Jeremia
23 “Woo ovafita, ovo tava hanauna po nokuhalakanifa eedi doulifilo wange!” Jehova osho ta ti.
2 Onghee hano, eshi osho Jehova, Kalunga kaIsrael, ta ti shi na sha novafita, ovo tava lifa ovanhu vange: “Omwa halakanifa eedi dange; omwa twikila oku di halakanifa, noinamu di pa elitulemo.”
“Onghee ohandi ke mu handukila omolwoilonga yeni ii,” Jehova osho ta ti.
3 “Opo nee ohandi ka ongela pamwe oshixupe sheedi dange okudja koilongo aishe, oko nde di halakanifila, nohandi ke di alulila koulifilo wado, notadi ka dalafana nokuhapupala. 4 Nohandi ke di kongela ovafita, ovo tave ke di lifa shili. Itadi ka mbadapala vali, ile di tilifwe, nokape na nande oimwe tai ka kana,” Jehova osho ta ti.
5 “Tala! Omafiku ota e uya,” Jehova osho ta ti, “eshi handi ka tutumifila David oshitai* shouyuki, nohamba otai ka pangela nokuulika eendunge nokulonga ouyuki naasho sha yuka moshilongo. 6 Pefimbo layo, Juda ota ka xupifwa, na Israel ota ka kala meameno. Naali olo edina olo ta ka ifanwa: Jehova Oye Ouyuki Wetu.”
7 “Ashike omafiku ota e uya,” Jehova osho ta ti, “eshi itava ka tya vali, ‘Oshili, ofimbo Jehova e na omwenyo, oo a kufa oshiwana shaIsrael medu laEgipiti!’ 8 Ndele ponhele yaasho, otava ka tya, ‘Oshili, ofimbo Jehova e na omwenyo, oo a kufa mo nokwaalula oludalo lomeumbo laIsrael medu lokolundume nokomadu aeshe, oko nda li nde va halakanifila,’ notava ka kala medu lavo vene.”
9 Shi na sha novaprofeti ohandi ti:
Omutima wange owa teyauka mwaame.
Omakipa ange aeshe otaa kakama.
Onda fa omunhu a kolwa
Nonda fa omunhu a dulika eenghono komaviinyu,
OmolwaJehova nomolweendjovo daye diyapuki.
10 Osheshi edu oli yadi ovahaeli;
Edu ola nyika oluhodi omolwefingo
Nomaulifilo omombuwa okwa kukuta.
Ondjila yavo oii nohava longifa nai eenghono davo.
11 “Aveshe, omuprofeti nomupristeri, ova nyonauka.*
Nokuli nomeumbo lange onda hanga mo owii wavo,” Jehova osho ta ti.
12 “Onghee elila lavo otali ka ninga omufenu nomulaulu;
Otava ka undulwa, ndele tava wile po.
Osheshi ohandi ke va tumina oupyakadi
Momudo wetokolo,” Jehova osho ta ti.
13 “Nomovaprofeti vomuSamaria onda mona mo oshinima shitondifa.
Omaxunganeko avo okwa nwefwa mo kuBaal,
Nohava pukifa oshiwana shange, Israel.
14 Nomovaprofeti vomuJerusalem onda mona mo oinima inyanyalifi.
Kwaame aveshe ova fa Sodom,
Novakalimo vamo ova fa Gomorra.”
15 Onghee hano, eshi osho Jehova womatangakwaita ta ti shi na sha novaprofeti:
“Paife ohandi va ningifa va lye oshimbodi shilula
Nohandi va pe omeva e na oudiyo va nwe.
Osheshi oushunimonima owe lihanena moshilongo ashishe okudja kovaprofeti vomuJerusalem.”
16 Eshi osho Jehova womatangakwaita ta ti:
“Inamu pwilikina keendjovo dovaprofeti, ovo tave mu xunganekele.
Otave mu pukifa.*
Emoniko, olo tava popi, ola dja momitima davo vene,
Inali dja mokanya kaJehova.
17 Otava lombwele ovo inava fimaneka nge lwoikando noikando tava ti,
‘Jehova okwa ti: “Otamu ka hafela ombili.”’
Nokukeshe oo ha shikula omutima waye a tangalala, ohava ti,
‘Kape na oupyakadi washa tau ke mu hanga.’
18 Osheshi olyelye a li mokati kongudu yookaume kaJehova,
Opo a mone noku ude ondjovo yaye?
Olyelye a yandja elitulemo kondjovo yaye, opo e i ude?
19 Tala! Oshikungulu shomhepo shaJehova otashi tukuluka mehandu;
Ngaashi efudaela linene tali dingonoka kombada yomitwe dovakolokoshi.
20 Ehandu laJehova itali ka lota
Fiyo osheshi a wanifa po nokwa hanga omahalo omutima waye.
Pexulilo lomafiku otamu ka uda ko filufilu oshinima eshi.
21 Inandi tuma ovaprofeti, ashike ova tondoka.
Inandi popya navo, ashike ova xunganeka.
22 Ashike ngeno ova kalele mokati kongudu yookaume kange,
Ngeno ova ningifa ovanhu vange va ude eendjovo dange
Nove va ningifa ngeno va efe po ondjila yavo ii nosho yo oilonga yavo ii.”
23 “Mbela aame ashike Kalunga kopopepi,” Jehova osho ta ti, “ndele nghi fi yo Kalunga kokokule?”
24 “Mbela ope na ngoo omunhu ta dulu okuhondama monhele omo itandi dulu oku mu mona?” Jehova osho ta ti.
“Mbela kandi li yo meulu nosho yo kombada yedu?” Jehova osho ta ti.
25 “Onda uda ovaprofeti, ovo tava xunganeke oipupulu medina lange, tava ti, ‘Onda twa ondjodi! Onda twa ondjodi!’ 26 Fiyo onaini oshinima eshi tashi twikile momitima dovaprofeti, va xunganeke oipupulu? Vo ovaprofeti voukengeleledi womitima davo vene. 27 Ova hala okudimbwifa ovanhu vange edina lange okupitila meendjodi odo hava lombwelafana, ngaashi ashike ooxe va dimbwa edina lange omolwaBaal. 28 Omuprofeti, oo a twa ondjodi, na popye ondjodi, ashike oo e na ondjovo yange na popye ondjovo yange moshili.”
“Oihati oi na ekwatafano lashike noilya?” Jehova osho ta ti.
29 “Mbela ondjovo yange kai li ngaashi omundilo,” Jehova osho ta ti, “nongaashi ohamala yokuhambulifa oyo hai tataula omamanya?”
30 “Onghee paife ame ohandi ka handukila ovaprofeti,” Jehova osho ta ti, “ovo hava vake eendjovo dange kuvamwe.”
31 “Paife ame ohandi ka handukila ovaprofeti,” Jehova osho ta ti, “ovo hava longifa elaka lavo va tye, ‘Ye osho a ti!’”
32 “Paife ohandi ka handukila ovaprofeti veendjodi doipupulu,” Jehova osho ta ti, “ovo have di popi nokupukifa ovanhu vange omolwoipupulu yavo nosho yo okulitanga kwavo.”
“Ashike ame inandi va tuma, ile ndi va lombwele sha. Onghee itava ka etela ovanhu ava ouwa washa nandenande.” Jehova osho ta ti.
33 “Nongeenge ovanhu ava, ile omuprofeti, ile omupristeri ove ku pula kutya, ‘omutengi* waJehova oulipi?’ ou na oku va nyamukula to ti, ‘“Nye ovanhu onye omutengi! Nohandi ke mu ekelashi,” Jehova osho ta ti.’ 34 Shi na sha novaprofeti, ile ovapristeri, ile ovanhu ovo hava ti, ‘Ou oo omutengi* waJehova!’ ohandi ka handukila omunhu oo nosho yo ovaneumbo laye. 35 Eshi osho keshe umwe womunye ta pula mukwao nosho yo omumwaxe ta ti, ‘Jehova okwa nyamukula ngahelipi? Na Jehova okwa popya shike?’ 36 Ashike inamu tumbula vali omutengi* waJehova, osheshi omutengi* oo oo ondjovo yakeshe umwe, nomwa lundulula eendjovo daKalunga omunamwenyo, Jehova womatangakwaita, Kalunga ketu.
37 “Eshi osho u na okupula omuprofeti, ‘Jehova okwe ku nyamukula ngahelipi? Na Jehova okwa popya shike? 38 Nongeenge omwa twikile okutya, “omutengi* waJehova!” eshi osho Jehova ta ti: “Molwaashi ohamu ti, ‘Ondjovo ei oyo omutengi* waJehova,’ konima eshi nde mu lombwela kutya, ‘Inamu tya: “Omutengi* waJehova!”’ 39 Taleni! Ohandi ke mu tumba po noku mu kupulashi mu dje nge momesho, nye nosho yo oshilando, osho nde mu pa nosho yo ooxokulululwa. 40 Nohandi ke mu fifa ohoni yaalushe nosho yo elengwa laalushe, olo itali ka dimbuwa.”’”