Omuudifi

8 Olyelye e li ngaashi omunaendunge? Olyelye e shii ekandulepo loupyakadi?* Ounongo ohau ningifa omunhu a kale a hafa koshipala, ponhele yokukala noshipala sha lula.

2 Ohandi ku lombwele kutya: “Dulika komalombwelo ohamba, molwaashi owa ningila Kalunga eano. 3 Ino endelela okudja ko koshipala shayo. Ino popila oshinima shii, osheshi yo otai dulu okuninga keshe osho ya hala, 4 molwaashi ondjovo yohamba oi na okuwanifwa po; olyelye ta dulu oku i pula kutya, ‘Oto ningi ngahelipi?’”

5 Omunhu oo ha diinine oipango ita ka hangwa koshiponga, naao e na omutima u na eendunge ota ka shiiva efimbo la wapala nosho yo omufindalandu.* 6 Osheshi oshinima keshe oshi na efimbo nosho yo omulandu,* molwaashi omaudjuu ovanhu omahapu unene. 7 Molwaashi kape na oo e shii osho tashi ka ningwa, olyelye ta dulu oku mu lombwela nghee tashi ka ningwa?

8 Ngaashi ashike omunhu ita dulu okupangela omhepo,* ile okukelela omhepo, kape na yo omunhu ta dulu okukelela efiku lefyo. Ngaashi ashike omunhu ita dulu okulekelwa pefimbo loita, oukolokoshi nao itau ka efa ovo have u longo va ye onhapo.*

9 Oinima aishe ei onde i mona, nonda konakona oilonga aishe tai longwa koshi yetango, pefimbo opo omunhu ta pangele mukwao note mu monifa oixuna. 10 Nonda mona ovakolokoshi tava pakwa, ovo va li have uya nokudja mo monhele iyapuki. Ashike diva ova ka dimbiwa moshilando omo va li have lihumbatele ngaho. Naashi yo oshongaho elela.

11 Molwaashi ovalongi vowii inava handukilwa diva, omitima dovanhu oda duvila okulonga owii. 12 Nonande omunyoni oku nyone lwefele, ndele ta kala nomwenyo oule wefimbo lile, natango ondi shi shii kutya ovo hava tila Kalunga kashili otashi ke va endela nawa, molwaashi ohave mu tila. 13 Ashike itashi ka endela nawa omukolokoshi noita ka hapupalifa omafiku aye, oo a fa omudidimbe, molwaashi iha tila Kalunga.

14 Ope na oshinima shongaho,* osho tashi longwa kombada yedu: Ope na ovayuki ovo hava ungaungwa navo va fa va longa oukolokoshi, nope na ovakolokoshi ovo hava ungaungwa navo va fa va longa ouyuki. Naasho yo ohandi ti oshongaho elela.

15 Onghee ohandi ladipike omunhu a nyakukwe, molwaashi kape na sha vali shimwe shi li xwepo koshi yetango shi dulife okulya nokunwa nokunyakukwa; osho osho e na okuninga, eshi ta longo noudiinini momafiku aeshe okukalamwenyo kwaye, oo Kalunga kashili e mu pa koshi yetango.

16 Onda kendabala okukonga ounongo, opo ndi mone omalipyakidilo,* oo e lipyakidilwa nao kombada yedu, nokuli nonande otashi pula ndiha kofe omutenya noufiku.* 17 Opo nee onda konakona oilonga yaKalunga kashili, nonda didilika kutya ovanhu itava dulu okuuda ko oinima oyo tai ningwa koshi yetango. Kutya nee ova kendabale shi fike peni, kave na efiku ve i ude ko. Nonande ova kale ve udite kutya otava dulu oku i shiiva, molwaashi ve litala ko ovanaendunge, itava dulu oku i uda ko naanaa.