keumbo laye.
19 Lwanima, ovanhu vomuSif ova ya kuSaul, kuGibea, ndele tava ti: “Hamba David ina hondama popepi nafye puHores, meenhele odo didjuu nokuya, koshikulundudu shaHakila, osho shi li kolukadi* laJeshimon?* 20 Ohamba, ngeenge oshe ku wapalela,* ila, nohatu ke mu yandja momake ohamba.” 21 Opo nee Saul okwa tya: “Jehova ne mu nangeke noupuna, molwaashi omwa kenukila nge. 22 Alikana indeni, ndele tamu ka konga kutya oku li naanaa peni nokupula ou e mu mona, molwaashi onda lombwelwa kutya omukengeleledi. 23 Kongeni nawanawa peenhele apeshe opo ha hondama, ndele tamu aluka mu pe nge ouyelele. Ohandi ka ya pamwe nanye, nongeenge oku li moshitukulwa, ohandi ke mu konga mo mokati komapata* aJuda.”
24 Opo nee ova dja po, ndele tava i kuSif ve li komesho yaSaul, ofimbo David novakwaita vaye ve li mombuwa yaMaon, muAraba, kolukadi laJeshimon. 25 Onghee Saul novakwaita vaye ove uya okukonga David. Eshi David e shi uda, okwa ya mekololo lemanya, ndele ta kala mombuwa yaMaon. Eshi Saul a uda oshinima osho, okwa shikula David kombuwa yaMaon. 26 Eshi Saul e uya kombinga imwe yomhunda, David novakwaita vaye ova li kombinga ikwao yomhunda. David okwa li ta endelele, opo a faduke po Saul, ashike Saul novakwaita vaye ova li popepi nokukwata po David novakwaita vaye. 27 Ndele kuSaul okwe uya omutumwa ta ti: “Ila divadiva, molwaashi oshilongo osha dingililwa kOvafilisti.” 28 Saul okwa efa okutaataa David, ndele ta ka lwifa Ovafilisti. Osho osho sha ningifa onhele oyo i lukwe Emanya lEtukauko.
29 Opo nee David okwa dja po opo, ndele ta ka kala keenhele odo didjuu nokuya, kuEn-gedi.