Mbela Kalunga oku na ko nasha nangame?

Shoka oyendji haya ti:

▪ “Kalunga okwa simana unene nokukala ti ipula nuupyakadhi wandje.”

▪ “Kandi wete e na ko nasha nangame.”

Jesus okwa ti ngiini?

▪ “Omanza gatano itaga landithwa po nani nando uupeni uyali auke? Ihe kaku na nando olimwe lya dhimbiwa kuKalunga. Oshoka nomafufu geni gokomutse oga yalulwa. Ano inamu tila: one mu vule omanza ogendji.” (Lukas 12:6, 7) Nopwaahe na omalimbililo, Jesus okwa longo aantu kutya Kalunga oku na ko nasha natse.

▪ “Inamu kala mu na oshimpwiyu mu tye: ‘Otatu li shike?’ nenge: ‘Otatu nu shike?’ nenge: ‘Otatu zala shike?’ Ayihe mbika otayi lalakanenwa kaapagani. Oshoka Ho yeni yomegulu oku shi shi kutya omwa pumbwa mbika ayihe.” (Mateus 6:31, 32) Jesus okwa li e na uushili kutya Kalunga oku shi oompumbwe dhetu dhopaumwene.

OMBIIMBELI oye shi popya lela kutya Kalunga oku na ko nasha natse. (Episalomi 55:22; 1 Petrus 5:7) Ngele oku na ko nasha, omolwashike tatu mono iihuna? Ngele Kalunga omunahole nomunakondoadhihe, omolwashike ihaa ningi po sha a hulithe po okumona iihuna?

Eyamukulo olya kwatela mo oshili ndjoka kaayi shiwike koyendji kutya Satana Ondiaboli oye ta pangele uuyuni mbuka wa yonuka. Sho a li ta makele Jesus, Satana okwa li e mu uvanekele omapangelo agehe gomuuyuni a ti: “Otandi ku ningi omupangeli gwaayihe notandi ku pe omauyamba agehe, oshoka ayihe mbika otandi vulu oku yi pa kehe ngoka nda hala.”—Lukas 4:5-7.

Olye a ningi Satana omupangeli guuyuni? Sho aakuluntu yetu yotango, Adam naEva ya vulika kuSatana nokupilamena Kalunga, kungawo oya li ye mu hogolola e li omupangeli gwawo. Okuza puunashipotha mboka, Jehova Kalunga okwe etha pu pite ethimbo opo u ulike kutya okupangela kwaSatana itaku etele aantu uuwanawa washa. Jehova ina thiminika aantu ye mu longele, ihe okwe egulula ondjila opo tu galukile kuye.—Aaroma 5:10.

Molwaashoka Kalunga oku na ko nasha natse, okwa ninga po elongekidho opo Jesus e tu mangulule mepangelo lyaSatana. Monakuyiwa yi li popepi, Jesus ota ka “hanagula po neso lye mwene omuhindadhi, ngoka he eta eso.” (Aahebeli 2:14) Moku shi ninga, ota ka “hanagula po iilonga yomuhindadhi.”—1 Johannes 3:8.

Evi otali ka ningululwa oparadisa. Pethimbo mpoka, Kalunga ota ka “theta omahodhi agehe momeho [gaantu]. Oko noitaku ka kala we eso, oluhodhi, [elilo] nenge uuwehame. Oshoka iikulu oya hula po.”—Ehololo 21:4, 5.a

[Enyolo lyopevi]

[Oohapu dha simana pepandja 8]

Evi otali ka ningululwa oparadisa