Eehamba eenhivali
8 Elisa okwa lombwela ina yomumati, oo a nyumuna, a ti: “Fikama, ndele to i, ove pamwe noukwaneumbo woye noku ka kala mu li ovanailongo, keshe oko tamu i, molwaashi Jehova okwa popya kutya, medu eli otamu ka kala ondjala oule weedula heyali.” 2 Opo nee omukainhu okwa fikama, ndele ta ningi ngaashi a lombwelwa komupiya waKalunga kashili. Okwa ya pamwe noukwaneumbo waye, ndele ta ka kala ha di medu lOvafilisti oule weedula heyali.
3 Konima yeedula heyali, omukainhu okwa aluka okudja kedu lOvafilisti, ndele ta i kohamba, a ka indile ko eumbo nosho yo epya laye. 4 Ohamba oya hangwa tai popi naGehasi, omuyakuli womupiya waKalunga kashili, tai ti: “Alikana, lombwele nge oilonga aishe inene, oyo Elisa a longa.” 5 Ofimbo ta hokololele ohamba nghee Elisa a nyumuna omufi, omukainhu, oo omonamati waye a nyumunwa kuElisa, okwe uya kohamba, ta indile eumbo nosho yo epya laye. Opo nee Gehasi okwa ti: “Omwene wange ohamba, omukainhu ou omonamati waye a nyumunwa kuElisa, oye ngaha.” 6 Ohamba oya pula omukainhu, ndele te i lombwele ehokololo. Opo nee ohamba oya ifana elenga lomombala, ndele tai li lombwele, tai ti: “Mu shunifila oinima yaye aishe, noilikolomwa aishe yomepya, okudja kefiku olo a dja moshilongo fiyo opaife.”
7 Elisa okwe uya kuDamaskus, eshi Benhadad, ohamba yaSiria, a li ta vele. Onghee okwa shiivifilwa kutya: “Omupiya waKalunga kashili okwe uya kuDamaskus.” 8 Ohamba oya lombwela Hasael, ya ti: “Kufa eeshali, ndele to i, u ka shakeneke omupiya waKalunga kashili. Pula kuJehova okupitila muye, ngeenge ‘Ohandi ka veluka tuu koudu ou?’” 9 Hasael okwa ya e ke mu shakeneke, nokwe mu twaalela eeshali, oinima iwa yokuDamaskus yomaludi aeshe, omitwalo da humbatwa keengamelo 40. Okwe uya, nokwa fikama puye, ndele ta ti: “Omonamati woye, Benhadad, ohamba yaSiria, okwa tuma nge kwoove ndi ku pule kutya, ‘Ohandi ka veluka tuu koudu ou?’” 10 Elisa okwe mu nyamukula, a ti: “Inda u ke mu lombwele ngaha, ‘Oto ka veluka filufilu,’ ashike Jehova okwa ulikila nge kutya, ota ka fya shili.” 11 Hasael okwa kala te mu tale, fiyo osheshi a fya ohoni. Opo nee omupiya waKalunga kashili okwa hovela okulila. 12 Hasael okwe mu pula, a ti: “Omwene wange ota lilile shike?” Okwe mu nyamukula, a ti: “Molwaashi ondi shii owii oo to ka ningila Ovaisrael. Eenhele davo di na omakuma male oto ke di xwika po nomundilo, ovalumenhu vavo ovanaenghono oto ke va dipaa neongamukonda, ovana vavo oto ke va tetaula moinhimbu novakulukadi vavo ovafimba oto ke va taula momadimo.” 13 Hasael okwe mu nyamukula, a ti: “Omupiya woye, oo e li ombwa yongaho, ota ka dula ngahelipi okuninga oshinima shi fike opo?” Ashike Elisa okwe mu lombwela, a ti: “Jehova okwa ulikila nge kutya, oove to ka ninga ohamba yaSiria.”
14 Opo nee Hasael okwa dja po puElisa, ndele ta shuna komwene waye, oo e mu pula, a ti: “Elisa okwe ku lombwela shike?” Okwe mu nyamukula, a ti: “Okwa lombwela nge kutya oto ka veluka filufilu.” 15 Mefiku la shikula ko, Hasael okwa kufa ekumbafa nokwe li yaveka momeva, ndele te li mu tuvikilifa* koshipala, fiyo osheshi a fya. Hasael okwa ninga ohamba ponhele yaye.
16 Momudo omutitano wepangelo laJehoram, omonamati waAhab, ohamba yaIsrael, ofimbo Josafat a li ohamba yaJuda, Jehoram, omonamati waJosafat, ohamba yaJuda, okwa ninga ohamba. 17 Okwa li e na eedula 32, eshi a ninga ohamba, nokwa pangela muJerusalem oule weedula hetatu. 18 Okwa enda mondjila yeehamba daIsrael, ngaashi ashike ovanhu vomeumbo laAhab va ninga, molwaashi okwa li a hombola omonakadona waAhab; okwa twikila okulonga osho shii momesho aJehova. 19 Ashike Jehova ka li a hala okuhanauna po Juda omolwomupiya waye, David, molwaashi okwe mu udanekela kutya ye novanamati vaye ote ke va pa alushe olamba.
20 Pefimbo laJehoram, Edom okwa li a pilukila po Juda, nokwa li a nangeka po ohamba yaye mwene. 21 Onghee Jehoram okwa ya kuSair pamwe nomatemba aye aeshe oita. Okwa fikama oufiku nokwa finda Ovaedom, ovo va li ve mu dingilila, nosho yo ovawiliki vomatemba. Opo nee ovakwaita ova ya onhapo komatwali avo. 22 Ndele Edom okwa kala ta pilukile po Juda fiyo okunena eli. Libna naye okwa li yo a pilukila po Juda pefimbo opo.
23 Ondjokonona aishe yaJehoram, ashishe osho a ninga, mbela inai shangwa membo londjokonona yopefimbo leehamba daJuda? 24 Opo nee Jehoram okwa nangekwa pooxekulululwa, nokwa pakwa pooxekulululwa mOshilando shaDavid. Omonamati waye, Ahasia, okwa ninga ohamba ponhele yaye.
25 Momudo omuti-12 wepangelo laJehoram, omonamati waAhab, ohamba yaIsrael, Ahasia, omonamati waJehoram, ohamba yaJuda, okwa ninga ohamba. 26 Ahasia okwa li e na eedula 22, eshi a ninga ohamba, nokwa pangela muJerusalem omudo umwe. Ina oAtalia, omutekulu* waOmri, ohamba yaIsrael. 27 Okwa enda mondjila, oyo ya endwa koukwaneumbo waAhab, nokwa twikila okulonga osho shii momesho aJehova, ngaashi eumbo laAhab, molwaashi xe okwa li a hombola omukainhu womoukwaneumbo waAhab. 28 Okwa ya pamwe naJehoram, omonamati waAhab, va ka lwife Hasael, ohamba yaSiria, puRamot-gilead, ashike Ovasiria ova ehameka Jehoram. 29 Onghee ohamba Jehoram oya shuna kuJisreel, i ka veluke koipute oyo Ovasiria ve i yashela puRama, eshi ya li tai lwifa Hasael, ohamba yaSiria. Ahasia, omonamati waJehoram, ohamba yaJuda, okwa ya kuJisreel a ka talele po Jehoram, omonamati waAhab, molwaashi okwa li a ehamekwa.*