Jesaja
43 Paife eshi osho Jehova,
Omushiti woye, ove Jakob, oo e ku ma, ove Israel, ta ti:
“Ino kala wa tila, osheshi onde ku kulila.
Onde ku ifana kedina.
Ove owange.
2 Ngeenge to piti momeva, ohandi ka kala pamwe naave,
Nongeenge to taulula omilonga, itadi ku kungulula po.
Ngeenge to ende momundilo, ito ka lungwina,
Nelaka lomundilo itali ku xwike.
3 Osheshi aame Jehova Kalunga koye,
Omuyapuki waIsrael, Omuxupifi woye.
Onda yandja Egipiti onga eyambo omolwoye,
Etiopia naSeba ponhele yoye.
4 Osheshi paife ou na ondilo momesho ange,
Owa li wa fimanekwa, nonda kala ndi ku hole.
Onghee ohandi yandje ovanhu ponhele yoye,
Noiwana omolwomwenyo woye.
5 Ino kala wa tila, osheshi ondi li pamwe naave.
Oludalo loye ohandi ke li tala ko koushilo,
Nohandi ke ku ongela pamwe okudja kouninginino.
6 Ohandi lombwele olundume, ‘Va yandja.’
Nolukadi, ‘Ino va anyena.
Eteni ovanamati vange okudja kokulekule, novanakadona vange okudja kominghulo dedu,
7 Keshe oo ha ifanwa nedina lange,
Naao nda shita omolwefimano lange,
Oo nda shita, nonda ma.’
8 Pitifeni mo ovanhu, ovo ovapofi, nonande ove na omesho,
Neembolo, nonande ove na omatwi.
9 Oiwana aishe nai ongelwe ponhele imwe,
Novanhu nava ongelwe pamwe.
Olyelye mokati kavo ta dulu oku tu lombwela oshinima eshi?
Ile ta dulu oku tu ningifa tu ude oinima yotete?*
Nava ete eendombwedi davo, va ulike kutya ove li mondjila,
Ile nava ude, ndele tava ti, ‘Oshoshili!’”
10 “Onye eendombwedi dange,” Jehova osho ta ti,
“Heeno, omupiya wange, oo nda hoolola,
Opo mu shiive, nomu kale mu na eitavelo mwaame*
Nokuuda ko kutya ondi li ngaashi Nda kala.
Kape na Kalunga a shitwa komesho yange,
Nokonima yange, kaku na umwe.
11 Ame, aame Jehova, nokape na vali omuxupifi umwe ehe fi ame.”
12 “Aame nda shiivifa, nonda xupifa, nonda holola,
Ofimbo paha li kalunga wokoilongo mokati keni.
Onghee onye eendombwedi dange,” Jehova osho ta ti, “nAame aame Kalunga.
13 Natango ondi li ngaashi Nda kala alushe;
Nokape na ou ta nyeke mo sha meke lange.
Ngeenge handi longo sha, olyelye ta dulu oku shi kelela?”
14 Eshi osho Jehova, Omukulili weni, Omuyapuki waIsrael, ta ti:
“Omolweni, ohandi tumu kuBabilon noku ka tala ko oihakifo aishe yomivelo,
NOvakaldea, ve li meeskepa davo, otava ka lila omolwoudjuu.
15 Aame Jehova, Omuyapuki weni, Omushiti waIsrael, Ohamba yeni.”
16 Eshi osho Jehova ta ti,
Oo ta ningi ondjila mefuta,
Nokuli nelila momeva taa ndwafuka,
17 Oo ta shi li mo etemba loita nosho yo onghambe,
Etangakwaita pamwe novakwaita ovanaenghono:
“Otava wile po, noitava fikama po.
Otava dimwa po, tava dimwa po ngaashi olamba tai dimwa.”
18 “Inamu dimbuluka oinima yonale,
Noinamu lipula nonakudiwa.
19 Taleni! Ohandi ningi oshinima shipe;
Notashi hovele paife nokuli.
Mbela inamu shi didilika?
Ohandi ningi ondjila ya enda mombuwa,
Nomilonga da pita mombuwa.
20 Oifitukuti otai ka fimaneka nge,
Ookavandje neemho,
Osheshi onda tula omeva mombuwa,
Omilonga mombuwa,
Opo ovanhu vange, ovahoololwa vange, va nwe,
21 Ovanhu ovo nde lishitila,
Opo va dule okutanga nge.
22 Ashike ino ifana nge, ove Jakob,
Molwaashi owa loloka nge, ove Israel.
23 Ino etela nge eedi domaxwikiloyambo oye aeshe,
Ile u fimanekife nge nomayambo oye.
Inandi ku fininika u etele nge oshali,
Noinandi ku lolokifa mokukomangela eka ledimba liwa.
24 Ino landela nge okalamus* noimaliwa yoye,
Noino kutifa nge noinghene yomayambo oye.
Ponhele yaasho, owa twika nge oudjuu nomanyono oye,
Nowa lolokifa nge nomapuko oye.
25 Ame, aame oo handi dimi po omatauluko* oye omolwedina lange,
Noitandi dimbuluka omanyono oye.
26 Dimbulukifei nge; natu lihokololifeni;
Popyeni ehokololo leni, mu ulike kutya omu li mondjila.
27 Xokulululwa weni wotete okwa nyona,
Novapopikalelipo* veni ova tukululila nge oshibofa.
28 Onghee omalenga omonhele iyapuki ohandi ke a tala ko inaa koshoka,
Nohandi ka yandja Jakob, a hanaunwe po,
Na Israel ohandi ke mu efa a tukwe.