Otu na okutala ko ngahelipi okusalutila epandela, okukufa ombinga momahoololo opapolotika nosho yo oilonga yopashiwana?

Okusalutila epandela. Eendombwedi daJehova oda itavela kutya okulinyongamena epandela ile oku li salutila, osho luhapu hashi endele pamwe nokwiimba omaimbilo opashiwana, oshi li oshinima shopalongelokalunga, osho tashi yandje efimano kepangelo ile kovapangeli omolwexupifo, ndele hakuKalunga. (Jesaja 43:11; 1 Ovakorinto 10:14; 1 Johannes 5:21) Omupangeli umwe oo a li a fimanekwa monghedi ya tya ngaho okwa li Nebukadnesar, ohamba yaBabilon shonale. Opo a kumwife ovanhu netumbalo laye nosho yo ouladi waye wopalongelokalunga, omupangeli oo omunaenghono okwa li a dika po oshihongwafano shinenenene ndele ta lombwele ovapangelwa vaye ve shi twile eengolo ofimbo omusika ya li tai dana, oyo i li ongeimbilo lopashiwana. Ndele nande ongaho, Ovaheberi vatatu, Sadrak, Mesak naAbednego, ova li va anya okutwila eengolo oshihongwafano osho, nonande okwa li tashi pula eemwenyo davo. — Daniel, etukulwa eti-3.

Omunandjokonona umwe, Carlton Hayes, okwa popya kutya kunena “epandela oli li edidiliko linene leitavelo moukwashiwana nola talika ko li li oshinima sha fimanenena osho shi na okwiilikanwa. Ovalumenhu ohava dula ko omambale avo ngeenge epandela tali piti poima; ovatoti voutevo ohava toto outevo tava tange epandela, ofimbo ounona ohava imbi omaimbilo tava tange epandela.” Omunandjokonona oo okwa weda ko a ti kutya, omolwoukwashiwana, oilongo oi na yo “omafiku mayapuki,” ngaashi efiku Etine laJuli olo hali danwa mOilongo yaHangana, “omapendafule” oo haa talwa ko e li “ovayapuki” nosho yo eenhele odo hadi talwa ko onga “eetembeli.” Poshivilo shopashiwana muBrasilia, omupresidende womhangu yopombada yovakwaita okwa ti: “Epandela ohali fimanekwa nokwiilikanwa . . . ngaashi ashike ovanhu hava ilikana omaduumbo.” O-The Encyclopedia Americana oya tile kutya “epandela oliyapuki ngaashi ashike omushiyakano.”

Oensiklopedia oyo ya tumbulwa metetekelo oya popya efimbo opo la di ko ya ti kutya omaimbilo opashiwana “ohaa holola omhepo youkwashiwana naluhapu ohaa kala a kwatela mo eilikano kuKalunga opo a wilike nokwaamena oshiwana ile ovapangeli.” Onghee hano, osha yeleka eshi ovapiya vaJehova hava tale ko oivilo yopashiwana oyo ya kwatela mo okusalutila omapandela nosho yo okwiimba omaimbilo opashiwana i li oinima yopalongelokalunga. Eshi embo The American Character la li la ninga etyekosha kombinga yaashi ounona vEendombwedi daJehova hava anye okusalutila omapandela nosho yo okuudaneka okukala ovadiinini kulo meefikola domOilongo yaHangana, ola ti: “Okutya kutya eenghedindjikilile da tya ngaho dakeshe efiku odi li oinima yopalongelokalunga osha diminwa hauxuuninwa kOmhangu yoPombada moikoya ya landulafana yopaemhangu.”

Nonande ovapiya vaJehova ihava kufa ombinga moivilo oyo va tala ko ihe li pamishangwa, ohava fimaneke oufemba wavamwe wokudana oivilo ya tya ngaho. Ova fimaneka yo omapandela opashiwana e li omadidiliko nohava tale ko omapangelo oilongo omo ve li e li ‘ovayakuli vaKalunga.’ (Ovaroma 13:1-4) Onghee hano, Eendombwedi daJehova ohadi dulika kekumaido li na sha nokukwatela mo “eehamba novapangeli aveshe” momailikano ado. Ndele ohadi shi ningi nelinyengotomheno ‘opo di kale di na okukalamwenyo ku na ombili nengungumano metilokalunga nomeenghedi diwa da fimana.’ — 1 Timoteus 2:2.

Okukufa ombinga momahoololo opapolotika. Ovakriste vashili ohava fimaneke oufemba wavamwe wokuhoolola. Ihava kufa ombinga moikonga yokutwa ondubo nomahoololo, ndele nande ongaho, ohava dulika kovapangeli ovo va hoololwa. Ihava kufa nandenande ombinga moinima yopapolotika yoiwana. (Mateus 22:21; 1 Petrus 3:16) Ovakriste ove na okuninga po shike moilongo omo ovanhu aveshe va teelelwa va hoolole ile omo ovo itava i keenhele dokuhoololela tava patanekwa neenghono? Dimbuluka kutya Sadrak, Mesak naAbednego ova li va ya kefilu laDura. Sha faafana, Omukriste oo e li meenghalo da yukila oko ota dulu okutokola okuya oko taku ningilwa omahoololo ngeenge eliudo laye otali mu pitike a ye. Ndelenee oku na okukala a lungama aha nyone po omufika waye wokuhenombinga moinima yopapolotika. Oku na okukaleka momadiladilo omafinamhango ahamano aa taa landula apa:

1. Ovashikuli vaJesus ‘kave fi vomounyuni.’ — Johannes 15:19.

2. Ovakriste ove lile po Kristus nosho yo Ouhamba waye. — Johannes 18:36; 2 Ovakorinto 5:20.

3. Eongalo lopaKriste ola hangana paitavelo, noilyo yalo oya hanganifwa kohole yopaKriste. — 1 Ovakorinto 1:10; Ovakolossi 3:14.

4. Ovo hava hoolola omupangeli wonhumba ohava kala ve na ondjo mwaasho omupangeli oo va hoolola ta ningi. — Didilika omafinamhango oo taa hangwa meendjovo odo di li mu 1 Samuel 8:5, 10-18 nosho yo mu 1 Timoteus 5:22.

5. Eshi Ovaisrael va li va hala omupangeli wopanhu, Jehova okwa li e shi tala ko kutya ove mu ekelashi. — 1 Samuel 8:7.

6. Ovakriste ove na okukala ve na emanguluko lokupopya ngeenge tava popi novanhu veengudu dopapolotika di lili noku lili kombinga yepangelo lOuhamba waKalunga. — Mateus 24:14; 28:19, 20; Ovaheberi 10:35.

Oilonga yopashiwana. Moilongo imwe, omapangelo ohaa pula ovanhu ovo tava anye okuya moukwaita va longe oilonga yonhumba yopashiwana oule wefimbo. Ngeenge twa taalelwa konghalo ya tya ngaho, otu na okwiilikana kombinga yayo, nokukundafana tashi dulika nOmukriste mukwetu a pyokoka opo tu dule okuninga etokolo she likolelela keliudo letu la deulwa nawa. — Omayeletumbulo 2:1-5; Ovafilippi 4:5.

Eendjovo daKalunga otadi tu lombwele tu ‘dulike kovapangeli nokovakulunhu voshilongo nokukala twe lilongekidila oshilonga keshe shiwa, nokukala tu na ondjele.’ (Titus 3:1, 2, yelekanifa NW.) Ngeenge hatu tale keendjovo odo, natu lipule omapulo aa taa landula apa: ‘Mbela oludi loilonga yopashiwana oyo handi pulwa ndi longe oi li omhinge nomufika wopaKriste wokuhenombinga ile otai ka ningifa nge ndi kufe ombinga momalongelokalunga oipupulu?’ (Mika 4:3, 5; 2 Ovakorinto 6:16, 17) ‘Ngeenge onda kufa ombinga moilonga ya tya ngaho, itashi ka kala mbela shidjuu kwaame okuwanifa po oinakuwanifwa yange yopaKriste ile shi ye filufilu moshipala omalipyakidilo ange opaKriste?’ (Mateus 28:19, 20; Ovaefeso 6:4; Ovaheberi 10:24, 25) ‘Mepingafano naasho, mbela ngeenge onda kufa ombinga moilonga ya tya ngaho otashi ka pange omhito ya wana yokutamununa mo omalipyakidilo ange opaKriste, tashi dulika nokuli shi pe nge omhito ndi kufe ombinga moukalele wefimbo li yadi?’ — Ovaheberi 6:11, 12.

Ngeenge Omukriste okwa fiki pexulifodiladilo la diladilwa nawa kutya ota ka longa oilonga yopashiwana ponhele yokuya modolongo, Ovakriste vakwao ove na okufimaneka etokolo laye. (Ovaroma 14:10) Ndele ngeenge oku wete kutya ita dulu okulonga oilonga ya tya ngaho, natango vamwe ove na okufimaneka etokolo laye. — 1 Ovakorinto 10:29; 2 Ovakorinto 1:24.