Ounongo wopakalunga otau ulikwa ngahelipi?
“OUNONGO wohepele tau dinwa, ndele kaku na umwe a pwilikina eendjovo dayo.” Ohamba inaendunge Salomo oya xulifa ehokololo lomulumenhu omunaendunge ndele omukwanaluhepo oo a xupifa oshilando ashishe mehanauno, neendjovo edi. Ndelenee mupya munene, “kakwa li nande umwe a dimbulukwa omulumenhu winya ohepele.”—Omuudifi 9:14-16.
Ovanhu ove na oikala yokutala ko ovafyoona nodino, nokuli nande ovafyoona ova longa oshilonga sha tumbala. Eshi osho naanaa sha li ngaha shi na sha naJesus. Jesaja okwa xunganeka kombinga yaye a ti: “Ye okwa li a dinika, okwa li a efiwa kovanhu, omulumenhu womaluhodi nomwiiki wouyahame.” (Jesaja 53:3) Molwaashi Jesus ka li e na ondodo ile etumbalo olo kwa li li niwe kovawiliki vopomafiku aye, okwa li a dinika. Ndele okwa li e na ounongo muhapu u dule kokule oo wakeshe omunhu omulunde. Ovanhu vomodoolopa yambulavo ova anya okudimina kutya Jesus “omona womuhongi woipilangi” oye ta ulike ounongo wa tya ngaha nota longo oilonga yeenghono ya tya ngaha. Ndelenee eli ola li epuko la kwata moiti, osheshi ehokololo otali twikile tali ti kutya “omolwokuhaitavela kwavo [Jesus] ina ningila ko oilonga ihapu yeenghono.” Ovanhu ava kakwa li tuu va kanifa shihapu!—Mateus 13:54-58, yelekanifa OB-1986.
Inatu ninga nande epuko la faafana. Jesus okwa ti: “Ounongo wa hololwa oo wa yuka koilonga yao.” Ava tava longo oilonga yaKalunga notava nwefwa mo kounongo womeulu ova tumbalekwa, ndele hakeendodo ile komufika wavo oo ve na mokati kovakwashiwana, ndele ‘okoiimati iwa’ oyo tava ulike—eitavelo nosho yo oilonga yavo ye likolelela kOmbibeli.—Mateus 7:18-20; 11:19, OB-1954.
[Efano pepandja 32]
OWA HALA OKUTALELWA PO?
Nokuli mounyuni ou u yadi omaupyakadi, oto dulu okumona elao tali di meshiivo lolelalela lOmbibeli lokushiiva Kalunga, Ouhamba waye nelalakano laye likumwifi olo a udanekela ovanhu. Ngeenge owa hala okumona ouyelele we lixwa po ile ngee owa hala umwe e ku talele po nokuninga naave ekonakonombibeli lopeumbo oshali, alikana shangela koWatch Tower, Private Bag X2067, Krugersdorp, 1740, South Africa, ile kuimwe yomeendjukifi odo da shangwa pepandja 2.