Vamwe ovo va li nale va tila exulilo inave li tila vali
MO 1970 nasha, Gary naKaren ova li va tomhwa va itavele kutya exulilo lounyuni oli li popepi. Onghee hano, ova li va tembuka mo moshilando ndele tava i komikunda, nova li va tokola okulikongela keshe osho va li va pumbwa. Ova li va ninga ngaho molwaashi ova li va hala okuxupa.
Ova li ve lilandela omambo, hava i keetundi nosho yo koiputudilo yehongo, nova li hava popi novanhu vahapu opo va likole owino oo va li va pumbwa. Ova li va ninga oshikunino nova li va kuna omiti doiimati 50 odo hadi imi diva. Ova li va tuvikila eembuto noilongifo ihapu, nova li ve lihonga okukuna oimeno nokutuvikila oikulya. Kaume kavo umwe okwa li e va honga okutomha oinamwenyo nokutuvikila ombelela. Karen okwa li e lihonga omaludi oimeno nosho yo omidi doimeno yomoixwa odo hadi liwa opo va dule okukala ve na oikulya ngeenge oikulya yavo ya pwa po. Gary okwa li e lihonga okulonga omahooli okudja momapungu, okwa longa efiya loshitenda hali shakalwa noikuni nokwa tunga eumbo olo li na oipumbiwa aishe.
Karen okwa ti: “Molwaashi eenghalo oda li dii neenghono mounyuni pefimbo opo, onda li handi diladila kutya ounyuni otau ka xula po mafiku.” Gary okwa ti: “Ngaashi ashike ovanyasha vakwetu vamwe, naame onda li handi kendabala okuxulifa po oukwamuhoko, Oita yokoVietnam nosho yo oulingilingi. Ndele onda ka sholola diva. Onda li nda fika pexulifodiladilo kutya ovanhu otave ke lixulifa po vo vene ngeenge ova twikile okulihumbata monghedi ya tya ngaho.”
Gary okwa twikila ko a ti: “Efiku limwe konguloshi, onda li nda konga omhito ndi leshe Ombibeli okudja kuMateus fiyo okEhololo. Onda li nda lesha natango Ombibeli moutukulwa vanini meenguloshi nhee da ka landula ko. Ongula yefiku etitano okudja eshi nda kala handi lesha Ombibeli, onda li nda lombwela Karen nda ti: ‘Otu li momafiku axuuninwa. Mafiku Kalunga ota ka katuka onghatu opo a koshole ombada yedu. Otwa pumbwa okukonga ovanhu ovo tava ka xupifwa.’ ” Gary naKaren ova li va hovela okweenda nomalongelokalunga e lili noku lili, tava kongo ovanhu ovo va li va hala okuhangwa ve lilongekidila exulilo.
Diva konima yaasho, Ondombwedi yaJehova imwe oya li ye uya peumbo lavo nova hovela okukonakona Ombibeli. Karen ota dimbuluka osho sha li sha ningwa po, a ti: “Onda li nda hafa neenghono, molwaashi onda li shili nda yelifilwa nawa Omishangwa. Xuuninwa, onda li nda mona oshili kombinga yexulilo oyo nda kala handi kongo. Onda li nda kwafelwa shili ndi kale ndi na eteelelo li na sha nonakwiiwa. Ndele osho sha fimanenena oshosho kutya, onda li nda hovela okupanga oukaume naTate womeulu, Kalunga Omushiti weshito alishe.”
Gary okwa ti: “Onda li nda mona eityo lashili longhalamwenyo. Shimha nda hovele okukonakona Ombibeli, ihandi dimbuka. Onda li nda lesha omaxunganeko Ombibeli, onda li nda konakona omaumbangi oo taa ulike kutya omaxunganeko Ombibeli ooshili nonda li nda tomhwa ndi itavele kutya Kalunga ota ka katuka onghatu mafiku. Onda li nda mona kutya: ‘Ovanhu ove na okulilongekidila oku ka mona omwenyo oo Kalunga e tu halela, ndele haku lilongekidila oiponga.’ ” Paife Gary naKaren ove na etaleko liwa li na sha nonakwiiwa. Ponhele yokukala tave lipula kombinga yexulilo lounyuni, ove na elineekelo kutya Kalunga ota ka xulifa po omaupyakadi oo a kundukida ovanhu nota ka ninga edu oparadisa.
Mbela Gary naKaren ova kala tava ningi shike omido da konda po 25 da pita? Karen okwa ti: “Onda kala handi kulike ohole yange yokuhola Jehova nokupameka eitavelo lange, nohandi kendabala ndi kwafele vamwe va ninge sha faafana. Ohatu yakulafana nomushamane waye Gary mokukwafela oukwaneumbo wetu u kale wa pama nokulongela Kalunga tu li moukumwe. Otwa ninga eenghendabala tu unganeke nawa oinima monghalamwenyo yetu nokukala nonghalamwenyo yanafangwa opo tu dule okuyandja elitulemo kuvamwe nosho yo keemhumbwe davo.”
Gary okwa weda ko a ti: “Ohandi ilikana alushe Ouhamba waKalunga u uye nou etele ovanhu omamiliyona epepelelo. Oshikando keshe handi udifile vamwe onghundana iwa yOuhamba waKalunga, ohandi ilikana opo ndi dule okukwafela nande omunhu umwe a kale e na eteelelo metumwalaka lOmbibeli. Jehova okwa kala ta nyamukula pahole omailikano ange oule womido di dule po 25. Ame nomukulukadi wange Karen otwa itavela kutya mafiku Jehova ota ka eta omalunduluko manene kombada yedu, ashike inatu tila vali exulilo.” — Mateus 6:9, 10; 2 Petrus 3:11, 12.
[Efano pepandja 9]
Kunena, Gary naKaren otava kwafele vamwe nehafo va kale ve na eteelelo okupitila metumwalaka lOmbibeli