Samuel omutivali
8 Lwanima, David okwa lwifa Ovafilisti nokwe va finda, na David okwa kwata ko oshilando shOvafilisti, Meteg-amma.
2 Okwa finda Ovamoab noku va nangeka momukweyo, ndele te va mete nongodi. Okwe va tukula meengudu nhatu, ta dipaa po mbali domudo, ndele imwe te i efa i kale nomwenyo. Ovamoab ova ninga ovapiya vaDavid nova li ve mu etela oifendela.*
3 David okwa finda Hadadeser, omonamati waRehob, ohamba yaSoba, eshi a li a yuka komulonga waEufrat, a ka kwate ko vali oshitukulwa osho. 4 David okwa kwata ko ovalondinghambe 1 700, novakwaita vokolupadi 20 000. Okwa teta omifipa domaulu eenghambe adishe, odo hadi nane omatemba oita, ndele ta xupifa eenghambe 100.
5 Eshi Ovasiria vokuDamaskus ve uya okukwafela ohamba Hadadeser yokuSoba, David okwa dipaa Ovasiria 22 000. 6 Opo nee David okwa tula omatangakwaita muDamaskus shomuSiria, nOvasiria ova ninga ovapiya vaDavid nove mu etela oifendela.* Jehova okwa kwafela David a findane* keshe apa a li a ya. 7 Natango, David okwa kufa ko oikelelifo yoshingoli kovapiya vaHadadeser noku i twala kuJerusalem. 8 Ohamba David oya kufa ongopolo ihapu muBeta nomuBeerota, oilando yaHadadeser.
9 Toi, ohamba yaHamat, okwa li a uda kutya David okwa finda etangakwaita alishe laHadadeser. 10 Onghee Toi okwa tuma omonamati, Joram, kohamba David e ke mu pule, ngeenge oku li tuu nawa, noku mu pandula eshi a lwifa nokufinda Hadadeser (osheshi Hadadeser okwa lwifa Toi lwoikando), nokwa dja ko noisilveri, oshingoli nongopolo. 11 Ohamba David oya yapulila Jehova oinima oyo, pamwe noshisilveri noshingoli, oyo ya kufa koiwana aishe oyo ya finda: 12 kuSiria naMoab, kOvaammoni, kOvafilisti, kOvaamalek nomoixuulwa* yaHadadeser, omonamati waRehob, ohamba yaSoba. 13 David okwe liningila yo edina, eshi a aluka kolwoodi, eshi a dipaa Ovaedom 18 000 pEfilu lOmongwa. 14 Okwa tula omatangakwaita muEdom. MuEdom ashishe okwa tula mo omatangakwaita, nOvaedom aveshe ova ninga ovapiya vaDavid. Jehova okwa kwafela David a findane* keshe apa a li a ya.
15 David okwa twikila okupangela Israel nokutokola oshiwana shaye pauyuki. 16 Joab, omonamati waSerua, okwa li ondjai yetangakwaita, na Josafat, omonamati waAhilud, okwa li omushangi wondjokonona. 17 Sadok, omonamati waAhitub, naAhimelek, omonamati waAbjatar, ova li ovapristeri, ofimbo Seraja a li hamushanga. 18 Benaia, omonamati waJehoiada, okwa li omuwiliki wOvakereti nOvapleti. Ovanamati vaDavid ova ninga omalenga omakulunhu.*