Eehamba eenhivali
20 Pefimbo olo, Hiskia okwa li ta ehama nokwa li e li pokufya. Omuprofeti Jesaja, omonamati waAmos, okwe uya, ndele ta ti kuye, “Jehova ota ti ngaha: ‘Yandja omalombwelo koukwaneumbo woye, molwaashi oto ka fya; ito ka veluka.’” 2 Opo nee Hiskia okwa taalela mekuma, ndele ta hovele okwiilikana kuJehova, ta ti: 3 “Alikana, Jehova, ohandi ku indile, alikana, dimbuluka nghee nde ku longela noudiinini, nomutima aushe nanghee nda longa osho shiwa momesho oye.” Hiskia okwa hovela okulila neenghono.
4 Jesaja ina hangwa a fika natango pokati koshihale, eshi ondjovo yaJehova ye uya kuye, tai ti: 5 “Shuna, ndele to lombwele Hiskia, omuwiliki woshiwana shange, kutya, ‘Jehova, Kalunga kaDavid, xokulululwa, ota ti: “Onda uda eindilo loye. Onda mona omahodi oye. Ohandi ku velula. Mefiku etitatu, oto ka ya keumbo laJehova. 6 Ohandi ku wedele ko eedula 15 kokukalamwenyo* kwoye, nohandi ku xupifa nosho yo oshilando eshi momake ohamba yaAssiria. Ohandi ka lwila oshilando eshi omolwedina lange nomolwomupiya wange, David.”’”
7 Opo nee Jesaja okwa tya: “Etelei nge oshikuki sheenghwiyu da kukutikwa.” Onghee ove shi eta, ndele tave shi vaeke poshitumba, nomokweendela ko kwefimbo, okwa ka veluka.
8 Hiskia okwa pula Jesaja, a ti: “Edidiliko lilipi tali ka ulika kutya Jehova ota ka velula nge, nonokutya mefiku etitatu ohandi ka ya keumbo laJehova?” 9 Jesaja okwa nyamukula a ti: “Eli olo edidiliko la dja kuJehova, olo tali ku ulikile kutya Jehova ota ka wanifa po ondjovo oyo a popya: Owa hala omudidimbe, oo u li keetalapa,* u ende wa yuka komesho omanha omulongo, ile ou shune monima omanha omulongo?” 10 Hiskia okwa tya: “Oshipu komudidimbe okuyuka komesho omanha omulongo, ndele itau dulu okushuna monima omanha omulongo.” 11 Onghee omuprofeti Jesaja okwa pula ekwafo kuJehova, oo a ningifa omudidimbe, oo u li keetalapa daAhas, u shune monima omanha omulongo, konima eshi wa hangwa nale wa pitilila po pomanha oo.
12 Pefimbo olo, ohamba yaBabilon, Berodak-baladan, omonamati waBaladan, okwa tumina Hiskia eenhumwafo neeshali, molwaashi okwa uda kutya Hiskia okwa li ta ehama. 13 Hiskia okwe va tambula ko,* ndele te va ulikile eemhungulilo adishe domeumbo laye, oshisilveri, oshingoli, omaadi o-balsam nomaadi akwao ondilo, ponhele opo hapa kala oilwifo yaye, nakeshe shimwe osho shi li meemhungulilo daye. Kape na nande oshinima osho Hiskia ine va ulikila meumbo* laye nosho yo mouhamba waye aushe.
14 Konima yaasho, omuprofeti Jesaja okwe uya kohamba Hiskia, ndele te i pula ta ti: “Ovalumenhu ava ova popya shike, nova dja peni?” Onghee Hiskia okwa ti: “Ova dja kedu lokokule, kuBabilon.” 15 Okwa pula vali, a ti: “Ova mona mo shike meumbo* loye?” Hiskia okwa nyamukula a ti: “Ova mona oinima aishe oyo i li meumbo* lange. Kape na nande oshinima shimwe inandi va ulikila meemhungulilo dange.”
16 Opo nee Jesaja okwa lombwela Hiskia, ta ti: “Uda ondjovo yaJehova. 17 Jehova okwa ti: ‘Tala, omafiku otae uya, noinima aishe, oyo i li meumbo* loye nosho yo oinima aishe, oyo ooxokulululwa va tuvikila fiyo okunena, otai ka twalwa kuBabilon. Kape na nande oshimwe tashi ka fiwa po.’ 18 ‘Vamwe vomovanamati voye, ovo to ka dala, otava ka kufwa po, notava ka ninga omalenga omombala, mombala yohamba yaBabilon.’”
19 Opo nee Hiskia okwa lombwela Jesaja, a ti: “Ondjovo yaJehova oyo a popya oiwa.” Okwa weda ko a ti: “Oshiwa ngeenge otapa ka kala ombili nonghalonawa* pefimbo* lokukalamwenyo kwange.”
20 Ondjokonona aishe yaHiskia, eenghono daye adishe, nghee a xupa etale nosho yo omukangha nanghee a eta omeva moshilando, mbela inai shangwa membo londjokonona yopefimbo leehamba daJuda? 21 Opo nee Hiskia okwa nangekwa pooxekulululwa. Omonamati waye, Manasse, okwa ninga ohamba ponhele yaye.