Etwalemo

OMAHOKOLOLO oo e li membo eli oku li paushili. Okwa kufwa membo olo linenenene mounyuni, Ombibeli. Omahokololo oo otaa popi ondjokonona younyuni okudja eshi Kalunga a hovela okushita oinima fiyo opefimbo letu. Otaa popi yo kombinga yaasho Kalunga a udaneka oku ka ninga monakwiiwa.

Embo eli otali ku kwafele u mone kutya Ombibeli otai hongo shike. Otali hokolola kombinga yovanhu vopefimbo lOmbibeli nosho yo oinima oyo va li va ninga. Otali hokolola yo kombinga yeteelelo likumwifi olo Kalunga a udanekela ovanhu, eteelelo loku ka kala nomwenyo waalushe moparadisa kombada yedu.

Membo eli omu na omahokololo 116. Omahokololo oo okwa tukulwa moitukulwa ihetatu. Pehovelo loshitukulwa keshe ope na epandja olo tali yandje ouyelele pauxupi kombinga yaasho sha kundafanwa momahokololo oo e li moshitukulwa osho. Omahokololo okwa hokololwa palandulafano ngaashi oiningwanima yao ya li ya ningwa mondjokonona. Osho otashi ku kwafele u shiive kutya onaini oiningwanima ya li ya ningwa, mokuyelekanifa noinima ikwao oyo ya ningwa mondjokonona.

Omahokololo oo okwa hokololwa melaka li li paunafangwa. Ounona, vahapu vomunye otamu ka dula oku a lesha nye vene. Ovadali, otamu ka didilika kutya ounona veni ava vanini otava ka kala va hafa ngeenge tamu va leshele omahokololo oo lwoikando. Otamu ka mona yo kutya embo eli oli na oinima ihapu ihokwifa kounona ndele nokovakulunhu.

Omishangwa oko kwe likolelela omahokololo oda shangwa pexulilo lehokokolo keshe. Oto ladipikwa u leshe oitukulwa yOmbibeli oko kwe likolelela omahokololo. Ngeenge owa mane okulesha ehokololo lonhumba, tala yo omapulo okukonakona ehokololo olo, oo e li konima yehokololo 116 ndele to kendabala u a kongele omanyamukulo.