Hesekiel

14 Navamwe vomovakulunhu vaIsrael ove uya, ndele tava kala omutumba komesho yange. 2 Opo nee ondjovo yaJehova oye uya kwaame tai ti: 3 “Omona womunhu, ovalumenhu ava ova tokola okushikula oikalunga yavo itondifa,* nova tula po oshipundukifo, osho hashi ningifa ovanhu va nyone. Mbela nandi va pitike va pule nge sha? 4 Paife popya navo, ndele to va lombwele kutya, ‘Eshi osho Omwene Omunamapangelo aeshe, Jehova, ta ti: “Ngeenge Omuisrael okwa tokola okushikula oikalunga yaye itondifa nokutula po oshipundukifo, tashi ningifa ovanhu va nyone, opo nee te uya a pule sha komuprofeti, ame, Jehova, ohandi ke mu nyamukula shili she likolelela koikalunga yaye ihapu itondifa. 5 Osheshi ohandi ka etifa oumbada momitima deumbo laIsrael,* molwaashi aveshe ova hauluka nge nova shikula oikalunga yavo itondifa.”’

6 “Onghee lombwela eumbo laIsrael to ti, ‘Eshi osho Omwene Omunamapangelo aeshe, Jehova, ta ti: “Alukeni, nokweefa po oikalunga yeni itondifa, ndele tamu pungulula ko oipala yeni koilonga yeni aishe itondifa. 7 Osheshi ngeenge Omuisrael keshe, ile omunailongo, oo ha di muIsrael, okwe litongola ko ye mwene kwaame, ndele ta tokola okushikula oikalunga yaye itondifa, nokutula po oshipundukifo, osho tashi ningifa ovanhu va nyone, opo nee te uya a pule omuprofeti wange, ame, Jehova, ohandi ke mu nyamukula ame mwene. 8 Ohandi ka taalelifa oshipala shange omulumenhu oo, noku mu ninga edidiliko lelondwelo nosho yo lomunghapo, nohandi ke mu kufa* mo movanhu vange; nomu na oku ka shiiva kutya aame Jehova.”’

9 “‘Ashike ngeenge omuprofeti okwa kengelelwa, ndele ta yandje enyamukulo, aame, Jehova, oo nda kengelela omuprofeti oo. Opo nee ohandi ka nana eke lange ndi mu lwife noku mu hanauna po moshiwana shange Israel. 10 Otava ka humbata etimba lavo; etimba lomupuli otali ka kala la faafana netimba lomuprofeti, 11 opo eumbo laIsrael li efe po okudja po pwaame, nokweefa po okulinyateka nomatauluko avo aeshe. Notava ka ninga ovanhu vange, nohandi ka kala Kalunga kavo,’ Omwene Omunamapangelo aeshe, Jehova, osho ta ti.”

12 Nondjovo yaJehova oye uya vali kwaame tai ti: 13 “Omona womunhu, ngeenge edu ola nyono kwaame mokukala lihe fi lidiinini, ohandi ka nana eke lange ndi li omhinge nalo nokuhanauna po odjo yoikulya yalo,* nohandi ka tumina mo ondjala, nokuhanauna po ovanhu noinamwenyo, oyo i li mo.” 14 “‘Nonande ngeno ovalumenhu ava vatatu, Noa, Daniel nosho yo Job, ova li musho, otava ka dula ashike okulixupifa vo vene* omolwouyuki wavo,’ Omwene Omunamapangelo aeshe, Jehova, osho ta ti.”

15 “‘Ile nandi tye nee ngeno onda ningifa oinamwenyo yomoixwa, oyo ya nyika oshiponga, i ende medu alishe nokuninipika omuvalu waavo ve li mo,* noku li ninga eputu, opo muha endwe nandenande komunhu omolwoinamwenyo yomoixwa. 16 Oshili, ofimbo ame ndi na omwenyo,’ Omwene Omunamapangelo aeshe, Jehova, osho ta ti, ‘nonande ngeno ovalumenhu ava vatatu ova li musho, itava ka xupifa nokuli ovanamati vavo, ile ovanakadona vavo; otave ke lixupifa ashike vo vene, nedu otali ka mbuwala.’”

17 “‘Ile nandi tye nee ngeno onda etela edu olo eongamukonda, ndele handi ti: “Eongamukonda nali pite medu alishe,” nokuhanauna po ovanhu noinamwenyo aishe mulo, 18 nokuli nonande ovalumenhu ovo vatatu ova li mulo, oshili, ofimbo ame ndi na omwenyo,’ Omwene Omunamapangelo aeshe, Jehova, osho ta ti, ‘itava ka xupifa nokuli novanamati vavo, ile ovanakadona vavo; otave ke lixupifa ashike vo vene.’”

19 “‘Ile nandi tye nee ngeno onda tumina oudu wolutapo medu olo nokutilila mulo ehandu lange netiko lohonde, ndi hanaune po mulo ovanhu noinamwenyo, 20 nonande ngeno Noa, Daniel nosho yo Job ova li mulo, oshili, ofimbo ame ndi na omwenyo,’ Omwene Omunamapangelo aeshe, Jehova, osho ta ti, ‘itava ka xupifa nokuli novanamati vavo, ile ovanakadona vavo; otava ka dula ashike okulixupifa vo vene* omolwouyuki wavo.’”

21 “Osheshi eshi osho Omwene Omunamapangelo aeshe, Jehova, ta ti: ‘Onghee osho osho tashi ka kala, eshi handi ka tumina Jerusalem omahandukilo ange ane,* eongamukonda, ondjala, oifitukuti ya nyika oshiponga noudu wolutapo, ndi hanaune po ovanhu nosho yo oinamwenyo musho. 22 Ashike vamwe, ovo tava ka fyaala mulo otava ka ya onhapo nokukufwa mo, ovanamati novanakadona. Otave ke uya kunye, nongeenge omwa mono eenghatu davo nosho yo oilonga yavo, otamu ka hekelekwa shili omolwoudjuu oo nda etela Jerusalem, kwaashishe osho nde shi ningila.’”

23 “‘Otave ke mu hekeleka, eshi tamu ka mona eenghatu davo nosho yo oilonga yavo, notamu ka shiiva kutya osho nda li nda ninga inandi shi ninga ashike epwanga,’ Omwene Omunamapangelo aeshe, Jehova, osho ta ti.”