Ehena popepi naKalunga
Kalunga ota dulu ngoo okulialuluka?
TU LI OVANHU INAVA WANENENA, atushe ohatu dulu okulialuluka ile okulipa oushima omafimbo amwe. Pashihopaenenwa, ohatu dulu okulipa oushima ngeenge otwa didilike kutya otwa ninga epuko lonhumba. Ndele oshihokwifa eshi Ombibeli tai ti kutya Jehova ota dulu okulialuluka. Ashike otashi dulika u tye: ‘Kalunga okwa wanenena noiha ningi omapuko.’ Ndele mbela omonghedi ilipi Kalunga he lialuluka? Enyamukulo kepulo olo otali dulu oku tu kwafela tu ude ko oshinima shimwe shikumwifi neenghono osho kutya Jehova oku na omaliudo, neenghatu odo hatu katuka otadi dulu okukuma omaliudo aye. Natu ka tale keendjovo odo di li mOvatokolipangeli 2:11-18.
Embo lOmbibeli lOvatokolipangeli otali popi shi na sha nefimbo olo la li lidjuu mondjokonona yOvaisrael. Pefimbo opo, oshiwana osho osha li muKanaan, medu olo Kalunga a li a udanekela Abraham. Oule womafelemido, onghalamwenyo yOvaisrael otai dulu okuhokololwa nomautumbulilo ane: okweefa po, okuhepekwa, okwiilikana nokumangululwa.a
Okweefa po. Ovaisrael ova li va nwefwa mo kOvakanaan ndele tava “efa Omwene” nova li va hovela okulongela oikalunga, unene tuu, “Baal nooastarte.”b Okweefa po Kalunga kwOvaisrael kwa tya ngaho okwa li kwa etifa oushunimonima. Itashi kumwifa eshi Ovaisrael va li va “handukifa Omwene,” oo e va mangulula medu laEgipti. — Ovatokolipangeli 2:1, 11-13.
Okuhepekwa. Jehova okwa li e linyengifwa kehandu li li pauyuki ndele ta kufa po eameno laye povanhu ovo va li ve mu ekelashi. Okwa li a efela Ovaisrael “momake ovatondadi” vavo, ovo va li ve uya muIsrael ndele tave va nyeke edu lavo. — Ovelishe 14.
Okwiilikana. Molwaashi Ovaisrael ova li tava mono oixuna neenghono, ova li ve lipa oushima omolwonghedi yavo ii yokukalamwenyo nova li va ilikana kuKalunga e va kwafele. Omailikano avo otaa hololwa keendjovo odo kutya ‘ova li va kema omolwovafininiki vavo.’ (Ovelishe 18) Ova li hava ilikana kuKalunga lwoikando. (Ovatokolipangeli 3:9, 15; 4:3; 6:6, 7; 10:10) Mbela Kalunga okwa li e linyenga ngahelipi?
Okumangululwa. Jehova okwa li a uda okukema kwOvaisrael ndele te “lialuluka.” Oshitya shOshiheberi osho sha tolokwa ‘okulialuluka’ otashi dulu okutya “okulundulula omadiladilo ile elalakano loye.” Embo limwe lomauyelele ola ti: “Jehova okwa li e linyengifwa kokukema kwavo, ndele ta lundulula elalakano laye loku va handukila opo e va xupife.” Jehova okwa li e linyengifwa konghenda yaye a ‘pendule ovatokolipangeli,’ ovo va li tava ka mangulula oshiwana shaye momake ovatondi vasho. — Ovelishe 18, yelekanifa no-NW.
Mbela owa didilika kutya oshike sha li she linyengifa Kalunga e lialuluke ile a lundulule omadiladilo aye? Okwa li e lialuluka molwaashi oshiwana shaye osha li sha lundulula oikala yasho. Diladila kwaashi: Xe omunahole otashi dulika a handukile okaana oko ka ninga epuko, tashi dulika e ka kufe omaufembanghenda onhumba. Ndele ngeenge okwa mono kutya okaana oke livela ombedi shili, oha tokola ehe ka handukile vali.
Oshike hatu lihongo kombinga yaJehova mehokololo olo? Nonande okunyona owina ohaku handukifa Jehova, oha file onghenda ovanyoni ovo ve livela ombedi. Oshiwa okukaleka momadiladilo kutya oinima oyo hatu ningi otai dulu okukuma omaliudo aKalunga. Omolwashike ito lihongo okukala ho “hafifa omutima” waJehova? (Omayeletumbulo 27:11) Ito ke lipa oushima ngeenge owa ningi ngaho.
[Omashangelo opedu]
a Ovatokololipangeli 2:11-18 ova ngonga pauxupi kombinga yoikala yOvaisrael, noya ka hokololwa moule momatukulwa makwao a ka landula ko.
b Baal okwa li oshikalunga sha fimanekwa neenghono shOvakanaan, ofimbo Astarte a li oshikalungakainhu osho sha li sha talwa ko kutya osho omukulukadi waBaal.