Omafimbo otete
17 Diva eshi David a mona omhito yokukala meumbo* laye, okwa tya komuprofeti Natan: “Ame ohandi di meumbo la tungwa nomiti domisederi, ofimbo oshikefa shehangano laJehova shi li metwali.” 2 Natan okwa nyamukula David, ta ti: “Ninga keshe osho omutima woye wa hala, molwaashi Kalunga kashili oku li pamwe naave.”
3 Oufiku oo tuu oo, ondjovo yaKalunga oye uya kuNatan, tai ti: 4 “Inda, ndele to lombwele omupiya wange, David, to ti, ‘Jehova ota ti ngaha: “Haave to ka tungila nge eumbo ndi kale mo. 5 Okudja efiku olo nda mangulula Israel fiyo okunena, inandi kala meumbo, ashike onda twikila okweendaenda metwali netwali nosho yo okudja metwalihangano fiyo okulikwao.* 6 Efimbo alishe olo nda enda pamwe naIsrael ashishe, mbela onda pula ngoo ovatokoli vaIsrael, ovo nda hoolola va wilike oshiwana shange, nda ti: ‘Omolwashike inamu tungila nge eumbo la tungwa nomiti domisederi?’”’
7 “Lombwela omupiya wange, David, to ti, ‘Jehova womatangakwaita ota ti: “Onde ku kufa koufita, oko wa li to lifa oimuna, ndele handi ku ningi omuwiliki woshiwana shange, Israel. 8 Ohandi ka kala pamwe naave keshe apa to i, nohandi ka dima* po ovatondi voye aveshe moipafi yoye; nohandi ke ku ningila edina, notali ka kala ngaashi omadina ovanhu va fimana kombada yedu. 9 Ohandi ka hoololela oshiwana shange, Israel, onhele, ndele handi shi tula mo notashi ka kala mo, noitapa kala vali oo te shi piyaaneke; novakolokoshi itave ke shi fininika* vali, ngaashi va ningile nale, 10 okudja efiku olo nda hoolola ovatokoli voshiwana shange, Israel. Ohandi ka finda ovatondi vasho aveshe. Natango, ohandi ku lombwele kutya, ‘Jehova ote ke ku tungila eumbo.’*
11 “‘“Ngeenge owa fi, ndele to i u ka kale pamwe nooxokulululwa, ohandi ka nangeka po oludalo loye, olo tali ku shikula, umwe womovanamati voye, nohandi ka pameka ouhamba waye. 12 Oye ta ka tungila nge eumbo, nohandi ka pameka olukalwapangelo laye fiyo alushe. 13 Ohandi ka ninga xe, nota ka ninga omonamati wange. Ohandi ke mu ulikila alushe ohole i na oudiinini, noitandi ke mu efa, ngaashi nda ningila oo e ku tetekela. 14 Ohandi ke mu kaleka meumbo lange nomouhamba wange fiyo alushe, nolukalwapangelo laye otali kala po fiyo alushe.”’”
15 Natan okwa lombwela David eendjovo adishe odo nemoniko alishe olo.
16 Opo nee ohamba David oye uya, noya kala omutumba koshipala shaJehova, ndele tai ti: “Jehova Kalunga, aame lyelye? Neumbo lange olo eshike, eshi wa ningila nge oinima aishe oyo? 17 Natango, Kalunga owa popya yo kombinga yeumbo lomupiya woye fiyo okefimbo lokomesho. Jehova Kalunga, owa tala nge ko ngaashi omunhu oo e na natango okutumbalekwa.* 18 Omupiya woye, David, na tye vali shike kombinga yefimano olo wa pa nge, ngeenge ou shii nawanawa omupiya woye? 19 Jehova, omolwomupiya woye nometwokumwe nomutima woye,* owa ninga oinima aishe ei inene, eshi wa holola ounene woye. 20 Jehova, kape na umwe e ku fa, nokape na Kalunga umwe, oove auke Kalunga kashili; oinima aishe twa uda nomatwi etu oye shi koleka. 21 Oshiwana shilipi kombada yedu sha fa oshiwana shoye, Israel? Kalunga kashili okwe va xupifa ve li oshiwana shaye. Owe liningila edina omolwoilonga yoye inene noikumwifi, wa taataa mo oiwana moipafi yoshiwana shoye, osho wa xupifa muEgipiti. 22 Owa ninga oshiwana shaIsrael ovanhu voye mwene fiyo alushe; naave, Jehova, owa ninga Kalunga kavo. 23 Paife, Jehova, eudaneko olo wa udaneka li na sha nomupiya woye nosho yo eumbo laye, nali wanifwe po fiyo alushe, nou ninge naanaa ngaashi wa udaneka. 24 Edina loye nali kalelele* nokutumbalekwa fiyo alushe, opo ovanhu va tye, ‘Jehova womatangakwaita, Kalunga kaIsrael, oye Kalunga kOvaisrael,’ neumbo lomupiya woye, David, nali pamenene moipafi yoye. 25 Molwaashi ove, Kalunga kange, owa hololela omupiya woye elalakano loye li na sha noku mu tungila eumbo.* Nomolwaasho omupiya woye e na elineekelo lokwiilikana eilikano olo kwoove. 26 Ndele paife, Jehova, oove Kalunga kashili, nowa udanekela omupiya woye oinima oyo iwa. 27 Onghee twikila okunangeka noupuna eumbo lomupiya woye fiyo alushe, molwaashi ove, Jehova, owe li nangeka noupuna nola nangekwa noupuna fiyo alushe.”