Daniel
4 “Okudja kohamba Nebukadnesar fiyo okovanhu aveshe, koiwana nosho yo keengudu domalaka, odo di li kombada yedu alishe: Ombili yeni nai hapupale! 2 Onda hafa okushiivifa omadidiliko noinenelonga oyo Kalunga Omukombadambada a ningila nge. 3 Omadidiliko aye kamanene tuu, noinenelonga yaye kai na tuu eenghono! Ouhamba waye oo ouhamba waalushe, nepangelo laye otali kala po komapupi fiyo okomapupi.
4 “Ame, Nebukadnesar, onda li handi tulumukwa meumbo lange, noinima oya li tai ende nawa mombala yange. 5 Onda twa ondjodi oyo ya tilifa nge. Eshi nda nangala mombete yange, omafano nomamoniko omomutwe wange okwa tilifa nge. 6 Onghee onda yandja elombwelo, opo ovalumenhu ovanaendunge aveshe vomuBabilon va etwe mo koshipala shange, opo va dule okulombwela nge efatululo londjodi.
7 “Pefimbo olo, ovapristeri veemhule, ovanyanekeli, Ovakaldea* nosho yo ovanyanekeli veenyofi ove uya mo. Eshi nde va lombwela kombinga yondjodi, inava dula okulombwela nge efatululo layo. 8 Xuuninwa, Daniel, oo a lukwa Beltesasar, a lukilwa kalunga kange, naao e na omhepo yookalunga vayapuki, okwe ke uya mo koshipala shange, nonde mu lombwela ondjodi nda ti:
9 “‘Akutu Beltesasar, elenga lovapristeri veemhule, ondi shi shii nawa kutya ou na omhepo yookalunga vayapuki, nokape na oshiholekwa shidjuu unene kwoove. Onghee yelifile nge omamoniko oo nda mona mondjodi yange nosho yo efatululo layo.
10 “‘Momamoniko omomutwe wange, ofimbo nda li mombete, onda mona omuti u li pokati kedu nowa li mule neenghono. 11 Omuti owa kula nowa pama, noxulo yao oya twa keulu, nowa li u wetike kominghulo dedu alishe. 12 Omafo ao okwa li mawa noiimati yao oya li ihapu unene, nowa li u na oikulya yaaveshe. Oinamwenyo yomoixwa oya li hai kongo omudile koshi yao, needila dokeulu oda li hadi kala moitai yao, noishitwa aishe* oya li hai palulwa kuo.
13 “‘Eshi handi tale omamoniko omomutwe wange, ofimbo ndi li mombete yange, onda mona omunangeli, omuyapuki, ta kuluka ta di meulu. 14 Okwa ingida mokule ta ti: “Tetei po omuti, tetei ko oitai yao, shikei ko omafo ao nokuhalakanifa oiimati yao. Oinamwenyo nai dje ko onhapo koshi yao, needila nadi dje mo moitai yao. 15 Ashike oshifidi nomidi dasho shi fiyeni* medu, sha mangwa noshivela shilaula nosho yo nongopolo, mokati komwiidi womoixwa. Nashi tutikwe komume yokeulu, noshitukulwa shasho nashi kale pamwe noinamwenyo mokati koixwa yokedu. 16 Omutima washo nau lundululwe okudja kwaao womunhu, ndele tashi pewa omutima woshinamwenyo, nokweefa omafimbo aheyali e shi pitilile po. 17 Eshi osho oshipango shovanangeli, neindilo paendjovo dovayapuki, opo ovanhu, ovo ve na omwenyo, va shiive kutya Omukombadambada oye Omupangeli mouhamba wovanhu, nohe u yandje kukeshe oo a hala, nota dulu oku u pa nokuli novanhu ovo va dinika.”
18 “‘Ei oyo ondjodi, oyo ame, ohamba Nebukadnesar, nda twa. Paife ove, alikana Beltesasar, lombwele nge efatululo layo, osheshi ovalumenhu aveshe ovanaendunge vakweni vomouhamba wange itava dulu okulombwela nge efatululo. Ashike ove oto dulu okuninga ngaho, molwaashi ou na omhepo yookalunga vayapuki.’
19 “Pefimbo opo, Daniel, oo a lukwa Beltesasar, okwa haluka oule wokafimbo, nomadiladilo aye okwa hovela oku mu tilifa.
“Ohamba oya ti, ‘Alikana Beltesasar, ino efa ondjodi nefatululo i ku tilife.’
“Beltesasar okwa nyamukula a ti, ‘Akutu omwene wange, ondjodi ei nai wanifilwe ovo ve ku tonde, nefatululo layo ovatondi voye.
20 “‘Omuti oo wa mona, oo wa kula unene nowa pama, oo oxulo yao ya twa keulu, 21 nowa li tau monika kombada yedu alishe, oo wa li u na omafo mawa, oiimati ihapu unene, noikulya yaaveshe, oo koshi yao haku kala oinamwenyo yomoixwa, nomoitai yao omo hamu kala eedila dokeulu, 22 oove, omwene ohamba, molwaashi owa ninga umunene nowa pama, nefimano loye ola hapupala, nola twa keulu, nepangelo loye okominghulo dedu.
23 “‘Nohamba oya mona omunangeli, omuyapuki, ta kuluka ta di meulu, oo a li ta ti: “Tetei po omuti noku u hanauna po, ashike oshifidi nomidi dasho shi fiyeni* medu, sha mangwa noshivela shilaula nosho yo nongopolo mokati komwiidi womoixwa. Nashi tutikwe komume yokeulu, noshitukulwa shasho nashi kale mokati koinamwenyo yomoixwa, fiyo osheshi omafimbo aheyali e shi pitilila po.” 24 Eli olo efatululo, omwene ohamba; osho oshi na okuningilwa omwene wange ohamba pashipango shOmukombadambada. 25 Oto ka tewatewa mo mokati kovanhu noto ka kala ho di pamwe noinamwenyo yomoixwa, noto ka pewa omwiidi u lye, ngaashi eengobe deemhedi; nomume yokeulu otai ke ku tutika, nomafimbo aheyali otae ke ku pitilila po, fiyo osheshi wa shiiva kutya Omukombadambada oye Omupangeli mouhamba wovanhu, note u yandje kukeshe oo a hala.
26 “‘Ndele molwaashi ova ti kutya oshifidi nashi fyaale mo nomidi dasho,* ouhamba woye otau ka kala vali woye, konima ngeenge owa shiiva kutya eulu olo tali pangele. 27 Onghee hano, omwene ohamba, tambula ko omayele ange. Efa oulunde mokulonga osho sha yuka, nowii woye mokufila onghenda eehepele. Pamwe okupondola kwoye taku lelepekwa.’”
28 Oinima aishe oyo oya ningilwa ohamba Nebukadnesar.
29 Konima yeemwedi omulongo nambali, oya li tai ende kombada yongulu yombala yaBabilon. 30 Ohamba oya li tai ti: “Mbela eshi kashi fi Babilon Shinene, osho nda tunga shi li ombala yeumbo keenghono nokomafa ange mwene, nomolwefimano leenghono dange dinene?”
31 Ofimbo ondjovo ya li natango mokanya kohamba, meulu omwa dja ondaka tai ti: “Okwa tiwa ngaha shi na sha naave, akutu ohamba Nebukadnesar, ‘Ouhamba owe u kufwa, 32 nowa tewatewa mo mokati kovanhu. Oto ka kala ho di pamwe noinamwenyo yomoixwa, noto ka pewa omwiidi u lye, ngaashi eengobe deemhedi, nomafimbo aheyali otae ke ku pitilila po, fiyo osheshi wa shiiva kutya Omukombadambada oye Omupangeli mouhamba wovanhu, note u yandje kukeshe oo a hala.’”
33 Pefimbo olo, ondjovo oya li ya wanifilwa Nebukadnesar. Okwa li a tewatewa mo mokati kovanhu, nokwa hovela okulya omwiidi ngaashi eengobe deemhedi, nolutu laye ola tutikwa komume yokeulu, fiyo osheshi eexwiki daye da ninga diledile ngaashi omalwenya eenhwa, noipanyala yaye oya li ngaashi oipanyala yeedila.
34 “Pexulilo lefimbo olo, ame, Nebukadnesar, onda tala pombada keulu, neendunge dange oda alukila nge, nonda tanga Omukombadambada, Naao ta kala nomwenyo fiyo alushe onde mu tanga nonde mu pa efimano, molwaashi epangelo laye olo epangelo laalushe nouhamba waye otau kala po komapupi fiyo okomapupi. 35 Oonakukala kombada yedu aveshe ova talika ko vehe fi sha, noha longo she likolelela kehalo laye mokati ketangakwaita lomeulu noloonakukala kombada yedu. Nokape na osho tashi dulu oku mu imba,* ile shi tye kuye, ‘Owa ninga ngahelipi ngaha?’
36 “Pefimbo olo, eendunge dange oda alukila nge, nefimano louhamba wange, eenghono dange nosho yo ewapalo lange oya alukila nge. Omalenga ange omakulunhu novaleli ova li va hovela vali okupula nge omayele, nonda li nda alulilwa ouhamba wange nonda li nokuli nda fimanekwa neenghono shi dulife nale.
37 “Paife ame, Nebukadnesar, ohandi tange nokutumbaleka nokufimaneka Ohamba yeulu, molwaashi oilonga yayo aishe oyoshili, neendjila dayo oda yuka, nomolwaashi ohai dulu okufifa ohoni ovo hava ende tave linenepeke.”