Levitikus

27 Jehova okwa twikila okupopya naMoses, ta ti: 2 “Popya nOvaisrael u va lombwele kutya, ‘Ngeenge omunhu okwa ningi eano le likalekelwa a yandje kuJehova omuvalu woimaliwa i fike pwaayo ya tengenekelwa ongushu yomunhu,* 3 ongushu oyo ya tengenekelwa omulumenhu, oo e na eedula okudja po 20 fiyo opo 60, otai kala i fike peesekeli* 50 doshisilveri she likolelela kosekeli* yomonhele iyapuki.* 4 Ashike ngeenge omukainhu, ongushu oyo ya tengenekwa otai kala i fike peesekeli 30. 5 Ngeenge omunhu oku na eedula okudja 5 fiyo opo 20, ongushu oyo ya tengenekelwa omulumenhu otai kala i fike peesekeli 20, nomukainhu opeesekeli 10. 6 Ngeenge oku na okudja pomwedi umwe fiyo opeedula nhano, ongushu oyo ya tengenekelwa omulumenhu otai kala i fike peesekeli nhano doshisilveri, nomukainhu opeesekeli nhatu doshisilveri.

7 “‘Ngeenge oku na eedula 60, ile di dulife po, ongushu oyo ya tengenekelwa omulumenhu otai kala i fike peesekeli 15, nomukainhu opeesekeli 10. 8 Ngeenge omunhu okwa hepa unene, noita dulu okufuta ondado oyo ya tengenekwa, oku na okuya komupristeri, nomupristeri ota ka tula po ondado oyo omunhu e na okufuta. Omupristeri ota ka ninga omapekapeko she likolelela kwaasho omunhu, oo a ninga eano, ta dulu okuyandja.

9 “‘Ngeenge eano ola kwatela mo oshinamwenyo osho tashi wapalele okuyambelwa Jehova, keshe osho tashi dulu okuyandjelwa Jehova otashi ningi oshinima shiyapuki. 10 Omunhu oo ke na oku shi lundulula ile okupingakanifa osho shiwa naasho shii, ile osho shii naasho shiwa. Ashike ngeenge ota pingakanifa oshinamwenyo shimwe noshinamwenyo shikwao, oshinamwenyo shotete naasho a pingakanifa nasho, aishe otai ningi iyapuki. 11 Ngeenge oshinamwenyo inashi koshoka, osho itashi dulu okuyandjwa shi li eyambo kuJehova, oku na okutwala oshinamwenyo osho komupristeri. 12 Opo nee omupristeri ota ka tula po ongushu yasho, kashi na nee mbudi kutya oshiwa, ile oshii. Ongushu oyo ya tengenekwa komupristeri oyo tai kala po. 13 Ashike ngeenge okwa hala oku shi landulula ko, oku na okuyandja oshititano shasho, tashi wedwa kondado oyo ya tengenekwa.

14 “‘Ngeenge omulumenhu ota yapula eumbo laye li li oshinima shiyapuki kuJehova, omupristeri ota ka tula po ondado yalo, kutya nee oliwa, ile olii. Ofuto yalo otai ka kala ye likolelela kondado oyo ya tulwa po komupristeri. 15 Ashike ngeenge oo a yapula eumbo laye okwa hala oku li landulula ko, oku na okuyandja oshititano shoimaliwa tashi wedwa kondado oyo ya tengenekwa, notali ningi laye.

16 “‘Ngeenge omulumenhu ota yapulile Jehova imwe yomoilikolomwa yomepya laye, ongushu yalo otai ka tengenekwa she likolelela kombuto oyo ya pumbiwa, opo li kunwe: o-homer* yombuto yo-barley otai kala i fike peesekeli 50 doshisilveri. 17 Ngeenge ota yapula epya laye okudja momudo wEkuwililo, ondado oyo ya tengenekwa oyo tai kala po. 18 Ngeenge ota yapula epya laye konima yomudo wEkuwililo, omupristeri oku na okuvalula pamwe naye ondado ya yeleka eedula odo da fyaala ko fiyo omomudo wEkuwililo wa shikula ko, nomomuvalu oo wa tengenekwa omu na okukufwa omuvalu oo. 19 Ngeenge oo a yapula epya ote ke li landulula ko, oku na okuyandja oshititano shoimaliwa tashi wedwa kondado oyo ya tengenekwa, notali kala laye. 20 Ngeenge epya ite li landulula ko, ndele tali landifwa po komulumenhu umwe, itali dulu vali okulandululwa ko. 21 Ngeenge epya ola yandjwa momudo wEkuwililo, otali ningi oshinima shiyapuki kuJehova, li li epya olo le mu yandjelwa. Otali ningi oshitukulwa shovapristeri.

22 “‘Ngeenge omulumenhu ota yapulile Jehova epya e li landa, olo lihe fi oshitukulwa shefyuululo laye, 23 omupristeri ote ke mu valulila ondado yalo fiyo omomudo wEkuwililo nota ka yandja ondado oyo ya tengenekwa mefiku olo. Oli li oshinima shiyapuki kuJehova. 24 Momudo wEkuwililo, epya otali ka shunifwa kumwene wedu olo, oko e li landele.

25 “‘Ongushu yoshinima keshe oi na okuyelekwa she likolelela kosekeli* yomonhele iyapuki. Osekeli imwe oi na okukala i fike peegera* 20.

26 “‘Ashike kape na oo e na okuyapula oshinamwenyo osho sha dalwa tete, molwaashi osho sha dalwa tete oshaJehova. Kutya nee ongobe yomhedi, ile odi, oyaJehova nale. 27 Ngeenge oshimwe shomoinamwenyo oyo inai koshoka, ndele te shi pingakanifa she likolelela kondado oyo ya tengenekwa, oku na okuyandja oshititano tashi wedwa kusho. Ashike ngeenge inashi landululwa ko, otashi ka landifwa po she likolelela kondado oyo ya tengenekwa.

28 “‘Oshinima keshe osho omunhu a yapulila filufilu Jehova okudja moiniwe yaye, itashi dulu okulandifwa po, ile okulandwa ko, kutya nee ovanhu, ile oimuna, ile epya laye. Keshe osho sha yapulilwa Jehova oshi na okutalwa ko shiyapuki elela nonokutya oshaye. 29 Natango, omunhu keshe a tokolelwa ehanauno nokwe likalekelwa, ita dulu okukulilwa. Oku na okudipawa filufilu.

30 “‘Oshitimulongo shakeshe osho tashi mene medu, kutya nee oikunomwa yomomapya, ile oiimati yomiti, oshaJehova. Oshi li oshinima shiyapuki kuJehova. 31 Ngeenge omulumenhu okwa hala okulandulula ko oshitukulwa shaye keshe oshitimulongo, oku na okuyandja oshititano tashi wedwa kusho. 32 Oshitimulongo keshe shoufita woimuna, aishe oyo hai valulwa komufita nodibo, oshitimulongo shoimuna* otashi ningi oshinima shiyapuki kuJehova. 33 Ke na oku shi konakona, kutya nee oshiwa, ile oshii, noke na oku shi pingakanifa. Ashike ngeenge okwa kendabala oku shi pingakanifa, aishe, oshinamwenyo shotete naasho a pingakanifa nasho, otai ningi oshinima shiyapuki. Itai dulu okulandululwa ko.’”

34 Oyo oyo oipango oyo Jehova a yandja kOvaisrael okupitila muMoses kOmhunda yaSinai.