Omapsalme

83 Kalunga kange, ino kala wa mwena;

Kalunga kange, ino kala wa tya filu,* ile wa fikama ito ningi po sha.

 2 Osheshi, tala, ovatondi voye otava uyaana;

Ovo ve ku tonde ove linenepeka.*

 3 Ova pangelela omhangela meholeko oshiwana shoye;

Ova pangelela omhangela ovo wa lenga.*

 4 Ohava ti: “Ileni tu va hanaunei po ve li oshiwana,

Opo edina laIsrael liha dimbulukiwe vali.”

 5 Ohava pangele omhangela ve li moukumwe;*

Ova ninga eudafanotwokumwe* ve ku kondjife . . .

 6 Omatwali aEdom noOvaismael, aMoab noOvahagri,

 7 AGebal naAmmoni naAmalek,

AFilistia pamwe novakalimo vomuTirus.

 8 Assiria naye okwe va waimina;

Ova yambidida* ovanamati vaLot. (Sela)

 9 Va ningileni ngaashi mwa ningila Midian,

Ngaashi mwa ningila Sisera naJabin pokamulonga* kaKison.

10 Ova hanauninwa po puEn-dor;

Ova ninga oushosho wedu.

11 Ovawiliki vavo va ningeni ngaashi Oreb naSeeb,

Nomalenga* avo ongaashi Seba naSalmunna,

12 Osheshi ova ti: “Natu nangaleni edu omo hamu kala Kalunga.”

13 Kalunga kange, va ninga ngaashi oshimbodi sha kukuta,*

Ngaashi olungu tali pepwa komhepo.

14 Ngaashi omundilo tau xwike ofuka,

Ngaashi omalaka omundilo taa lungwinifa eemhunda,

15 Naave osho u va taataa noshikungulu shoye shinene,

Noku va tilifa noshikungulu shoye shomhepo.

16 Uvika* oipala yavo nohoni,

Opo va dule okukonga edina loye, Omwene Jehova.

17 Nava fifwe ohoni, nokutilifwa fiyo alushe;

Nava lengaifwe, nokuxula po;

18 Ovanhu nava shiive kutya ove, ou edina loye Jehova,

Oove auke Omukombadambada kombada yedu alishe.