EHOLOLO LAJOHANNES

1 Eli ehololo* olo Jesus Kristus a pewa kuKalunga, opo a ulikile ovapiya vaye* oinima oyo tai ka ningwa diva. Jesus Kristus okwa tuma omweengeli waye komupiya waye Johannes, opo e mu ulikile oinima oyo. 2 Johannes okwa hepaulula kombinga yeendjovo daKalunga, yaasho a ulikilwa kuJesus Kristus nokombinga yoinima aishe oyo a mona. 3 Keshe ou ta lesha mokule eendjovo di na sha nexunganeko eli, nakeshe ou ta udu nokudiinina osho sha shangwa mo ota kala a hafa, molwaashi eufwafimbo oli li popepi.

4 Ame Johannes ohandi shangele omaongalo aheyali oo e li moshitukulwa shaAsia:

Kaleni mu na efilonghenda nombili oyo hai di “kwaau e li ko, a kala ko note uya,” keemhepo heyali odo di li komesho yolukalwapangelo laye 5 nosho yo kuJesus Kristus, oo e li “Ondombwedi idiinini,” “oo a nyumunwa tete koufi,” noku li “Omupangeli weehamba dokombada yedu.”

Jesus, oo e tu hole nokwe tu mangulula moulunde wetu okupitila mohonde yaye, 6 okwe tu hoolola tu ninge eehamba novapristeri vaXe, Kalunga kaye, oo e na okupewa efimano neenghono fiyo alushe. Amen.

7 Taleni, ote uya e li moilemo nota ka monika kovanhu aveshe nokuli nokwaavo ve mu twa neongamukonda. Ovanhu vomaludi aeshe kombada yedu otava ka lila neenghono* omolwaye. Amen.

8 Jehova Kalunga, “Omunaenghono adishe, oo e li ko, a kala ko note uya,” okwa ti: “Aame Alfa naOmega.”*

9 Ame Johannes, omumwaxo nomufyuululi wouhamba pamwe nanye, oo handi lididimikile omaudjuu ngaashi nye molwaashi ndi li omushikuli waJesus, onda twalwa konhunhu yaPatmos molwaashi handi hepaulula kombinga yaKalunga noyaJesus. 10 Omhepo iyapuki oya ulikila nge oinima oyo tai ka ningwa mefiku lOmwene. Opo nee onda uda ondaka tai ingida mokule konima yange, 11 tai ti: “Osho u wete shi shanga momushangwatonywa, ndele to u tumine komaongalo aa aheyali: laEfeso, laSmirna, laPergamo, laTiatira, laSarde, laFiladelfia nolaLaodikea.”

12 Onda punguluka ndi tale kutya olyelye a li ta popi naame, opo nee onda mona oikwatelwalamba iheyali yoingoli, 13 nomokati kayo onda mona mo umwe a fa omona womunhu a djala oshikutu sha twa keemhadi nosho yo ekwamo loshingoli ponhulo yaye. 14 Omutwe neexwiki daye oditoka da fa olududi leedi litoka tootoo, omesho aye okwa fa omalaka omundilo, 15 eemhadi daye oda fa ongopolo ya tulwa momundilo, nondaka yaye oya fa epopomo lomeva mahapu. 16 Oku na eenyofi heyali meke laye lokolulyo, mokanya kaye omwa dja eongamukonda lile leememo keembinga mbali, noshipala shaye osha li tashi vilima* sha fa ouyelele wetango wa twa. 17 Eshi nde mu mona, onda wila peemhadi daye nda fa nda fya.

Opo nee okwa kwata nge neke laye lokolulyo, ndele ta ti: “Ino tila. Aame ndotete nondaxuuninwa, 18 onda file nondi na omwenyo, ndele tala, ohandi kala nomwenyo fiyo alushe, nondi na eeshapi defyo nosho yo dOmbila.* 19 Onghee hano, shanga oinima oyo wa mona, oyo tai ningwa paife naayo tai ka ningwa monakwiiwa. 20 Oshiholekwa shiyapuki sheenyofi heyali odo wa mona meke lange lokolulyo noshoikwatelwalamba iheyali yoshingoli osheshi: Eenyofi heyali otadi faneke ovaengeli vomaongalo aheyali, noikwatelwalamba iheyali otai faneke omaongalo aheyali.

2 “Shangela omweengeli weongalo lokuEfeso to ti: Ou e na eenyofi heyali meke laye lokolulyo nota ende mokati koikwatelwalamba iheyali yoshingoli ota ti ngaha: 2 ‘Ondi shii oilonga nelididimiko loye nonokutya iho pitike ovakolokoshi va kale mokati keni, noho konakona ovo tave liti kutya ovayapostoli, ndele kave fi shili ovayapostoli, otava popi ashike oipupulu. 3 Oto twikile okulididimika omolwedina lange noino teka omukumo. 4 Ndele ito shi endifa nawa moshinima shimwe; owa kanifa ohole yoye yotete.

5 “‘Didilika kutya ku li ngaashi wa li nale, onghee lidilulula opo u longe oilonga oyo wa li ho longo nale. Ngeenge hasho, ohandi uya kwoove nohandi ka kufa po oshikwatelwalamba shoye ponhele yasho. 6 Ndele oto shi endifa nawa moshinima vali shimwe: ou tonde oilonga yoshimhanga shOvanikolaiti, oyo naame yo ndi tonde. 7 Ou e na omatwi na ude osho omhepo iyapuki tai lombwele omaongalo tai ti: Omufindani ohandi ke mu pitika a lye komuti womwenyo oo u li moparadisa yaKalunga.’

8 “Shangela omweengeli weongalo lokuSmirna to ti: ‘Ou wotete nowaxuuninwa,’ ou a file nokwa nyumuka ota ti ngaha: 9 ‘Ondi shii omaudjuu noluhepo loye, ndele nande ongaho ove oshipuna. Ondi shii yo kutya oho shekwa kovanhu ovo hava ti kutya Ovajuda, ndele kave fi Ovajuda shili. Ovanhu ovo ovo ongudu* yaSatana. 10 Ino tila omahepeko oo e li poku ku hanga. Tala, Ondiaboli otai ka tulifa vamwe vomunye modolongo, opo mu yelekwe filufilu, notamu ka hepekwa oule womafiku omulongo. Onghee kala omudiinini fiyo omefyo, opo nee ohandi ke ku pa ondjabi* yomwenyo. 11 Ou e na omatwi na ude osho omhepo iyapuki tai lombwele omaongalo tai ti: Omufindani ita ka lola efyo etivali.’

12 “Shangela omweengeli weongalo lokuPergamo to ti: Ou e na eongamukonda lile leememo keembinga mbali ota ti ngaha: 13 ‘Ondi shii apa ho kala, sha hala okutya polukalwapangelo laSatana, ndele natango ou li omudiinini kwaame* noino efa po eitavelo loye nokuli nopefimbo opo ondombwedi yange idiinini Antipas ya dipaelwa moipafi yoye ponhele opo hapa kala Satana.

14 “‘Ndele ito shi endifa nawa moinima imwe molwaashi owa pitika mokati keni mu kale vamwe ovo va kanyatela kehongo laBileam, oo a honga Balak a yule Ovaisrael va lye oinima ya yambelwa oikalunga nova ye moluhaelo.* 15 Shimwe vali, mokati keni omu na yo ovo va kanyatela kehongo loshimhanga shOvanikolaiti. 16 Onghee hano, lidilulula, ngeenge hasho, ohandi uya kwoove mepakumo leisho, nohandi ke va lwifa neongamukonda lile tali di mokanya kange.

17 “‘Ou e na omatwi na ude osho omhepo iyapuki tai lombwele omaongalo tai ti: Omufindani ohandi ke mu pa omanna a holekwa nohandi ke mu pa emanya litoka kwa shangwa edina lipe olo li shiivike ashike kwaao te li pewa.’

18 “Shangela omweengeli weongalo lokuTiatira to ti: Omona waKalunga oo e na omesho a fa omalaka omundilo neemhadi da fa ongopolo ya tulwa momundilo ota ti ngaha: 19 ‘Ondi shii oilonga yoye, ohole, eitavelo, oilongayakulo nosho yo elididimiko loye, noilonga yoye yaxuuninwa oi dule ei yotete.

20 “‘Ndele ohandi ku pe oushima moshinima shimwe; owe lipwililikila omukainhu Isabel oo te liti kutya omuprofeti nota hongo nokuhongaula ovapiya vange va ye moluhaelo* nova lye oinima ya yambelwa oikalunga. 21 Onde mu pa omhito e lidilulule, ndele ina hala okweefa po oluhaelo.* 22 Tala, ohandi ke mu etela mafiku omukifi wa kwata moiti, naavo tava haele naye ohandi ke va etela oudjuu munene ngeenge inava efa po okulonga oilonga ya fa yaye. 23 Ovana vaye ohandi ke va dipaa nomukifi wa kwata moiti, opo omaongalo aeshe a shiive kutya aame handi konakona omitima nosho yo omadiladilo omoule,* nohandi ka pa keshe umwe ondjabi she likolelela koilonga yaye.

24 “‘Ndele ohandi mu lombwele amushe ovo mu li muTiatira, amushe ovo inamu tambula ko ehongo laIsabel, ovo muhe shii oinima oyo haku tiwa kutya “oinima yomoule yaSatana” kutya: Itandi mu twike vali omutengi umwe. 25 Ngaashi nde mu lombwela nale, twikileni okulonga oilonga iwa fiyo ohandi uya. 26 Omufindani ou ta diinine fiyo okexulilo osho nde mu lombwela ohandi ke mu pa eenghonopangelo a pangele oiwana, 27 ngaashi Tate e di pa nge. Nomufindani oo ota ka denga* oiwana nodibo yoshivela, opo e i nyanyaule ngaashi oitoo yedu. 28 Ohandi ke mu pa onyofi yokeengula. 29 Ou e na omatwi na ude osho omhepo iyapuki tai lombwele omaongalo.’

3 “Shangela omweengeli weongalo lokuSarde to ti: Ou e na eenyofi heyali neemhepo heyali daKalunga ota ti ngaha: ‘Oilonga yoye ondi i shii; oto monika wa fa u na omwenyo, ndele owa fya. 2 Kala oupafi, ove u pameke ovo va xupa po nove li pokufya, molwaashi ito wanifa po filufilu oilonga aishe oyo Kalunga kange a teelela u longe. 3 Onghee hano, kaleka momadiladilo* osho wa pewa nowa uda, shi diinina, ove u lidilulule. Ndele ngeenge ku li oupafi, ohandi ku holokele ngaashi ombudi, noito ka shiiva efimbo olo handi uya kwoove.

4 “‘Ndele muSarde omu na vamwe ovo inava nyateka oikutu yavo, onghee otava ka enda pamwe naame va djala oikutu itoka molwaashi ova wana okufimanekwa. 5 Omufindani ota ka dikwa oikutu itoka, nedina laye itandi ke li dima mo membo lomwenyo, ndele ohandi ke li shiivifila Tate novaengeli vaye. 6 Ou e na omatwi na ude osho omhepo iyapuki tai lombwele omaongalo.’

7 “Shangela omweengeli weongalo lokuFiladelfia to ti: Omuyapuki nomunashili ou e na oshapi yaDavid, ou ta patulula, ndele kape na ou ta pate, nota pate, ndele kape na ou ta patulula, ota ti ngaha: 8 ‘Tala, ondi shii oilonga yoye. Onde ku yeululila omuvelo, ndele kape na ou ta dulu oku u idila. Ondi shi shii kutya ku na lela eenghono, ndele owa kala omudiinini kwaame* nokeendjovo dange. 9 Tala, ovanhu vomongudu* yaSatana, ovo hava popi oipupulu kutya vo Ovajuda, ndele kave fi shili Ovajuda, ohandi ke va ningifa ve uye kwoove, ndele tava tu eengolo* peemhadi doye, notava ka shiiva kutya onda kala ndi ku hole. 10 Ndele molwaashi owa diinina osho wa uda shi na sha nelididimiko lange,* naame ohandi ke ku amena pefimbo leyeleko olo tali ka hanga ovanhu aveshe kombada yedu eshi tava ka yelekwa. 11 Ohandi uya mepakumo leisho, onghee diinina osho u na, opo uha kufwe nande okomunhu oshishani shoye.

12 “‘Omufindani ohandi mu ningi ongudi motembeli yaKalunga kange; ita ka dja mo vali nandenande, nohandi mu shange edina laKalunga kange noloshilando shaKalunga kange, Jerusalem Shipe, osho sha dja meulu kuKalunga kange, nosho yo edina lange lipe. 13 Ou e na omatwi na ude osho omhepo iyapuki tai lombwele omaongalo.’

14 “Shangela omweengeli weongalo lokuLaodikea to ti: Amen, oo e li ondombwedi idiinini noyoshili, ou a shitwa tete kuKalunga ota ti ngaha: 15 ‘Ondi shii oilonga yoye, kutya ino fa omeva mapyu ile matalala. Onda li ndi shii oto kala ngaashi omeva mapyu ile matalala. 16 Ndele molwaashi owa fa omeva a lomoka, oo ehe fi mapyu oo kaatalala, ohandi ku fiya mo mokanya kange. 17 Oho ti: “Kandi na eshi nda pumbwa molwaashi ame oshipuna nonda likola oupuna,” ashike ove ino hafa, u mu etifa onghenda, ohepele, omupofi nou li hamunghele. 18 Ohandi ku ladipike u lande kwaame oshingoli sha yelifwa momundilo opo u punapale, noikutu itoka u liuvike nayo opo uha monike kuvamwe u li hamunghele nou fye ohoni, nosho yo omuti womesho opo u kale ho mono ko nawa.

19 “‘Aveshe ovo ndi hole ohandi va pukulula nohandi va pe outekuduliko. Onghee hano, lidilulula ndele to longele Kalunga nomutima aushe. 20 Tala, ondi li ofika pomuvelo handi konghola. Ou ta udu ondaka yange, ndele ta yeulula nge, ohandi i meumbo laye tu lye ouvalelo pamwe naye. 21 Omufindani ohandi mu pitike a kale omutumba pamwe naame kolukalwapangelo lange, ngaashi ashike ame nda findana, ndele handi kala omutumba pamwe naTate kolukalwapangelo laye. 22 Ou e na omatwi na ude osho omhepo iyapuki tai lombwele omaongalo.’”

4 Tala, konima yaasho, onda mona omuvelo wa yeuluka meulu nonda uda ondaka yotete ya ingida ya fa enghuma tai ti kwaame: “Ila oku ndi ku ulikile oinima oyo tai ka ningwa.” 2 Diva konima yaasho, onda nwefwa mo keenghono domhepo yaKalunga, ndele tala, onda mona olukalwapangelo meulu nosho yo umwe e li ko omutumba. 3 Oo e li omutumba kolukalwapangelo okwa li ta monika a fa emanya londilo lishunga* nosho yo emanya londilo litilyana,* nolukalwapangelo ola dingililwa kouta wodula wa fa emanya londilo litwima omafo.*

4 Olukalwapangelo ola li la dingililwa komalukalwapangelo 24, nokomalukalwapangelo oo onda mona ko ovakulunhu 24 ve li omutumba va djala oikutu itoka noishani yoingoli komitwe davo. 5 Onda mona oluvadi nonda uda eendaka nomingungumo tadi di kolukalwapangelo, nokomesho yolukalwapangelo okwa li ku na eelamba heyali da tema omundilo, odo tadi faneke eemhepo heyali daKalunga. 6 Komesho yolukalwapangelo oku na oshinima sha fa efuta, shi liwetikile sha fa ekende nosha fa okawe.*

Mokati nomomudingonoko wolukalwapangelo omu na oinamwenyo ine i na omesho mahapu komesho nokonima. 7 Oshinamwenyo shotete otashi monika sha fa onghoshi, oshitivali osha fa ongobe yomhedi, oshititatu oshi na oshipala sha fa shomunhu noshitine osha fa onhwa. 8 Keshe shimwe shomoinamwenyo oyo ine oshi na omavava ahamano, nomavava oo oku na omesho meni nokombada. Ohai kala tai popi oufiku nomutenya tai ti: “Jehova Kalunga omuyapuki, omuyapuki, omuyapuki nOmunaenghono adishe, oo a li ko, a kala ko note uya.”

9 Efimbo keshe oinamwenyo oyo tai fimaneke notai tumbaleke nokupandula oo e li omutumba kolukalwapangelo, oo ta kala ko fiyo alushe, 10 ovakulunhu 24 ohava tu eengolo komesho yaau e li kolukalwapangelo, oo ta kala ko fiyo alushe, noku mu fimaneka, nohava dula ko oishani yavo komesho yolukalwapangelo, tava ti: 11 “Jehova Kalunga ketu, oove wa wana okupewa efimano, etumbalo neenghono molwaashi oove wa shita oinima aishe, nomolwehalo loye, oya shitwa noi li po.”

5 Onda mona oo e li omutumba kolukalwapangelo e kwete meke laye lokolulyo omushangwatonywa wa shangwa keembinga adishe,* wa patwa nawanawa noipatifo iheyali. 2 Onda mona omweengeli omunaenghono ta ingida pombada ta ti: “Olyelye a wana okukufa ko oipatifo yomushangwatonywa noku u tonyununa?” 3 Ndele kapa li nande oumwe, kutya nee omeulu ile okombada yedu ile okoshi yedu a dula okutonyununa ile okulesha omushangwatonywa oo. 4 Onda li nda hovela okulila nokulililila molwaashi kapa li oo a wana oku u tonyununa ile oku u lesha. 5 Ndele umwe womovakulunhu okwa tya kwaame: “Ino lila vali. Tala, Onghoshi yomepata laJuda nomudi waDavid oya findana noya wana okukufa ko oipatifo yomushangwatonywa noku u tonyununa.”

6 Opo nee onda mona odjona ya fa ya dipawa i li pokati kolukalwapangelo, koinamwenyo ine nokovakulunhu. Odjona oyo oi na eembinga heyali nomesho aheyali, nomesho otaa faneke eemhepo heyali daKalunga odo da tumwa kombada yedu alishe. 7 Opo nee oye uya noya kufa ko omushangwatonywa oo u li meke lokolulyo laao e li omutumba kolukalwapangelo. 8 Eshi ye u kufa ko, oinamwenyo ine novakulunhu 24 ova twa eengolo koshipala shayo, nakeshe umwe okwa li e na okaxumbafeta noshiyaxa shoshingoli shi yadi oitwimifo. (Oitwimifo otai faneke omailikano ovayapuki.) 9 Ova li tava imbi eimbilo lipe tava ti: “Oove wa wana okupewa omushangwatonywa nokukufa ko oipatifo yao, molwaashi owa li wa dipawa nowa landela Kalunga nohonde yoye ovanhu va dja momapata, momalaka, movanhu nomoiwana aishe, 10 nowe va hoolola va ninge eehamba novapristeri vaKalunga ketu, notava ka pangela ombada yedu ve li eehamba.”

11 Onda mona oinamwenyo, ovakulunhu novaengeli omayovi omilongo lwomayovi omilongo va dingilila olukalwapangelo nonda uda eendaka davo 12 tadi ingida pombada tadi ti: “Odjona oyo ya li ya dipawa oya wana okupewa eenghonopangelo, oupuna, ounongo, eenghono, efimano, etumbalo noya wana okutangwa.”

13 Onda uda oishitwa aishe oyo i li meulu, kombada yedu, koshi yedu nomefuta tai ti: “Ou e li omutumba kolukalwapangelo nosho yo Odjona ovo ve na eenghono nova wana okutangwa, okufimanekwa nokutumbalekwa fiyo alushe.” 14 Oinamwenyo ine oya kala tai ti: “Amen,” novakulunhu ova twa eengolo nova fimaneka Kalunga.

6 Ndele onda mona Odjona ya kufa ko shimwe shomoipatifo iheyali, nonda uda shimwe shomoinamwenyo ine sha ingida nondaka ya fa engungumo, sha ti: “Ila!” 2 Opo nee onda mona onghambe itoka nomulondi wayo e na outa noikuti. Okwa dikwa oshishani nokwa ya a ka finde ovatondi vaye.

3 Eshi ya kufa ko oshipatifo oshitivali, onda uda oshinamwenyo oshitivali tashi ti: “Ila!” 4 Onda mona vali onghambe itilyana, nomulondi wayo okwa li e na eongamukonda linene nokwa pitikwa a nyone po ombili kombada yedu, opo ovanhu va dipaafane.

5 Eshi Odjona ya kufa ko oshipatifo oshititatu, onda uda ondaka yoshinamwenyo oshititatu tai ti: “Ila!” Opo nee onda mona onghambe ilaula, nomulondi wayo okwa li e na oiyelekifo ivali meke laye. 6 Onda uda ondaka mokati koinamwenyo oyo ine ya ti: “Olitela imwe yoilya yo-wheat oi na odenari,* neelitela nhatu doilya yo-Barley odi na odenari; omaadi eemono nomaviinyu naa kwatwe nawa.”

7 Eshi ya kufa ko oshipatifo oshitine, onda uda ondaka yoshinamwenyo oshitine tai ti: “Ila!” 8 Opo nee onda mona onghambe itwima onghundu, nedina lomulondi wayo Efyo. Ombila* oya li ye mu shikula i li popepi naye, nova li va pitikwa va dipae oshitine shedu* neongamukonda lile, nondjala, nomukifi wa kwata moiti nosho yo noilyani yokombada yedu.

9 Eshi ya kufa ko oshipatifo oshititano, onda mona koshi yoaltari eemwenyo* daavo va dipawa omolweendjovo daKalunga nomolwaashi va li hava udifa. 10 Ova ingida mokule tava ti: “Omwene Omunamapangelo aeshe, omuyapuki nomunashili, fiyo onaini to kala ino tokola nokuhandukila ovadipai vetu ovo ve li kombada yedu?” 11 Ova li va pewa oikutu itoka, ndele tava lombwelwa va teelele okafimbo kanini fiyo osheshi omuvalu wovamwaxe novapiya vakwao ovo va li pokudipawa ngaashi vo we lixwa po.

12 Eshi a kufa ko oshipatifo oshitihamano, opa ningwa ekakamo ledu linene, nonda mona etango la laula ngaashi oshikutu shilaula,* omwedi wa tilyana ngaashi ohonde, 13 neenyofi da wila kombada yedu ngaashi omangongwa omukwiyu a shikwa ko komhepo idjuu. 14 Eulu ola li la tonywa ngaashi omushangwatonywa nola kana po, neemhunda nosho yo eenhunhu adishe oda li da dja peenhele dado. 15 Opo nee eehamba dokombada yedu, ovakwanepangelo, ovawiliki vomatangakwaita, oipuna, ovanaenghono, ovapika novamangululwa aveshe ova hondama momakololo nomomamanya eemhunda. 16 Ova kala tava lombwele eemhunda nomamanya tava ti: “Tu tuvikileni noku tu amena kwaao e li omutumba kolukalwapangelo nokehandu lOdjona. 17 Ndele molwaashi efiku lavo lehandu ole uya, olyelye ta dulu okuxupa?”

7 Konima yaasho, onda mona ovaengeli vane ve li ofika keembinga nhee dedu tava kelele eemhepo nhee dedu, opo diha pepe kombada yedu, mefuta ile komuti nande oumwe. 2 Opo nee onda mona omweengeli vali umwe ta di koushilo e kwete oshididilikifo osho a pewa kuKalunga omunamwenyo nokwa lombwela ovaengeli vane ovo va pitikwa va hanaune po edu nefuta ta ingida pombada, 3 ta ti: “Inamu hanauna po edu ile efuta ile omiti, fiyo osheshi twa didilika meembaba doipala ovapiya vaKalunga ketu.”

4 Onda uda omuvalu waavo va didilikwa 144 000 va dja momapata aeshe aIsrael:

9 Konima yaasho, onda mona ongudu inene ya nyengana okuvalwa ya dja moiwana, momihoko, movanhu nomomalaka aeshe i li ofika komesho yolukalwapangelo nokomesho yOdjona, ya djala oikutu itoka noi kwete oivale yomilunga momake ayo. 10 Oya kala tai ingida pombada tai ti: “Ohatu pandula Kalunga ketu, oo e li kolukalwapangelo, nosho yo Odjona eshi ve tu xupifa.”

11 Ovaengeli aveshe ovo va li va dingilila olukalwapangelo, novakulunhu nosho yo oinamwenyo ine, ova twa eengolo komesho yolukalwapangelo nova fimaneka Kalunga, 12 tava ti: “Amen! Kalunga ketu oo e na ounongo neenghono okwa wana okutangwa, okutumbalekwa, okufimanekwa nokupandulwa fiyo alushe. Amen.”

13 Opo nee umwe womovakulunhu okwa pula nge ta ti: “Ovo va djala oikutu itoka ovo oolyelye nova dja peni?” 14 Onde mu nyamukula nda ti: “Omwene wange, oove u shi shii.” Okwa tya kwaame: “Ovo ovovo va pita moudjuu munene, nova kosha oikutu yavo mohonde yOdjona i kale itoka. 15 Osho osho she va ningifa va kale komesho yolukalwapangelo laKalunga tave mu longele oilonga iyapuki motembeli yaye omutenya noufiku; naao e li kolukalwapangelo ote ke va amena.* 16 Itava ka fya vali ondjala ile enota, netango itali ke va xwika vali, 17 molwaashi Odjona oyo i li pokati kolukalwapangelo otai ke va lifa noku va twala keefifiya domeva omwenyo. Opo nee Kalunga ota ka feta po omahodi momesho avo.”

8 Eshi Odjona ya kufa ko oshipatifo oshitiheyali, meulu omwa li mwa mwena oule wetata lovili lwaapo. 2 Opo nee onda mona ovaengeli vaheyali ve li ofika koshipala shaKalunga nova li va pewa omanghuma aheyali.

3 Ndele ope uya omweengeli umwe vali e kwete oshikwatelwa shoshingoli shoitwimifo nokwa li a pewa oitwimifo ihapu e i twimine koaltari yoshingoli oyo ya li kolukalwapangelo pefimbo opo ovayapuki aveshe va li tava ilikana. 4 Omwifi woitwimifo oyo ya li meke lomweengeli nosho yo omailikano ovayapuki okwa ya kuKalunga. 5 Ndele omweengeli okwa kufa diva oshikwatelwa shoitwimifo nokwe shi yada omakala* a dja koaltari, ndele te shi ekele kombada yedu. Opa li pa udika eendaka nomingungumo, pa monika omaluvadi nopa li pa ningwa ekakamo ledu. 6 Ovaengeli vaheyali ova li ve lilongekida okushika omanghuma avo aheyali.

7 Eshi omweengeli wotete a shika enghuma laye, opa li eemhawe nomundilo ya lumbakanifwa mumwe nohonde noya li ya ekelwa kombada yedu; oshititatu shedu, oshititatu shomiti nosho yo oimeno aishe oya li ya pya po.

8 Eshi omweengeli omutivali a shika enghuma laye, oshinima sha fa omhunda inene ya tema omundilo osha ekelwa mefuta. Opo nee oshititatu shefuta osha li sha shituka ohonde; 9 oshititatu shoinamwenyo yomefuta osha fya noshititatu sheeshikepa osha li sha teka.

10 Eshi omweengeli omutitatu a shika enghuma laye, onyofi ya kula ya tema ya fa olamba oya wa meulu noya wila moshititatu shomilonga nosheefifiya domeva. 11 Onyofi oyo ohai ifanwa Oululu,* noshititatu shomeva osha lula, novanhu vahapu ova fya komeva oo molwaashi okwa li malula.

12 Eshi omweengeli omutine a shika enghuma laye, oshititatu shetango, shomwedi nosheenyofi osha li sha laula nokapa li ouyelele moshititatu shomutenya noshoufiku.

13 Onda mona onhwa tai tuka pokati keulu nedu nonda uda ondaka ya ingida pombada tai ti: “Woo, woo, woo nye ovo mu li kombada yedu osheshi ovaengeli vatatu ovo va fyaala ko ove li pokushika omanghuma avo!”

9 Eshi omweengeli omutitano a shika enghuma laye, onda mona onyofi ya wa keulu ya wila kombada yedu, nonyofi oyo oya li ya pewa oshapi yombwili. 2 Onyofi oyo eshi ya patulula pombwili, omwa dja omwifi wa fa tau di mediko la hanya, ndele tau laulike etango nosho yo ewangadjo. 3 Opo nee momwifi omwa dja oshipaxu shihapu she uya kombada yedu, ndele tashi pewa eenghono ngaashi odo di li keendje dokombada yedu. 4 Oshipaxu osha lombwelwa shiha hanaune po oimeno nomiti, ndele oshi hanaune po ashike ovo inava didilikwa kuKalunga meembaba doipala yavo.

5 Oshipaxu osho osha li sha pewa eenghonopangelo, opo shi va hepeke eemwedi nhano, ndele haku va dipaa, nomahepeko oo okwa li a fa ouyahame womunhu a lika kondje. 6 Pefimbo opo, ovanhu otava ka konga efyo, ashike itave ke li mona, otava ka kala ve li halelela, ndele otali ke va ya onhapo.

7 Oshipaxu osha li tashi monika sha fa eenghambe tadi i koita; komitwe dasho okwa li ku na oinima tai monika ya fa oishani yoingoli, noipala yasho oya li tai monika ya fa oipala yovanhu 8 nosha li shi na eexwiki da fa dovakainhu. Osha li shi na omayoo a fa onghoshi 9 noipapa yoponhulo ya fa oipapa yoivela. Omavava asho eshi tashi papama okwa li tae linyenge a fa eenghambe tadi shili omatemba tadi tondoka da finda moita. 10 Oshi na eehengo komishila da fa odo di li komishila deendje, nomomishila dasho omu na eenghonopangelo dokuhepeka ovanhu eemwedi nhano. 11 Ohashi wilikwa kohamba, omweengeli wombwili. Edina laye mOshiheberi oye Abadon,* nomOshigreka oye Apollion.*

12 Owoo yotete oya pita po. Ndele tala, konima yoinima ei otaku ka holoka eewoo dopavali.

13 Eshi omweengeli omutihamano a shika enghuma laye, onda uda ondaka ya dja momaluvinga oo e li koaltari yoshingoli oyo i li koshipala shaKalunga, 14 tai lombwele omweengeli omutihamano oo e kwete enghuma tai ti: “Mangulula ovaengeli vane ovo va mangwa ve li pomulonga munene waEufrat.” 15 Opo nee ovaengeli vane, ovo va kala va teelela ovili, efiku, omwedi nosho yo omudo i fike, ova li va mangululwa, opo va dipae oshititatu shovanhu.

16 Onda uda omuvalu wovalondinghambe vomatangakwaita u fike pomayovi omilongo mbali lwomayovi omulongo.* 17 Onda mona memoniko eenghambe novalondinghambe. Ovalondinghambe ovo ova li va djala oipapa i na oluvala litilyana, limbulau nosho yo lishunga. Eenghambe oda li di na omitwe da fa deenghoshi, nomomakanya ado omwa li tamu di omundilo, omwifi nosulfuri. 18 Oshititatu shovanhu osha dipawa komahandukilo aa atatu, komundilo, komwifi nokosulfuri oyo ya dja momakanya ado. 19 Eenghono deenghambe odo odi li momakanya nomomishila dado, nomishila odi na omitwe da fa omayoka, nohadi longifa omishila dado di hepeke ovanhu.

20 Ovanhu ovo va xupa po inava dipawa komahandukilo oo inave lidilulula koilonga yomake avo. Kava li va efa po okulongela eendemoni nosho yo oihongwafano oyo ihai mono ko, ihai udu ko noihai ende, oyo ya longwa moshingoli, moshisilveri, mongopolo, momamanya nomoiti. 21 Kava li va efa po okudipaa, oumhulile, oluhaelo* nosho yo oumbudi.

10 Ndele onda mona omweengeli e na eenghono ta di meulu a dingilwa koshilemo, komutwe waye okwa li ku na outa wodula, oshipala shaye osha li sha fa etango, nomaulu* aye okwa li taa monika a fa eengudi da tema omundilo. 2 Okwa li e na meke laye omushangwatonywa munini inau tonywa. Omhadi yaye yokolulyo oya li ya lyata mefuta, ofimbo yokolumosho ya lyata kedu. 3 Opo nee okwa ingida mokule ngaashi onghoshi tai kumbu. Konima yaasho, onda uda eendaka domingungumo heyali.

4 Eshi omingungumo heyali da popya, hanga onda shanga osho da ti, ndele onda uda ondaka ya popya okudja meulu tai ti: “Oinima oyo ya popiwa komingungumo heyali, ino i shanga, i kaleka oshiholekwa.” 5 Omweengeli oo nda mona e li ofika a lyata mefuta nokedu okwa ulika keulu neke laye lokolulyo, 6 nokwa ana kwaau ta kala ko fiyo alushe, ou a shita eulu noinima oyo i li mo, edu noinima oyo i li ko, nefuta noinima oyo i li mo, ta ti: “Kape na vali efimbo lokwoongaonga. 7 Eshi omweengeli omutiheyali a li pokushika enghuma laye, oshiholekwa shiyapuki osho Kalunga a hepaulula shi li onghundana iwa kovapiya vaye ovaprofeti osha wanifwa.”

8 Opo nee onda uda ondaka ya dja meulu tai lombwele nge tai ti: “Inda u ka kufe ko omushangwatonywa inau tonywa u li meke lomweengeli oo e li ofika a lyata mefuta nokedu.” 9 Onda ya komweengeli oo, ndele handi mu lombwele a pe nge omushangwatonywa oo munini. Opo nee okwa tya kwaame: “U tambula, ndele to u li po, otau ke ku yahameka medimo, ashike mokanya koye otau ka kala u nyenye ngaashi omaadi eenyiki.” 10 Onda kufa ko omushangwatonywa oo munini komweengeli, ndele handi u li po, nowa li munyenye mokanya kange ngaashi omaadi eenyiki, ashike owa yahameka nge medimo. 11 Opo nee onda lombwelwa taku ti: “Twikila okuxunganekela ovanhu, oiwana, omalaka neehamba dihapu.”

11 Onda pewa oshihati sholumbungu sha fa odibo,* naau eshi pa nge okwa ti: “Fikama uye u ka mete* otembeli yaKalunga nosho yo oaltari nokuvalula ovo ve li mo tave mu longele. 2 Ndele omukala wokombada wotembeli ino u meta molwaashi owa pewa oiwana, notai ka lyataula oshilando shiyapuki oule weemwedi 42. 3 Ohandi ka tuma eendombwedi dange mbali di ka xunganeke oule womafiku 1 260, da djala eeshako.” 4 Eendombwedi odo odi lilwe po komiti mbali dolumono nokoikwatelwalamba ivali oyo i li ofika komesho yOmwene wedu.

5 Ngeenge ope na ou a hala oku di ningila owii, momakanya ado otamu di omundilo u hanaune po ovatondi vado. Keshe ou a hala oku di ningila owii, osho ta ka dipawa ngaho. 6 Eendombwedi odo odi na eenghono dokukelela keulu,* opo odula iha loke oule wefimbo olo tadi xunganeke, nodi na eenghono dokushitukifa omeva ohonde nosho yo dokweetela edu oiponga i lili noku lili ngaashi da hala.

7 Shimha da mane okuxunganeka, otapa ka holoka oshilyani tashi di mombwili, osho tashi ke di lwifa noku di finda, ndele tashi di dipaa. 8 Oimhu yado otai ka nangala mepandavanda la kula loshilando shinene omo mwa dipaelwa Omwene wado komuti, noshilando osho otashi ifanwa pafaneko Sodom naEgipiti. 9 Ovanhu vahapu, omihoko, omalaka noiwana otava ka tala oimhu yeendombwedi odo oule womafiku atatu netata, ndele itava ka pitika nande di pakwe mombila. 10 Oonakukala kombada yedu otava ka paafana eeshali, tava ka hafa nokunyakukilwa efyo leendombwedi odo mbali, molwaashi oda li hadi va hepeke.

11 Konima yomafiku atatu netata, Kalunga okwe di fudila omufudo womwenyo, ndele tadi nyumuka, naavo ve di mona ova li va tila unene. 12 Oda uda ondaka ya ingida okudja meulu ya tya kudo: “Ileni oku.” Opo nee oda ya meulu moilemo, novatondi vado ove di mona.* 13 Pefimbo opo tuu opo, opa li pa holoka ekakamo ledu linene, ndele tali teya po oshitimulongo shoshilando, nola dipaa ovanhu 7 000, naavo va xupa po ova li va tila, ndele tava hambelele Kalunga komeulu.

14 Owoo onhivali oya pita po. Ndele tala, owoo onhinhatu otai ka holoka diva.

15 Eshi omweengeli omutiheyali a shika enghuma laye, opa udika eendaka da ingida okudja meulu da ti: “Ouhamba wounyuni owa ninga waKalunga ketu nowaKristus waye, na Kalunga ota ka pangela e li ohamba fiyo alushe.”

16 Opo nee ovakulunhu 24, ovo ve li komalukalwapangelo avo oo e li komesho yaKalunga, ove linyongamena, ndele tava hambelele Kalunga, 17 tava ti: “Ohatu ku pandula Jehova Kalunga, Omunaenghono adishe, ou u li ko nowa kala ko, molwaashi owa holola eenghono doye dinene nowa hovela okupangela u li ohamba. 18 Ndele oiwana oya handuka neenghono eshi ya hangika kehandu loye nokeufwafimbo lokutokola oonakufya nolokupa ondjabi ovapiya voye ovaprofeti, ovayapuki, ovo hava fimaneke edina loye, eehepele noipuna, nosho yo lokuhanauna po ovo tava nyono edu.”

19 Ndele otembeli yaKalunga oo e li meulu oya yeuluka, nonda mona oshikefa shehangano shi li motembeli yaye. Onda mona yo omaluvadi nonda uda eendaka nomingungumo nopa holoka ekakamo ledu neemhawe dinene.

12 Ndele onda mona edidiliko linene meulu: Omukainhu a djala etango nomwedi u li koshi yeemhadi daye, nokomutwe waye okwa li ku na oshishani sheenyofi 12, 2 nokwa li omufimba. Ndele molwaashi okwa li e li pokumona okaana, okwa li ta lili omolwouyahame woshifeta.

3 Onda mona vali edidiliko meulu, tala, ongadu inene itilyana i na omitwe heyali nokomitwe oku na oishani iheyali neembinga omulongo. 4 Nongadu oyo oya kokolola nomushila wayo oshititatu sheenyofi dokeulu noye di ekela kombada yedu. Oya kala ya kalela omukainhu oo a li pokumona okaana, opo ngeenge ka dalwa i ka xwake po.

5 Omukainhu oo okwa dala okaana kokamati oko taka ka lifa oiwana aishe nodibo yoshivela. Okaana kaye oka li ka vakulwa po* nokutwalwa kuKalunga kolukalwapangelo laye. 6 Ndele omukainhu okwa faduka po a ya mombuwa omo a longekidilwa onhele kuKalunga, opo a palulwe oule womafiku 1 260.

7 Meulu omwa li mwa tukuluka oita: Mikael* novaengeli vaye ova lwifa ongadu, nongadu novaengeli vayo navo ova lwa, 8 ashike ova findwa, nokudja opo meulu inava kala vali ve na mo onhele. 9 Onghee ongadu inene, eyoka likulu olo hali ifanwa Ondiaboli nosho yo Satana, oyo tai hongaula ounyuni aushe, oya umbilwa kombada yedu pamwe novaengeli vayo. 10 Opo nee onda uda ondaka ya ingida okudja meulu tai ti:

“Tala, Kalunga ketu okwa etela ovanhu exupifo, eenghono daye oda hololwa nOuhamba waye owa dikwa po, na Kristus waye okwa hovela okupangela molwaashi omuhokololifi wovamwatate, oo a li he va hokololifa omutenya noufiku koshipala shaKalunga, okwa umbilwa pedu! 11 Ndele ove mu finda omolwohonde yOdjona nomolwetumwalaka olo va li hava udifa nokava li va tila okukanifa eemwenyo davo. 12 Onghee hano, eulu, nyakukwa nosho yo ovo mu li mo. Ndele woo edu nefuta molwaashi Ondiaboli oye uya kunye noya handuka neenghono osheshi oi shi shii kutya oi na ko efimbo lixupi.”

13 Eshi ongadu ya mona kutya oya umbilwa kombada yedu, oya hepeka omukainhu oo a dala okaana kokamati. 14 Ndele omukainhu oo okwa pewa omavava avali onhwa inene, opo a tuke a ye mombuwa konhele yaye oko ta ka palulwa oule womafimbo atatu netata* e li kokule neyoka.

15 Eyoka ola pombela omukainhu oo omeva a dja mokanya kalo a fa omulonga, opo omukainhu a fye omeva. 16 Ndele edu ola kwafela omukainhu oo eshi la makula okanya kalo nola pona po omeva oo a dja mokanya kongadu. 17 Onghee hano, ongadu oya li ya handukila neenghono omukainhu oo noya ya i ka lwife oludalo laye* olo la xupa po, olo hali diinine oipango yaKalunga nohali hepaulula kombinga yaJesus.

13 Ndele ongadu oya kala ofika pehekedu lopefuta.

Opo nee onda mona oshilyani tashi djuuka mefuta shi na eembinga omulongo nomitwe heyali, nokeembinga dasho oku na oishani omulongo, ndele komitwe dasho oku na omadina omasheko. 2 Oshilyani osho nda mona osha li tashi monika sha fa ongwe, omakasha asho okwa li taa monika a fa emwangha nokanya kasho oka fa konghoshi. Ongadu oya pa oshilyani osho eenghono, olukalwapangelo noufemba wokupangela.

3 Onda mona omutwe umwe woshilyani osho wa yahamekwa neenghono, ndele owa li wa velulwa, novanhu aveshe kombada yedu ova li ve shi shikula nove shi hokwa. 4 Ndele ovanhu ove linyongamena ongadu molwaashi oya pa oshilyani eenghonopangelo, nove linyongamena oshilyani tava ti: “Olyelye a fa oshilyani, na olyelye ta dulu oku shi lwifa?” 5 Oshilyani osha pewa eenghonopangelo shi popye eendjovo delinenepeko nodomasheko, opo shi di longife ngaashi sha hala oule weemwedi 42. 6 Osha sheka Kalunga, edina laye, olukalwa laye nosho yo ovo ve li meulu. 7 Osha pitikwa shi lwife ovayapuki noku va finda, nosha pewa eenghonopangelo shi pangele omihoko, ovanhu, omalaka noiwana aishe. 8 Ovanhu aveshe ovo ve li kombada yedu otave ke shi longela. Okudja pehovelo lounyuni kape na nande edina laumwe womuvo la shangwa membo lomwenyo lOdjona oyo ya li ya dipawa.

9 Ou e na omatwi, na ude ko. 10 Ngeenge umwe okwa tokolelwa odolongo, na tulwe modolongo. Keshe ou ta dipaa umwe neongamukonda,* na dipawe neongamukonda. Onghee ovayapuki ove na okulididimika nokukala neitavelo.

11 Ndele onda mona oshilyani shikwao tashi di medu shi na eembinga mbali da fa dodi, nosha hovela okupopya ngaashi ongadu. 12 Opo nee osha longifa moipafi yoshilyani shotete eenghonopangelo adishe odo sha pewa koshilyani shotete. Osha fininika yo ovanhu va longele oshilyani shotete, osho sha li sha yahamekwa neenghono nosha velulwa. 13 Osha longa oikumwifilonga* inene moipafi yovanhu, sha etifa nokuli omundilo kedu okudja meulu.

14 Ndele osha pukifa ovanhu kombada yedu omolwoikumwifilonga oyo sha pewa shi longe moipafi yoshilyani shotete. Opo nee osha lombwela ovanhu kombada yedu va ningile oshihongwafano oshilyani shotete osho sha yahamekwa nosha velulwa. 15 Osha pitikwa shi yandje omwenyo* koshihongwafano shoshilyani shotete, opo oshihongwafano osho shi dule okupopya nokudipaa ovanhu aveshe ovo inava hala okulongela oshihongwafano shoshilyani.

16 Osha fininika yo ovanhu aveshe, ovanhu vongaho novatumbalekwa, oipuna neehepele, ovamangululwa novapika, opo va didilikwe keke lokolulyo ile meembaba doipala yavo, 17 nokape na ou ta dulu okulanda ile okulandifa, kakele kaao e na edidiliko, edina loshilyani ile onomola oyo i lile po edina lasho. 18 Omunhu oku na okukala e na ounongo, opo a ude ko oshinima eshi: Ou e na eudeko lomoule na valule onomola yoshilyani molwaashi onomola oyo oyopanhu, nonomola oyo 666.

14 Onda mona Odjona i li ofika komhunda yaSion pamwe novanhu 144 000, ovo va shangwa edina layo nedina laXe meembaba doipala yavo. 2 Opo nee onda uda omalinyengo taa di meulu a fa omeva mahapu nokwa fa engungumo linene; omalinyengo oo nda uda okwa li a fa omawi ovaimbi tava imbi notava shiki ouxumbafeta. 3 Ova li tava imbi eimbilo olo la fa lipe ve li komesho yolukalwapangelo, yoinamwenyo ine noyovakulunhu, nokapa li oo a dula okulihonga eimbilo olo kakele kaavo 144 000, ovo va kulilwa kedu. 4 Inave linyateka novakainhu, ndele ove li ngaashi oukadona elela. Ova kala yo va landula Odjona keshe apa tai i. Ova kulilwa movanhu ve li ngaashi oilikolomwa yotete yaKalunga noyOdjona. 5 Ihava popi oipupulu, nova koshoka filufilu.

6 Onda mona vali omweengeli umwe ta tuka pokati keulu nedu* e na onghundana iwa yaalushe oyo i na okuudifilwa aveshe ovo ve li kombada yedu, oiwana, omihoko, omalaka nomaludi aeshe. 7 Okwa li ta ingida pombada ta ti: “Tileni nokufimaneka Kalunga molwaashi efimbo letokolo laye ola fika. Onghee longeleni ou a shita eulu, edu, efuta neefifiya domeva.”

8 Okwa shikula vali omweengeli omutivali ta ti: “Sha teka po! Babilon Shinene sha teka po, osho sha kolwifa oiwana nomaviinyu asho noshe i ningifa i ye moluhaelo.”*

9 Okwa shikula vali omweengeli omutitatu ta ingida pombada ta ti: “Keshe ou te linyongamene oshilyani, oshihongwafano shasho nokwa didilikwa mombaba yoshipala shaye nopeke, 10 ota ka nwa yo omaviinyu ehandu laKalunga, sha hala okutya omaviinyu inaa lumbakanifwa nasha oo Kalunga ta ka tila meholo lehandu laye. Ota ka hepekwa yo nomundilo nosulfuri moipafi yovaengeli ovayapuki noyOdjona. 11 Omwifi womundilo oo tau va hepeke otau kala nokutwimaana fiyo alushe. Ovo tave linyongamene oshilyani noshihongwafano shasho nove na edidiliko ledina lasho, otava ka hepekwa omutenya noufiku. 12 Osho osho sha ningifa ovayapuki, ovo hava diinine oipango yaKalunga nove na eitavelo la pama muJesus, va kale va pumbwa elididimiko.”

13 Onda uda ondaka tai popi okudja meulu tai ti, “Shanga eendjovo edi: Ovahongwa vOmwene,* ovo tava fi paife naavo tava ka fya komesho, otava kala va hafa. Omhepo iyapuki oya ti, nava tulumukwe koilonga yavo, osheshi Kalunga ota ka dimbuluka oilonga aishe oyo va longa.”

14 Ndele onda mona oshilemo shitoka, naau e li ko omutumba okwa fa omona womunhu, a djala oshishani shoshingoli komutwe noku na oshikashulifo shi na eememo meke laye.

15 Omweengeli vali umwe okwa dja motembeli,* ndele ta ingida pombada oo e li omutumba koshilemo ta ti: “Kufa oshikashulifo shoye u hovele okuteya, molwaashi eteyo ola fika, oilikolomwa yokombada yedu oya pya filufilu.” 16 Opo nee oo e li omutumba koshilemo okwa hovela okulongifa oshikashulifo shaye kedu fiyo eteyo la pwa.

17 Opa holoka vali omweengeli umwe a dja motembeli yomeulu e na oshikashulifo shi na eememo.

18 Natango opa holoka vali omweengeli umwe a dja koaltari e na eenghono dokupangela omundilo. Okwa ingida pombada oo e na oshikashulifo shi na eememo ta ti: “Kufa oshikashulifo shoye, ndele to ongele omashila omandjebele kedu, osheshi okwa pya.” 19 Omweengeli okwa longifa oshikashulifo shaye kedu nokwa ongela omandjebele kedu, opo nee okwe a tula moshikolelo shinene shomaviinyu ehandu laKalunga. 20 Omandjebele oo okwa tyanghaulilwa kondje yoshilando, nohonde oyo ya dja moshikolelo osho oya li ya twa moitomo yeenghambe noya ya oule woshinano sheekilometa 296 lwaapo.*

15 Onda mona edidiliko limwe vali linene nolikumwifi meulu, ovaengeli vaheyali ve kwete omahandukilo aheyali. Omahandukilo oo oo axuuninwa, molwaashi ehandu laKalunga otali ka lota okupitila muo.

2 Onda mona yo oshinima sha fa efuta, shi liwetikile sha fa ekende sha lumbakanifwa nomundilo, nonda mona ovafindani, ovo va finda oshilyani noshihongwafano shasho, nokave na edidiliko lonomola yedina lasho, ve li ofika pefuta olo ve kwete ouxumbafeta va dja kuKalunga. 3 Ova li tava imbi eimbilo laMoses omupiya waKalunga nolOdjona, tava ti:

“Jehova Kalunga, Omunaenghono adishe, oilonga yoye oinene noikumwifi. Ohamba yaalushe, eendjila doye oda yuka nodoshili. 4 Jehova, olyelye ite ku tila nokufimaneka edina loye, molwaashi oove auke omudiinini? Oiwana aishe otai ke uya nokulinyongamena koshipala shoye, shaashi oya mona kutya oho tokola pauyuki.”

5 Konima yaasho, onda mona meulu onhele iyapuki yotembeli omo mu na omalombwelo aKalunga ya yeuluka, 6 nomwa dja ovaengeli vaheyali ve na omahandukilo aheyali va djala oikutu yoliina i yela, tai vilima nove limanga omakwamo oshingoli peenhulo davo. 7 Opo nee shimwe shomoinamwenyo ine osha yandja kovaengeli vaheyali oiyaxa iheyali yoshingoli oyo ya li i yadi ehandu laKalunga, oo ta kala ko fiyo alushe. 8 Ndele monhele iyapuki omwa li tamu twimaana omwifi muhapu omolwoshinge neenghono daKalunga, nokapa li ou ta dulu okuya mo fiyo osheshi omahandukilo aheyali ovaengeli vaheyali a pwa.

16 Onda uda ondaka ya ingida pombada ya dja motembeli tai lombwele ovaengeli vaheyali tai ti: “Indeni mu ka tile oiyaxa iheyali yehandu laKalunga kombada yedu.”

2 Omweengeli wotete okwa ya, ndele ta tile oshiyaxa shaye kombada yedu. Opo nee ovanhu ovo ve na edidiliko loshilyani nohave linyongamene oshihongwafano shasho ova hepekwa neenghono koipute inyanyalifi.

3 Omweengeli omutivali okwa tila oshiyaxa shaye mefuta. Opo nee omeva okwa li a shituka ohonde ya fa yomunhu a fya, noinamwenyo* aishe yomefuta oya fya.

4 Omweengeli omutitatu okwa tila oshiyaxa shaye momilonga nomeefifiya domeva, ndele omeva taa shituka ohonde. 5 Opo nee onda uda omweengeli ou e na eenghono dokupangela omeva ta ti: “Kalunga, ove ou u li ko nowa kala ko, ou li omudiinini nomuyuki eshi wa ninga etokolo eli, 6 molwaashi ovanhu ovo va tilashi ohonde yovayapuki noyovaprofeti owe va nwefa ohonde, naasho ove shi lilongela.” 7 Onda uda ondaka tai popi koaltari tai ti: “Jehova Kalunga, Omunaenghono adishe, omatokolo oye oku shii okulineekelwa noku li pauyuki.”

8 Omweengeli omutine okwa tila oshiyaxa shaye ketango, netango ola li la pewa eenghono dokuxwika ovanhu nomundilo. 9 Ovanhu ova li tava pi koupyu wa hanya, ndele ponhele yokulidilulula nokufimaneka Kalunga oo a etifa omahandukilo oo, ova sheka edina laye.

10 Omweengeli omutitano okwa tila oshiyaxa shaye kolukalwapangelo loshilyani. Opo nee ouhamba washo owa hangwa komilaulu, novanhu ova hovela okulikwesha komayoo omolwouyahame, 11 ndele ponhele yokulidilulula koilonga yavo, ova sheka Kalunga komeulu omolwouyahame nomolwoipute yavo.

12 Omweengeli omutihamano okwa tila oshiyaxa shaye momulonga munene waEufrat, ndele omeva taa pwiinine, opo eehamba dokoushilo* di dule okweenda mo.

13 Onda mona eemhepo nhatu da nyata* da fa omafuma tadi di mokanya kongadu, mokanya koshilyani nomokanya komuprofeti omunaipupulu. 14 Eemhepo odo oda nwefwa mo keendemoni nohadi longo oikumwifilonga,* notadi ka ya keehamba adishe dokombada yedu noku di ongaleka opo di ka lwe oita mefiku linene laKalunga Omunaenghono adishe.

15 “Tala, ohandi uya ngaashi ombudi. Ou ta kala oupafi nokwa djala oikutu yaye aha ende hamunghele, opo ovanhu vehe mu mone, ndele ta fi ohoni, ota kala a hafa.”

16 Eemhepo da nyata oda ongaleka eehamba ponhele hai ifanwa mOshiheberi Armagedon.*

17 Omweengeli omutiheyali okwa tila oshiyaxa shaye momhepo. Opo nee kolukalwapangelo lomotembeli okwa udika ondaka ya ingida pombada tai ti: “Sha longwa sha pwa!” 18 Opa li pa holoka omaluvadi, pa udika eendaka nomingungumo nopa ningwa ekakamo ledu linenenene olo inali monika nande onale kombada yedu. 19 Oshilando shinene osha li sha tukulwa moitukulwa itatu, noilando yoiwana oya li ya teka po, na Kalunga okwa li a dimbuluka Babilon Shinene e shi pe eholo lomaviinyu ehandu laye linene. 20 Eenhunhu neemhunda adishe oda li da halakana po. 21 Opo nee meulu omwa dja eemhawe dinene di na ondjudo yeekilograma 20, 4* noda wila ovanhu, ndele tava sheke Kalunga omolwehandukilo leemhawe odo, molwaashi oda longa oushada neenghono.

17 Umwe womovaengeli vaheyali ovo ve na oiyaxa iheyali okwe uya, ndele ta ti kwaame: “Ila ndi ke ku ulikile nghee ombwada inene oyo i li omutumba komeva mahapu tai ka tokolwa, 2 oyo ya haela neehamba dokombada yedu, novanhu aveshe kombada yedu ova kolwa komaviinyu oluhaelo* layo.”

3 Omweengeli oo okwa pewa eenghono komhepo iyapuki, ndele ta twala nge mombuwa. Opo nee onda mona omukainhu e li omutumba koshilyani shitilyana shi yadi omadina omasheko, shi na omitwe heyali neembinga omulongo. 4 Omukainhu oo okwa li a djala oshikutu sholuvala lopeepela nelapi litilyana. Okwa li yo a djala oinima ya longwa moshingoli, momamanya ondilo nomokawe, nokwa li e na eholo meke laye li yadi oinima itondifa nosho yo oinima ya nyata i na sha noluhaelo* laye. 5 Okwa li a shangwa mombaba yoshipala shaye edina eli lihe shiivike: “Babilon Shinene, ina yeembwada noyoinima itondifa yokombada yedu.” 6 Omukainhu ou nda mona okwa li a kolwa kohonde yovayapuki noyeendombwedi daJesus.

Onda li nda kumwa neenghono eshi nde mu mona. 7 Opo nee omweengeli okwa tya kwaame: “Omolwashike wa kumwa? Ohandi ke ku lombwela oshiholekwa shi na sha nomukainhu oo nosho yo oshilyani oko a londa, osho shi na omitwe heyali neembinga omulongo: 8 Oshilyani osho wa mona sha li po, ndele tashi kana po, oshi li pokudja mo mombwili notashi ka hanaunwa po. Ovanhu kombada yedu, ovo omadina avo inaa shangwa membo lomwenyo okudja pehovelo lounyuni, otava ka kumwa eshi tava ka mona vali oshilyani osho sha li po, ndele tashi kana po.

9 “Omunhu okwa pumbwa eendunge nounongo, opo a ude ko oshinima eshi: Omitwe heyali otadi faneke eemhunda heyali oko omukainhu e li omutumba koxulo yado. 10 Ope na eehamba heyali: Nhano itadi pangele vali, imwe otai pangele, naimwe inai hovela natango. Ngeenge oya hovele, otai pangele ashike okafimbo kaxupi. 11 Oshilyani osho sha li po, ndele tashi kana po, osho ohamba onhihetatu, sha dja meehamba heyali notashi ka hanaunwa po.

12 “Eembinga omulongo odo wa mona otadi faneke eehamba omulongo odo inadi hovela natango okupangela, ashike oda pewa eenghono dokupangela di li eehamba oule wokafimbo kaxupi* pamwe noshilyani. 13 Eehamba odo odi na elalakano la faafana, onghee otadi yandje eenghono neenghonopangelo dado koshilyani. 14 Otadi ka lwifa Odjona, ndele otai ke di finda molwaashi oyo Omwene woovene nOhamba yeehamba. Ovo ve li pamwe nayo, ovo va ifanwa novahoololwa ovadiinini, navo otave ke di finda.”

15 Omweengeli okwa lombwela nge ta ti: “Omeva oo wa mona, oko ombwada ya kala omutumba, otaa faneke eengudu dovanhu, oiwana nomalaka. 16 Oshilyani nosho yo eembinga omulongo odo wa mona otadi ka tonda ombwada, tadi i kufa oinima yayo aishe, ndele tai kala hamunghele, notadi ka lya po ombelela yayo noku i xwika po filufilu nomundilo. 17 Osheshi Kalunga okwe shi tula momitima davo va wanife po elalakano laye, sha hala okutya elalakano lavo lokuyandja ouhamba wavo koshilyani fiyo osheshi eendjovo daKalunga da wanifwa. 18 Omukainhu oo wa mona oku lile po oshilando shinene osho tashi pangele eehamba dokombada yedu.”

18 Onda mona vali omweengeli umwe ta di meulu e na eenghonopangelo dinene, nedu ola li la minikilwa koshinge shaye. 2 Opo nee okwa ingida pombada ta ti: “Sha teka po! Babilon Shinene sha teka po, nosha ninga onhele yeendemoni, yeemhepo adishe da nyata noyeedila adishe da nyata noditondifa. 3 Osheshi osha kolwifa oiwana aishe nomaviinyu asho noshe i ningifa i ye moluhaelo.* Osha haela yo neehamba dokombada yedu nosha punapalifa ovashingifi* vokombada yedu noupuna washo muhapu unene.”

4 Onda uda ondaka imwe vali ya dja meulu tai ti: “Djeni mo musho ovanhu vange, opo muha kufe ombinga moulunde washo nomuha ka handukilwe pamwe nasho. 5 Osheshi oulunde washo owa hapupala, na Kalunga ote ke shi tokola omolwokuhenouyuki kwasho.* 6 Mu shunifila owii oo a ningila vamwe, mu shunifila luvali owii oo a longa; eholo olo a longekidila vamwe, li mu yadekela luvali. 7 Molwaashi okwa kala te litumbaleke nokwa kala e na oupuna muhapu unene, na hepekwe nokunyikifwa oluhodi. Osheshi okwa kala te lipopile momutima waye ta ti: ‘Ohandi pangele ngaashi ohambakainhu, kandi fi omufiyekadi nokandi na efiku ndi nyike oluhodi nandenande.’ 8 Ota ka hangwa komahandukilo moule wefiku limwe, kefyo, koluhodi nokondjala, nota ka hanaunwa po filufilu nomundilo molwaashi Jehova Kalunga oo te mu tokola omunaenghono.

9 “Ndele eehamba dokombada yedu, odo da haela nasho noda mona ouwa moupuna washo munene, otadi ka lila* eshi tadi ka mona omwifi washo eshi tashi xwikwa po. 10 Otadi ka kala ofika kokule da tila okuhepekwa ngaashi sho, notadi ka popya tadi ti: ‘Akutu hewa, akutu hewa, oshilando ove shinene, Babilon oshilando oshinaenghono, etokolo ole ku hanga ashike omutenya umwe auke!’

11 “Ovashingifi vokombada yedu navo otava ka lila noku shi nyikila oluhodi, molwaashi kape na vali ou ta ka landa oilandifomwa yavo, 12 ngaashi oshingoli, oshisilveri, omamanya ondilo, okawe, oiyata yoliina, oiyata yoluvala lipeepela, oiyata yosilki noiyata itilyana; oinima aishe ya longwa moiti yedimba liwa, momayoo eendjaba, moiti ya kola, mongopolo, moshivela nomomamanya mawa. 13 Oilandifomwa imwe vali ongaashi osinamono, oinyenyepeki yokoIndia, oitwimifo, omaadi edimba liwa, oidimba iwa, omaviinyu, omaadi eemono, oufila muwa, oilya,* eengobe, eedi, eenghambe, omatemba, ovapika novanhu vamwe.* 14 Oinima iwa oyo wa* kala wa hala oya kana po, eendja diwa noinima aishe ya denga mbada ku i na vali, noku na vali efiku u i mone.

15 “Ovashingifi ovo va li hava landifa oinima oyo, ovo va punapalekwa kusho, otava ka kala ofika kokule va tila okuhepekwa ngaashi sho, notava ka lila nokunyika oluhodi, 16 tava ti: ‘Akutu hewa, akutu hewa, oshilando ove shinene, wa djala oshikutu sholiina, shipeepela nelapi litilyana nowe liwapeka noinima yondilo ya longwa moshingoli, momamanya ondilo nomokawe, 17 oupuna woye muhapu unene owa hanaunwa po ashike omutenya umwe auke!’

“Ovashingi veeshikepa, ovaendifuta novalongi aveshe vomeeshikepa, naaveshe ovo hava mono oyuuyemo meedjo domefuta, otava ka kala ofika kokule 18 notava ka ingida eshi ve wete omwifi washo eshi tashi xwikwa po tava ti: ‘Ope na tuu oshilando sha fa oshilando osho shinene?’ 19 Otave ke lifundila edu momitwe notava ka ingida tava lili nova nyika oluhodi tava ti: ‘Akutu hewa, akutu hewa, oshilando ove shinene, omo mwa kala oovene veeshikepa aveshe ovo va punapalekwa koupuna washo, owa hanaunwa po omutenya umwe auke!’

20 “Nye ovo mu li meulu nosho yo ovayapuki, ovayapostoli novaprofeti, nyakukweni eshi Kalunga e shi tokola omolweni!”

21 Ndele omweengeli omunaenghono okwa kufa emanya la fa emanya linene loshini nokwe li ekela mefuta ta ti: “Oshilando shinene Babilon osho tashi ka hanaunwa po ngaha mepakumo leisho noitashi ka monika vali nandenande. 22 Itamu ka udika vali omunhu ta imbi, ta shiki okaxumbafeta, ile omusika ile eenyalilo nomanghuma. Itamu ka kala vali omuhambwidi ta hambula sha, noitamu ka udika vali elinyengo lemanya loshini. 23 Itamu ka monika vali ouyelele wolamba noitamu ka udika vali ondaka yomuhomboli noyomuhombolwa, osheshi owa pukifa oiwana aishe noumhulile woye, novashingifi voye ova li ovanenenhu vokombada yedu. 24 Musho omwa monika ohonde yovaprofeti, yovayapuki noyaaveshe ovo va dipawa kombada yedu.”

19 Onda uda oshinima meulu sha ingida sha fa eendaka dongudu inene, tadi ti: “Tangeni Jah!* Exupifo, efimano neenghono odaKalunga ketu, 2 molwaashi omatokolo aye oku shii okulineekelwa noku li pauyuki. Okwa tokola ombwada inene oyo ya nyateka edu noluhaelo* layo, nokwe i handukila eshi ya tilashi nomake ayo ohonde yovapiya vaye.” 3 Eendaka odo oda popya vali oshikando oshitivali da ti: “Tangeni Jah!* Omwifi wombwada oyo eshi tai xwikwa, otau kala tau twimaana fiyo alushe.”

4 Opo nee oinamwenyo ine nosho yo ovakulunhu 24 ova twa eengolo, ndele tava tange Kalunga oo e li kolukalwapangelo, tava ti: “Amen! Tangeni Jah!”*

5 Natango onda uda ondaka kolukalwapangelo tai ti: “Tangeni Kalunga ketu, ovapiya vaye amushe ovo hamu mu tila, eehepele noipuna.”

6 Ndele onda uda vali eendaka da fa dongudu inene, da fa epopomo lomeva mahapu noda fa omingungumo dinene, tadi ti: “Tangeni Jah,* molwaashi Jehova Kalunga ketu, Omunaenghono adishe, okwa hovela okupangela e li ohamba. 7 Natu mu fimanekeni nokunyakukwa unene molwaashi ehombolo lOdjona ola fika, nomuhombolwa okwe lilongekidila oshivilohombolo. 8 Omuhombolwa wOdjona okwa djalekwa oshikutu shiwa sholiina, shitoka tashi vema noshiyela. Oshikutu shiwa sholiina otashi faneke oilonga youyuki yovayapuki.”

9 Omweengeli okwa lombwela nge ta ti: “Shanga to ti: Ovo va shivwa koshivilohombolo shOdjona otava kala va hafa.” Okwa ti yo: “Eendjovo odo daKalunga odi shii okulineekelwa.” 10 Opo nee onda twa eengolo peemhadi daye ndi mu linyongamene. Ndele okwa tya kwaame: “Oto ningi ngahelipi? Ino linyongamena nge. Linyongamena Kalunga! Ame naame omupiya ngaashi ove nongaashi ovamwaxo ovo hava udifa kombinga yaJesus. Osheshi ovaprofeti ova nwefwa mo va hepaulule kombinga yaJesus.”

11 Onda li nda mona eulu la yeuluka nomwa li onghambe itoka. Omulondi wonghambe oyo oha ifanwa Omudiinini nOmulineekelwa. Omatokolo aye nolwoodi laye oli li pauyuki. 12 Oku na omesho a fa omalaka omundilo, nokwa djala oishani ihapu komutwe. Okwa shangwa edina olo lihe shiivike nande okomunhu, ndele oye aeke e li shii, 13 nokwa djala oshikutu shokombada shi na ohonde,* nedina laye oye Ondjovo yaKalunga. 14 Okwa li yo a shikulwa keengudu dovakwaita vomeulu va londa keenghambe ditoka nova djala oikutu iwa yoliina itoka noiyela. 15 Mokanya kaye omwa dja eongamukonda lile li na eememo lokuhanauna po oiwana, note ke i lifa nodibo yoshivela. Ota ka tyanghaula yo omandjebele moshikolelo shomaviinyu ehandu linene laKalunga Omunaenghono adishe. 16 Koshikutu shaye shokombada, ponho yaye, okwa shangwa edina tali ti, Ohamba yeehamba nOmwene woovene.

17 Onda mona vali omweengeli e li pokati ketango ta ingida pombada, ta lombwele eedila adishe hadi tuka pokati keulu nedu ta ti: “Ileni oku mu ongale koitendele inene yaKalunga, 18 opo mu lye ombelela yeehamba, yovakulunhu vomatangakwaita, yovanaenghono, yeenghambe, yovalondinghambe, yaaveshe, yovamangululwa, yovapika, yeehepele noyoipuna.”

19 Onda mona yo oshilyani neehamba dokombada yedu nomatangakwaita ado va ongala va ka lwife oo a londa konghambe pamwe netangakwaita laye. 20 Oshilyani osha kwatwa po pamwe nomuprofeti omunaipupulu oo a li a longa oikumwifilonga moipafi yasho nokwa pukifa ovo ve na edidiliko loshilyani naavo have linyongamene oshihongwafano shasho. Opo nee oshilyani nomuprofeti oo ova ekelwa nomwenyo mefuta lomundilo omo mu na omundilo wosulfuri wa hanya. 21 Ndele eehamba nomatangakwaita ado ova dipawa neongamukonda lile olo la dja mokanya kaao a londa konghambe, needila adishe oda li da kuta kombelela yavo.

20 Onda mona omweengeli ta di meulu e na oshapi yombwili nelyenge linene meke laye. 2 Opo nee okwa kwata po ongadu, eyoka likulu olo hali ifanwa Ondiaboli nosho yo Satana, nokwe i manga oule womido 1 000. 3 Okwe i umbila mombwili nokwa idila po, ndele ta tula ko oshipatifo, opo iha hongaule vali oiwana fiyo osheshi omido 1 000 da pwa ko. Konima yaasho, otai ka mangululwa oule wokafimbo kaxupi.

4 Onda mona yo omalukalwapangelo, naavo ve li omutumba kuo ova pewa eenghonopangelo dokutokola. Onda mona vali eemwenyo* daavo va dipawa* molwaashi va li tava hepaulula kombinga yaJesus nokuudifa kombinga yaKalunga, nodaavo inave linyongamena oshilyani ile oshihongwafano shasho nokava li ve na edidiliko meembaba doipala nopomake avo. Ova nyumunwa, notava pangele ve li eehamba pamwe naKristus oule womido 1 000. 5 Olo olo enyumuko lotete. (Oonakufya vakwao inava nyumunwa fiyo osheshi omido 1 000 da pwa ko.) 6 Ovo tava nyumunwa tete ovayapuki notava kala va hafa molwaashi itava ka fya vali,* ndele otava ka ninga ovapristeri vaKalunga novaKristus, notava ka pangela ve li eehamba pamwe naKristus oule womido 1 000.

7 Omido 1 000 ngeenge da pu ko, Satana ota ka mangululwa mo modolongo, 8 ndele ta i keembinga nhee dedu a ka pukife ovanhu vahapu,* sha hala okutya, Gog naMagog, e va ongalekele oita. Omuvalu wavo ou fike pehekedu lopefuta. 9 Ove lihanena ounyuni aushe nova dingilila onhanda yovayapuki noshilando osho shi holike kuKalunga. Ndele meulu omwa dja omundilo nowe va lungwinifa po. 10 Opo nee Ondiaboli oyo ya kala tai va pukifa oya umbilwa mefuta lomundilo wa hanyekwa nosulfuri omo mu na oshilyani nomuprofeti omunaipupulu; otava kala tava hepekwa* omutenya noufiku fiyo alushe.

11 Onda mona olukalwapangelo linene litoka naao e li ko omutumba. Eulu nedu ole mu ya onhapo, noya kana po filufilu. 12 Onda mona ovafi, oipuna neehepele, va fikama komesho yolukalwapangelo, nopa li omishangwatonywa da tonyununwa. Opa li yo pa tonyununwa omushangwatonywa umwe womwenyo, novafi ova li va tokolwa metwokumwe naasho sha shangwa momishangwatonywa odo she likolelela koilonga yavo. 13 Efuta, efyo nOmbila* oya yandja oonakufya ovo ve li muyo, noonakufya ovo ova li va tokolwa pauhandimwe she likolelela koilonga yavo. 14 Opo nee efyo nOmbila* oya umbilwa mefuta lomundilo. Efuta lomundilo otali ulike kefyo etivali. 15 Ovo inava shangwa membo lomwenyo ova umbilwa mefuta lomundilo.

21 Onda mona eulu lipe nedu lipe; eulu likulu nedu likulu ola xula po, nefuta kali po vali. 2 Onda mona yo oshilando shiyapuki, Jerusalem shipe, tashi di meulu kuKalunga sha wapalekwa ngaashi omuhombolwa a wapalekelwa omushamane waye. 3 Opo nee onda uda ondaka ya ingida okudja kolukalwapangelo tai ti: “Tala, etwali laKalunga oli li povanhu, nota ka kala pamwe navo, notava ka ninga oshiwana shaye. Kalunga mwene ota ka kala pamwe navo. 4 Ota ka feta po omahodi aeshe momesho avo, nefyo itali ka kala po vali, ile oluhodi, okulila nouyahame itau ka kala po vali. Oinima ikulu oya xula po.”

5 Ndele ou e li omutumba kolukalwapangelo okwa ti: “Tala, oinima aishe ohandi i ningi ipe.” Okwa ti yo: “Shanga, osheshi eendjovo edi odoshili nodi shii okulineekelwa.” 6 Opo nee okwa tya kwaame: “Eendjovo odo oda wanifwa. Aame Alfa naOmega,* ehovelo nexulilo. Ou a fya enota ohandi ke mu pa a nwe oshali mofifiya yomeva omwenyo. 7 Omufindani keshe ota ka fyuulula oinima oyo, nohandi ka ninga Kalunga kaye nota ka ninga omona wange. 8 Ndele omavaya, ovo vehe na eitavelo, ovo inava koshoka nohava longo oilonga ya nyata, ovadipai, ovahaeli,* ovo hava kufa ombinga moumhulile, ovalongeli voikalunga naaveshe ovo hava popi oipupulu otava ka ekelwa mefuta lomundilo wa hanyekwa nosulfuri. Osho otashi ulike kefyo etivali.”

9 Umwe womovaengeli vaheyali ovo va li ve na oiyaxa iheyali i yadi omahandukilo aheyali axuuninwa okwe uya, ndele ta ti kwaame: “Ila ndi ke ku ulikile omuhombolwa, omukulukadi wOdjona.” 10 Omweengeli oo okwa pewa eenghono komhepo iyapuki, nokwa twala nge komhunda inene noile, ndele ta ulikile nge oshilando shiyapuki Jerusalem tashi di meulu kuKalunga 11 noshi na oshinge shaKalunga. Ewapalo lasho ola fa emanya londilo, emanya loyaspis tali vema la fa ekende li liwetikile. 12 Oshi na ekuma linene nolile nosho yo omivelo 12, noposhivelo keshe opa li pe na omweengeli. Poivelo opa li pa shangwa omadina omapata 12 ovana vaIsrael. 13 Koushilo okwa li ku na oivelo itatu, kolundume okwa li ku na itatu, kolukadi itatu nokouninginino itatu. 14 Ekuma loshilando osho ola li li na omamanya 12 ekanghameno, nokomamanya oo okwa li kwa shangwa omadina 12 ovayapostoli 12 vOdjona.

15 Oo a li ta popi naame okwa li e na olumbungu lokumeta li na oluvala la fa oshingoli, opo a mete oshilando, oivelo yasho nekuma lasho. 16 Oshilando osho oshi na eembinga nhee di fike pamwe, sha hala okutya, oule womukokomoko nounene oi fike pamwe. Omweengeli okwa li e shi meta nolumbungu; oule womukokomoko, omutamo, noule wopombada oya li i fike pamwe, i na eekilometa 2 220 lwaapo.* 17 Okwa li yo a meta ekuma lasho, olo la li li na omaludimbo 144.* Ekuma olo okwe li meta naanaa pamufika wopanhu. 18 Ekuma ola li la tungifwa omamanya oyaspis, noshilando osha li sha tungifwa oshingoli elela sha fa ekende li liwetikile. 19 Omakanghameno ekuma loshilando okwa longwa momaludi omamanya ondilo e lili noku lili: emanya lotete lekanghameno oyaspis, etivali osafiro, etitatu okalkedo, etine osmaragidi, 20 etitano osardonis, etihamano osardio, etiheyali okrisolite, etihetatu oberili, etimuwoi otopas, etimulongo okrisoprasi, etimulongo nalimwe ohiasint netimulongo netivali oametisti. 21 Shimwe vali, omivelo 12 oda longwa mouwe 12, sha hala okutya, omuvelo keshe owa longwa mokawe kamwe. Omukala wa kula woshilando osho owa longwa moshingoli elela sha fa ekende li liwetikile.

22 Moshilando osho inandi mona mo otembeli, molwaashi otembeli yasho oJehova Kalunga Omunaenghono adishe nosho yo Odjona. 23 Inashi pumbwa okuminikilwa ketango ile komwedi, molwaashi otashi minikilwa koshinge shaKalunga, nolamba yasho Odjona. 24 Ouyelele washo otau ka minikila eendjila doiwana, neehamba dokombada yedu otadi ke shi fimanekifa. 25 Omivelo dasho itadi ka idila omutenya, noitamu ka kala oufiku nandenande. 26 Eehamba otadi ke shi tumbalekifa noku shi fimanekifa koiwana. 27 Keshe ou ta longo osho inashi koshoka nomukengeleledi ita ka ya mo musho. Ovo va shangwa membo lomwenyo lOdjona ovo ashike tava ka ya mo.

22 Omweengeli okwa ulikila nge omulonga womeva omwenyo, mayela a fa okawe, taa kunguluka taa di kolukalwapangelo laKalunga nolOdjona 2 notaa tavakana pokati kepandavanda la kula. Momunghulo womulonga oo omwa li omiti domwenyo hadi imi oiimati lwoikando 12 momudo, sha hala okutya, hadi imi omwedi keshe. Omafo ado otaa velula oiwana.

3 Oshilando itashi ka fingwa vali. Ndele otamu ka kala olukalwapangelo laKalunga nolOdjona, novapiya vaKalunga otave ke mu longela oilonga iyapuki. 4 Otava ka mona oshipala shaye, nedina laye otali ka shangwa meembaba doipala yavo. 5 Itamu ka kala vali oufiku, noitava ka pumbwa ouyelele wolamba ile wetango, molwaashi Jehova Kalunga ote ke va minikila, notava ka pangela ve li eehamba fiyo alushe.

6 Omweengeli okwa lombwela nge ta ti: “Eendjovo odo odoshili nodi shii okulineekelwa. Jehova Kalunga, oo a nwefa mo ovaprofeti, okwa tuma omweengeli waye a ulikile ovapiya vaye oinima oyo tai ka ningwa diva. 7 Tala, ohandi uya diva. Keshe ou ta diinine eendjovo dopaxunganeko odo di li membo eli ota kala a hafa.”

8 Ame Johannes, aame nda uda nonda mona oinima oyo. Eshi nde i uda nonde i mona, onda twa eengolo, ndele handi linyongamene peemhadi domweengeli oo a li te i ulikile nge. 9 Ndele okwa tya kwaame: “Oto ningi ngahelipi? Ino linyongamena nge. Linyongamena Kalunga! Ame naame omupiya ngaashi ove nongaashi ovamwaxo ovaprofeti, naavo hava diinine eendjovo odo di li membo eli.”

10 Okwa lombwela nge yo ta ti: “Eendjovo dopaxunganeko odo di li membo eli, ino di kaleka oshiholekwa molwaashi eufwafimbo oli li popepi. 11 Omuhenouyuki keshe na twikile okulonga okuhenouyuki, nakeshe ou e na elihumbato inali koshoka na twikile noilonga yaye inai koshoka. Ndele omuyuki na twikile okulonga ouyuki, nomuyapuki na twikile okulonga oilonga iyapuki.

12 “‘Tala, ohandi uya diva, nohandi ka pa keshe umwe ondjabi she likolelela koilonga yaye. 13 Aame Alfa naOmega,* aame ndotete nondaxuuninwa, ehovelo nexulilo. 14 Ovo va kosha oikutu yavo otava kala va hafa, molwaashi otava dulu okulya komuti womwenyo notava dulu okupita moivelo va ye moshilando. 15 Pondje yoshilando ope na eembwa,* ovo hava kufa ombinga moumhulile, ovahaeli,* ovadipai, ovalongeli voikalunga naaveshe ovo ve hole oipupulu nohave i popi.’

16 “‘Ame Jesus, onda tuma omweengeli wange e mu hepaululile kombinga yoinima oyo omolwouwa womaongalo. Ame omudi noludalo laDavid, nondi li onyofi yokeengula tai minikile.’”

17 Omhepo nomuhombolwa otava ti: “Ila!” Keshe ou te shi udu na tye, “Ila!” Nakeshe ou a fya enota ne uye; keshe ou a hala ne uye a nwe omeva omwenyo oshali.

18 “Ame ohandi lombwele keshe umwe oo ta udu eendjovo dopaxunganeko odo di li membo eli, tadi ti: Keshe ou ta weda mo sha moinima aishe oyo ya shangwa, Kalunga naye ote mu wedele ko komahandukilo oo a shangwa membo eli. 19 Keshe oo ta kufa mo sha meendjovo domembo eli lopaxunganeko, Kalunga ite ke mu pitika a mone oinima iwa oyo ya shangwa mo. Sha hala okutya, ite ke mu pitika a lye oiimati komuti womwenyo nokuya moshilando shiyapuki.

20 “Ou a popya oinima oyo okwa ti: ‘Ohandi uya diva.’”

“Amen, Omwene Jesus, ila.”

21 Efilonghenda lOmwene Jesus nali kale pamwe novayapuki.