Hesekiel

6 “‘Ndele ngeenge omunangeli okwa mono eongamukonda tali uya, ndele ina shika enghuma, novanhu inava londwelwa, ndele eongamukonda tali uya nokudipaa umwe womuvo, omunhu a tya ngaho ota ka fya omolwenyono laye mwene, ashike ohandi ka pula ohonde yaye komunangeli.’*

7 “Ashike ove, omona womunhu, onde ku nangeka po u kale ngaashi omunangeli weumbo laIsrael; nongeenge owa udu ondjovo ya dja mokanya kange, ou na oku va londwela ponhele yange. 8 Ngeenge onda lombwele omukolokoshi handi ti, ‘Omukolokoshi ove, oto ka fya shili!’ ashike ino popya, u londwele omukolokoshi, a lundulule ondjila yaye, ota ka fya e li omukolokoshi omolwenyono laye, ashike ohandi ke ku pula ohonde yaye. 9 Ashike ngeenge owa londwele omukolokoshi e lialuluke kondjila yaye, ndele ta anye okulundulula ondjila yaye, ota ka fya omolwenyono laye, ndele ove oto ka xupifa omwenyo woye shili.

10 “Ashike ove, omona womunhu, tya keumbo laIsrael, ‘Omwa ti: “Ounashibofa wetu nomatimba etu okwe tu wilila po neenghono, e tu lolola; onghee ongahelipi hatu dulu okutwikila okukala nomwenyo?”’ 11 Va lombwela kutya, ‘“Oshili, ofimbo ame ndi na omwenyo,” Omwene Omunamapangelo aeshe, Jehova, osho ta ti, “Ihandi hafele nandenande efyo lomukolokoshi, ndele ponhele yaasho, onda hala omukolokoshi a lundulule ondjila yaye noku kale nomwenyo. Lialulukeni, lialulukeni keendjila deni dii, osheshi omolwashike mu na okufya, nye eumbo laIsrael?”’

12 “Ashike ove, omona womunhu, lombwela ovanamati vovanhu voye kutya, ‘Ouyuki womuyuki itau mu xupifa, ngeenge okwa tukula ounashibofa; ile oukolokoshi womukolokoshi u mu pundukife, ngeenge okwa efa po oukolokoshi waye; ile omuyuki ita dulu okukala nomwenyo omolwouyuki waye mefiku olo a nyona. 13 Ngeenge onda lombwele omuyuki kutya: “Oto ka twikila okukala nomwenyo shili,” ndele te lineekele mouyuki waye mwene nokulonga osho sha puka,* kape na oilonga yaye youyuki tai ka dimbulukiwa, ashike ota ka fya omolwepuko laye olo a ninga.

14 “‘Nongeenge onda lombwele omukolokoshi kutya: “Oto ka fya shili,” ndele ta aluka ko kondjila yaye youlunde nokulonga osho shi li mondjila naasho sha yuka, 15 ndele omukolokoshi ta shunifa omukuli nokufuta osho sha li sha nyekwa ko, nokweenda meenghedimhango domwenyo mokuhalonga osho sha puka, ota ka twikila okukala nomwenyo shili. Ita ka fya. 16 Kape na nande olimwe lomomanyono oo a ninga tali ke mu tokolifa.* Ota ka twikila shili okukala nomwenyo, osheshi okwa longa osho shi li mondjila naasho sha yuka.’

17 “Ndele ovanhu voye ova ti, ‘Ondjila yaJehova kai li pauyuki,’ ofimbo paulelalela ondjila yavo oyo ihe li pauyuki.

18 “Ngeenge umwe omuyuki okwa efa po ouyuki waye nokulonga osho sha puka, oku na okufya omolwoshinima osho. 19 Ndele ngeenge omukolokoshi okwa efa po oukolokoshi waye, nokuninga osho shi li mondjila naasho sha yuka, ota ka kala nomwenyo omolwokuninga ngaho.

20 “Ndele omwa ti, ‘Ondjila yaJehova kai li pauyuki.’ Nye eumbo laIsrael, ohandi ka tokola keshe umwe womunye she likolelela keendjila daye.”

21 Pexulilo lomudo omuti-12, momwedi omutimulongo, mefiku etitano lomwedi woukwatwa wetu, omulumenhu oo a li a ya onhapo okudja kuJerusalem okwe uya kwaame, ndele ta ti: “Oshilando osha teka po!”

22 Onguloshi oyo ya tetekela, ofimbo omulumenhu oo a ya onhapo ine uya, eke laJehova ole uya kwaame, ndele ta makula okanya kange, ofimbo omulumenhu ine uya ongula kwaame. Onghee okanya kange oka li ka makulwa, nonda li vali handi dulu okupopya.

23 Opo nee ondjovo yaJehova oye uya kwaame tai ti: 24 “Omona womunhu, ovakalimo vomoikulukuma ei otava popi shi na sha nedu laIsrael tava ti: ‘Abraham okwa li ashike omulumenhu umwe, ndele nande ongaho, okwa li a kwata ko edu. Ashike fye otuvahapu; oshoshili, edu otwe li pewa tu li nangale.’

25 “Onghee hano, tya kuvo, ‘Eshi osho Omwene Omunamapangelo aeshe, Jehova, ta ti: “Nye otamu li oikulya i na ohonde, nomwa yelula omesho eni, a tale koikalunga yeni itondifa,* notamu twikile okutilashi ohonde. Onghee omolwashike mu na okukala medu olo? 26 Omwe lineekela meongamukonda leni, nohamu kufa ombinga moilonga itondifa, nakeshe umwe womunye okwa nyateka omukulukadi wamukwao. Onghee omolwashike mu na okukala medu olo?”’

27 “Eshi osho u na oku va lombwela, ‘Eshi osho Omwene Omunamapangelo aeshe, Jehova, ta ti: “Oshili, ofimbo ame ndi na omwenyo, ovo hava di moikulukuma otava ka fya keongamukonda; ovo hava kala momahalandjadja ohandi ke va yandja ve li oikulya koilyani; naavo ve li meehotengulu nosho yo ovo ve li momakololo otava ka fya komukifi. 28 Edu olo ohandi ke li ninga filufilu ombuwa ihe na sha, netumba omolwounhwa walo otali ka xulifwa po, neemhunda daIsrael otadi ka ninga ombuwa, nokape na oo ta ka enda ko. 29 Notava ka shiiva kutya aame Jehova, eshi edu olo handi ke li ninga filufilu ombuwa yongaho muhe na sha, omolwoinima aishe itondifa oyo va longa.”’

30 “Ashike ove, omona womunhu, ovanhu voye otava popi kombinga yoye ve li konima yomakuma nosho yo poivelo yomaumbo. Otava lombwelafana keshe umwe namumwaina tava ti: ‘Ileni, tu pwilikineni kondjovo tai di mokanya kaJehova.’ 31 Otave ke liongela va kale omutumba moipafi yoye ve li ovanhu vange; notava ka uda eendjovo doye, ashike itave ke di wanifa. Osheshi omilungu davo ohadi ku mbweenga,* ashike omitima davo odi na olwisho lokulikola oinima shihe li pauyuki. 32 Tala! Ou li kuvo ngaashi eimbilo lohole, eimbilo la imbwa newi liwa, nola shikwa nounghulungu noshishikomwa sheengodi. Otava ka uda eendjovo doye, ndele kape na nande oumwe ta ka katuka metwokumwe nado. 33 Nongeenge oda wanifwa, notadi ka wanifwa shili, otava ka shiiva kutya omuprofeti okwa li mokati kavo.”