Etumwalaka laJesus Kristus ole ku kuma ngahelipi?

“Ame nde uya, vo va kale nomwenyo nouyadi.” — JOHANNES 10:10.

JESUS KRISTUS okwe uyile kombada yedu nelalakano lokuyandja, ndele hakupewa. Jesus okwa pa ovanhu oshali i na ondilo neenghono okupitila moukalele waye, sha hala okutya, etumwalaka olo la holola oshili kombinga yaKalunga nosho yo ehalo laYe. Ovanhu ovo tava tambula ko etumwalaka olo otava dulu okukala nonghalamwenyo i li xwepo paife, nOvakriste vashili omamiliyona otava dulu okukoleka oushili oo.a Ndele oshinima sha fimanenena shetumwalaka olo Jesus a udifa osho oshali i na ondilo inene i dule adishe, omwenyo waye wanenena oo e tu yandjela. Onghalonawa yetu yaalushe oye likolelela kunghee hatu linyenge ketumwalaka olo la fimanenena.

Osho Kalunga naKristus va yandja Jesus okwa li e shii kutya ota ka dipawa efyo tali udifa omunhu omwenyo munyenye kovatondi vaye. (Mateus 20:17-19) Ndele nande ongaho, Jesus okwa popya eendjovo da shiivika nawa odo di li muJohannes 3:16, a ti: ‘Osho Kalunga a kala e hole ounyuni, Oye a yandja Omona waye Ewifa, opo keshe ou te mu itavele a ha kane, ndelenee a kale e nomwenyo waalushe.’ Okwa ti yo kutya okwe uya ‘okuyandja omwenyo waye u ninge oikulila yavahapu.’ (Mateus 20:28) Ndele mbela omolwashike Jesus a ti kutya omwenyo waye ote ke u yandja ponhele yokutya ote ke u kufwa?

Kalunga okwe linyengifwa kohole yaye inene a ninge po elongekido opo a mangulule ovanhu moufyuululwalunde nosho yo koilanduliko yao, sha hala okutya, kokuhawanenena nokefyo. Osho Kalunga okwe shi ninga eshi a li a tuma Omona waye ewifa kombada yedu opo a fye efyo lopayambo. Jesus okwa li a dulika nehalo liwa, eshi e tu yandjela omwenyo waye wopanhu wa wanenena. Efiloshisho lekulilo olo oshali inenenene oyo Kalunga apa ovanhu.b Oshali ya tya ngaho otai dulu oku ke tu pefa omwenyo waalushe.

Osho wa pumbwa okuninga po Mbela naave owa pewa oshali yekulilo pauhandimwe? Osho oshe likolelela kwoove mwene. Oku shi faneka: Natu tye nee ngeno umwe ote ku pe oshali i li mokapakete. Oshali ya tya ngaho ohai ningi ashike yoye ngeenge owa yelula omake oye, ndele to i tambula. Sha faafana, Jehova ote ku pe ekulilo, ndele oshali ya tya ngaho itai ningi po yoye paumwene okuninga to katuka eenghatu noku i tambula ko. Ndele mbela ongahelipi to dulu okuninga ngaho?

Jesus okwa ti kutya ovo tava ka pewa omwenyo waalushe ovovo ashike ve na ‘eitavelo muye.’ Eitavelo ola kwatela mo onghedi yoye yokukalamwenyo. (Jakob 2:26) Okukala u na eitavelo muJesus otashi ti kutya okukaleka onghalamwenyo yoye metwokumwe noinima oyo a honga naayo a ninga. Ndele opo u ninge ngaho, ou na okukala u shii nawa Jesus nosho yo Xe. Jesus okwa ti: “Nomwenyo waalushe owo tuu ou, vo ve ku shiive, Oove auke Kalunga kashili, naau we mu tuma, Jesus Kristus.” — Johannes 17:3.

Omido 2000 lwaapo da pita, Jesus Kristus okwa li a udifa etumwalaka olo la lundulula okukalamwenyo kwovanhu omamiliyona mounyuni aushe. Mbela ino hala okuuda shihapu kombinga yetumwalaka olo nonokutya ongahelipi ove nosho yo ovaholike voye tamu dulu okumona mo ouwa paife nosho yo fiyo alushe? Eendombwedi daJehova otadi ka kala da hafa oku ku kwafela.

[Omashangelo opedu]