Etukulwa 34
Jesus ta hoolola ovayapostoli vaye
OPA li pa pita omudo umwe netata lwaapo okudja eshi Johannes Omuninginifi a li a lombwela ovanhu kutya Jesus oye Odjona yaKalunga nosho yo eshi Jesus a hovela oukalele waye womoipafi. Pefimbo opo, Andreas, Simon Petrus, Johannes nosho yo tashi dulika Jakob (omumwaina waJohannes), Filippus naNatanael (oo ha ifanwa yo Bartolomeus) ova li va ninga ovahongwa vaJesus votete. Ashike ovanhu vahapu ova ka shikula Kristus momukokomoko wefimbo.
Jesus okwa li e lilongekida okuhoolola ovayapostoli vaye. Ovayapostoli ovo ova li tava ka kala ookaume kaye kopofingo nova li tava ka pewa edeulo le likalekelwa. Ndele fimbo Jesus ina hoolola ovayapostoli vaye, okwa li a ya komhunda ndele ta ilikana oufiku aushe, tashi dulika a li ta pula Kalunga e mu pe ounongo noku mu nangeke noupuna. Eshi kwa sha, Jesus okwa li a ifana ovahongwa vaye ndele ta hoolola mo ve li 12. Ashike navo ova li tava ka kala tava ifanwa natango ovahongwa vaye, molwaashi okwa li ta ka twikila oku va honga.
Ovahongwa vahamano ovo va tumbulwa metetekelo ovo Jesus a li a hoolola, ovovo va li va ninga ovahongwa vaye tete. Mateus, oo Jesus a li a ifana moilonga yokufendelifa, naye okwa li a hoololwa a ninge omuyapostoli. Ovayapostoli vakwao vali ovo Jesus a li a hoolola ovo Judas (oo ha ifanwa yo Tadeus), Judas Iskariot, Simon Omukaana, Tomas nosho yo Jakob omona waAlfeus. Jakob oo oha ifanwa yo Jakob Munini, tashi dulika molwaashi a li e na olutu linini ile munini meedula e dule omuyapostoli mukwao wedina Jakob.
Ovayapostoli ovo 12 ova li va kala naJesus oule wefimbo, nopefimbo opo okwa li e va shii nawa. Ovayapostoli vahapu vaJesus ova li ovapambele vaye. Jakob nosho yo omumwaina Johannes otashi dulika va li oomhedi vaJesus. Otashi dulika yo Alfeus a li omumwaina waJosef, oo a li xe omutekuli waJesus. Onghee hano, omuyapostoli Jakob, omona waAlfeus, naye okwa li mhedi yaJesus.
Jesus ka li e na oupyakadi wokudimbuluka omadina ovayapostoli vaye. Ndele mbela ove oto dulu ngoo oku a dimbuluka? Dimbuluka ashike kutya ope na ooSimon vavali, ooJakob vavali, ooJudas vavali, nosho yo kutya Simon oku na omumwaina Andreas nonokutya Jakob oku na omumwaina Johannes. Onghedi ya tya ngaho otai ku kwafele u dimbuluke ovayapostoli vahetatu. Ovayapostoli vakwao vane ovo omufendelifi (Mateus), omuyapostoli umwe oo a li a kwatwa komalimbililo (Tomas), omuyapostoli umwe oo a li a ifanwa eshi a li omutumba momuti (Natanael) nosho yo kaume kaye Filippus.
Ovayapostoli omulongo naumwe ova li va dja kuGalilea, koshitukulwa oko kwa dja Jesus. Natanael okwa dile kuKaana. Filippus, Petrus nosho yo Andreas ova dile kuBetsaida. Petrus naAndreas konima yefimbo ova ka tembukila kuKapernaum, oko tashi dulika kwa kala Mateus. Jakob naJohannes ova li mongeshefa yokuyula eeshi, notashi dulika navo va li hava di muKapernaum ile popepi nasho. Judas Iskariot, oo a ka kengelela Jesus, okwa fa oye aeke womovayapostoli a dile kuJudea. Markus 3:13-19; Lukas 6:12-16.
▪ Ovayapostoli velipi tashi dulika va li ovapambele vaJesus?
▪ Oolyelye va li ovayapostoli vaJesus, nongahelipi hatu dulu okudimbuluka omadina avo?
▪ Ovayapostoli vaJesus ova dile koitukulwa ilipi?