Jeremia
7 Ei oyo ondjovo oyo ye uya kuJeremia ya dja kuJehova tai ti: 2 “Kala ofika poshivelo sheumbo laJehova nokuudifila po etumwalaka eli, ‘Pwilikineni ondjovo yaJehova, ovanhu nye amushe vomuJuda ovo hamu piti poivelo ei mu ke linyongamene Jehova. 3 Eshi osho Jehova womatangakwaita, Kalunga kaIsrael, ta ti: “Lundululeni eendjila deni nosho yo eenghatu deni, nohandi ke mu pitika mu twikile okukala monhele ei. 4 Inamu lineekela meendjovo domapukifo, ndele tamu ti, ‘Ei oyo* otembeli yaJehova, otembeli yaJehova, otembeli yaJehova!’ 5 Ndele ngeenge omwa lundulula shili eendjila deni nosho yo eenghatu deni; ngeenge omwa diinine shili ouyuki pokati komunhu namukwao; 6 ngeenge itamu fininike ovanailongo, eefiye* nosho yo ovafiyekadi; ngeenge itamu tileshi ohonde ihe na etimba monhele ei; nongeenge itamu shikula ookalunga vamwe mu liyehameke nye vene; 7 opo ashike handi ke mu pitika mu kale monhele ei, medu olo nda pa ooxokulululwa fiyo alushe.”’”*
8 “Ashike omwa tula elineekelo leni meendjovo domapukifo . . . itadi eta nandenande ouwa washa. 9 Mbela otamu dulu okuvaka, okudipaa, okuhaela, okwaana oipupulu, okuyambela Baal omayambo* nokushikula ookalunga ovo muhe shii, 10 ndele tamu uya nokukala ofika moipafi yange meumbo eli la lukilwa edina lange, ndele tamu ti, ‘Ohatu ka xupifwa,’ nonande omwa ninga oinima aishe ei itondifa? 11 Mbela eumbo eli la lukilwa edina lange ola ninga ekololo lovanyeki momesho eni? Onde shi limonena ame mwene,” Jehova osho ta ti.
12 “‘Onghee hano, inda paife konhele yange muSilo, oko nda ningifa tete edina lange li fimanekwe, nokutala osho nde i ningila omolwowii woshiwana shange, Israel. 13 Ashike omwa kala nokuninga oinima aishe ei,’ Jehova osho ta ti, ‘nokuli nonande onda kala nokupopya nanye oikando noikando,* inamu pwilikina. Onda kala handi mu ifana, ndele inamu nyamukula. 14 Onghee osho handi ka ningila eumbo olo la lukilwa edina lange, olo mwe lineekela, nonhele ei nde mu pa nosho yo ooxokulululwa, ngaashi ashike nda ningila Silo. 15 Ohandi ke mu ekelashi mu dje nge momesho, ngaashi ashike nda ekelashi ovamwaxo aveshe, oludalo alishe laEfraim.’
16 Ashike ove ino ilikana ponhele yovanhu ava. Ino lila, ile u ilikane, ile u indile nge ponhele yavo, osheshi itandi ke ku pwilikina. 17 Mbela ku wete osho tava ningi moilando yaJuda nosho yo momapandavanda aJerusalem? 18 Ovanamati otava tyava oikuni, ooxe otava tema omundilo, novakulukadi otava lungu olumbololo, opo va yambele Ohambakainhu yokEulu* oikuki yomayambo, notava tilileshi ookalunga vamwe oikunwayambo, opo va handukife nge. 19 ‘Ndele mbela aame ngoo tava ehameke?’* Jehova osho ta ti. ‘Mbela havo vene tave lififa ohoni?’ 20 Onghee hano, eshi osho Omwene Omunamapangelo aeshe, Jehova, ta ti, ‘Tala, ehandu lange nosho yo onya yange otai ka tilwa kombada yonhele ei, kovanhu nosho yo koinamwenyo, komiti domoixwa nosho yo koiimati yedu; otali ka xwama noitali ka dimwa.’
21 Eshi osho Jehova womatangakwaita, Kalunga kaIsrael, ta ti, ‘Puleni komesho nokuweda omaxwikiloyambo eni aeshe komayambo eni makwao, nokulya ombelela nye vene. 22 Osheshi okudja efiku olo nda kufa ooxokulululwa medu laEgipiti, inandi popya navo, ile ndi va pe oshipango shi na sha nomaxwikiloyambo aeshe nosho yo omayambo makwao. 23 Ashike onde va pa oshipango eshi: “Dulikeni kondaka yange, nohandi ka ninga Kalunga keni, notamu ka ninga oshiwana shange. Omu na okweenda mondjila aishe oyo nde mu lombwela, opo shi mu endele nawa.”’ 24 Ashike inava pwilikina, ile va pakaleke omatwi avo; ponhele yaasho, ova enda paemhangela* davo vene, tava shikula omitima davo dikolokoshi va tangalala, nova shuna monima ponhele yokuya komesho, 25 okudja mefiku olo ooxokulululwa va dja medu laEgipiti fiyo efiku eli. Onghee onda kala nokutuma ovapiya vange aveshe ovaprofeti kunye, handi va tumu efiku keshe, oikando noikando.* 26 Ashike ova anya okupwilikina kwaame, noinava pakaleka omatwi avo. Ponhele yaasho, ova li ovatangalali,* neenghatu davo odii unene di dulife dooxekulululwa!
27 “Oto ke va lombwela eendjovo adishe edi, ashike itave ke ku pwilikina; oto ke va ifana, ashike itave ke ku nyamukula. 28 Noto ka tya kuvo, ‘Eshi oshiwana osho inashi dulika kondaka yaJehova Kalunga kasho, nosha anya okutambula ko outekuduliko. Oudiinini owa xula po noihau tumbulwa mo nokuli mokati kavo.’*
29 Kululeni ko eexwiki deni odo inadi tetwa* noku di kupulashi, nokwiimba eimbilo loluhodi* koikulundudu ihe na sha, osheshi Jehova okwa ekelashi nota ka hauluka epupi eli le mu handukifa. 30 ‘Osheshi ovanhu vomuJuda ova longa osho shii momesho ange,’ Jehova osho ta ti. ‘Ova tula oihongwafano yavo itondifa meumbo olo la lukilwa edina lange, opo ve li nyateke. 31 Ova tunga eenhele dokoikulundudu daTofet, odo di li mEfilu lOmonamati waHinnom,* opo va xwike ovanamati vavo nosho yo ovanakadona vavo momundilo, oshinima osho inandi va lombwela noinashi uya mo nokuli nande onale momutima wange.’*
32 “‘Onghee hano, tala! omafiku otae uya,” Jehova osho ta ti, ‘eshi itali ka ifanwa vali Tofet, ile Efilu lOmonamati waHinnom,* ndele Efilu lOkudipaela. Otava ka paka muTofet fiyo osheshi pehe na vali onhele ya xupa po. 33 Noimhu yovanhu ava otai ka ninga oikulya yeedila dokeulu noyoifitukuti yokombada yedu, nopehe na oo te i taataa po. 34 Ohandi ka xulifa po ondaka yenyaku nosho yo ondaka yehafo, ewi lomuhomboli nosho yo ondaka yomuhombolwa moilando yaJuda nosho yo momapandavanda aJerusalem, osheshi oshilongo otashi ka ninga oikulukuma.’”