Etukulwa 8
Omhangela yomupangeli omukwanyanya i na sha nokudipaa Jesus oya li ya ponya
EFIKU limwe, Josef okwa li a pendula Maria opo e mu lombwele onghundana oyo ya li ya endelela. Omweengeli waJehova okwa li a holokela Josef mondjodi ndele te mu lombwele ta ti: “Fikama, kufa okaana naina u ye onhapo kuEgipti, u kale kwinya fiyo ohandi ku lombwele; osheshi Herodes e li po ta diladila okukonga okaana e ka dipae.”
Divadiva, Josef, Maria naJesus ova li va ya onhapo. Pefimbo olo opo naanaa Herodes a li a uda kutya ovanongo veenyofi ove mu henuka nova ya koshilongo shambulavo. Dimbuluka kutya ova li ve na oku ke mu lombwela kutya Jesus oku li peni ngeenge ove mu mono, onghee hano, osho osha li sha handukifa Herodes neenghono. Opo Herodes a dipaife ngeno Jesus, okwa li a yandja elombwelo kutya ounona voumati aveshe vomuBetlehem nokoitukulwa yasho, ovo ve li koshi yomido mbali, nava dipawe. Okwa li a dipaifa ounona ovo ve na eedula mbali okuyuka pedu molwaashi okwa li a valula she likolelela kouyelele oo a li a pewa kovanongo veenyofi ovo va dile kOushilo.
Okudipawa kwouhanana aveshe oumati kakwa li tuu oshinima shii neenghono! Ovakwaita vaHerodes ova li va enda eumbo neumbo, nongeenge va li va hanga mo okahanana kokamati ohave ka nyeke ko kuina. Katu shii kutya ovakwaita ovo ova li va dipaa ouhanana vangapi, ndelenee ovadalakadi ova li tava lili eenghali neenghono, naasho osha li sha wanifa po exunganeko lOmbibeli olo la li la shangwa komuprofeti waKalunga, Jeremia.
Pefimbo opo, Josef noukwaneumbo waye ova li va fika nawa kuEgipti, ndele tava kala oko. Ndelenee onguloshi imwe, omweengeli umwe waJehova okwa li a holokela natango Josef mondjodi. Okwa li e mu lombwela a ti: “Fikama, kufa okaana naina, u ye kedu laIsrael, osheshi venya . . . va kongele omwenyo wokaana, ova fya.” Kungaho, oukwaneumbo wavo owa li wa shuna koshilongo shambulavo, naasho osha li sha wanifa po exunganeko limwe vali lOmbibeli olo tali ti kutya Omona waKalunga okwa li ta ka ifanwa mo muEgipti.
Otashi dulika Josef a li a hala okukala muJudea, omo va li nale eshi va li hava di modoolopa yedina Betlehem fimbo va li inava ya onhapo kuEgipti. Ndele Josef okwa li a uda kutya omonamati waHerodes, Arkelaus omukolokoshi, oye a li ohamba muJudea, na Jehova okwa li yo a londwela Josef mondjodi shi na sha naasho. Onghee hano, Josef noukwaneumbo waye ova li va enda va yuka kolundume ndele tava ka kala modoolopa imwe yomuGalilea yedina Nasaret. Jesus okwa li a kulila momudingonoko omo mwa li muhe na ondingandinga yelongelokalunga lOshijuda. Mateus 2:13-23; Jeremia 31:15; Hosea 11:1.
▪ Eshi ovanongo veenyofi va li inava shuna kohamba Herodes, Herodes okwa li a longa oshilonga shinyanyalifi shilipi, na Jesus okwa li a amenwa ngahelipi?
▪ Eshi Josef va li va aluka kuEgipti, omolwashike va li inava kala vali muBetlehem?
▪ Omaxunganeko Ombibeli elipi a li a wanifwa momukokomoko wefimbo olo?