Otu na okwiilikana

3 Ngahelipi?

NGEENGE tashi uya peilikano, eenghulunghedi domalongelokalunga mahapu ohadi yandje elitulemo konghedi omo olutu lomunhu li na okukala eshi ta ilikana, keendjovo daye ile komifindalandu donhumba odo e na okulandula. Ndele Ombibeli otai tu kwafele tuha yandje elitulemo koinima oyo notu yandje ashike elitulemo koinima oyo ya fimanenena i na sha nepulo olo kutya, “Otu na okwiilikana ngahelipi?”

Ombibeli otai ulike kutya ovapiya vaKalunga ovadiinini ova li hava ilikanene peenhele da yoolokafana nonokutya omalutu avo okwa li haa kala meenghedi di lili noku lili. Ova li hava ilikana momutima ile tava popi mokule she likolelela keenghalo omo va li. Ova li hava ilikana va tala keulu ile va twa eengolo. Ponhele yokwiilikana tava longifa oihongwafano, olusaalia ile omambo omailikano, ova li hava ilikana noitya yavo vene tashi di komutima. Oshike sha li sha ningifa omailikano avo a kale taa ti sha?

Ngaashi sha popiwa moshitukulwa sha tetekela, ovapiya vaKalunga vonale ova li hava yukifa omailikano avo kuKalunga umwe aeke, Jehova. Ope na natango oshiteelelwa shimwe sha fimana shi na sha neilikano. Johannes wotete 5:14, okwa ti: ‘Hano elineekelo eli letu tu li na muye oleli: ngeenge hatu mu indile sha pahalo laye, ote tu udu.’ Omailikano etu oku na okukala metwokumwe nehalo laKalunga. Osho osha hala okutya shike?

Opo tu dule okwiilikana metwokumwe nehalo laKalunga, otwa pumbwa okushiiva kutya ehalo laye olilipi. Onghee hano, osha fimana okukala hatu konakona Ombibeli opo omailikano etu a kale metwokumwe nehalo laye. Ndele mbela osho osha hala okutya Kalunga ita ka pwilikina omailikano etu ngeenge katu fi ovahongwanhu vOmbibeli? Ahowe! Ndele Kalunga okwa hala tu shiive notu ude ko kutya ehalo laye olilipi nokukatuka metwokumwe nalo. (Mateus 7:21-23) Otwa pumbwa okwiilikana metwokumwe naasho hatu lihongo.

Eshi hatu lihongo kombinga yaJehova nosho yo ehalo laye, eitavelo letu olo li li oshiteelelwa shimwe vali sha fimanenena sheilikano, otali ka kala la kola. Jesus okwa ti: ‘Keshe eshi tamu shi indile meilikano nokwiitavela, otamu shi pewa.’ (Mateus 21:22) Okukala neitavelo itashi ti kutya okukala tu na omaitavelela, ndele ponhele yaasho, okukala wa itavela oshinima shonhumba nokuli nonande kashi wetike, ashike ope na oumbangi wa kola oo tau shi koleke. (Ovaheberi 11:1) Ombibeli oi na oumbangi muhapu oo tau ulike kutya Jehova oko e li shili noku shii okulineekelwa nonande iha monika, nokwa halelela okunyamukula omailikano aavo tave mu ilikana ve na eitavelo. Natango, ohatu dulu okwiindila Jehova e tu pe eitavelo la kola, nokwa halelela oku tu pa osho twa pumbwa. — Lukas 17:5; Jakob 1:17.

Ope na natango oshiteelelwa shimwe sha fimana neenghono shi na sha nanghee tu na okwiilikana. Jesus okwa ti: “Kape na ou te uya kuTate, ngenge hamuame ta pitile.” (Johannes 14:6) Onghee hano, itatu dulu okupopya naTate yetu, Jehova, okuninga hatu pitile muJesus. Nomolwaasho, Jesus okwa lombwela ovashikuli vaye va kale hava ilikana okupitila medina laye. (Johannes 14:13; 15:16) Ashike osho inashi hala okutya otu na okwiilikana kuJesus. Ponhele yaasho, otu na okwiilikana medina laJesus, hatu dimbuluka kutya Jesus oye e shi ninga tashi shiiva opo tu dule okukala hatu popi naTate yetu omuyapuki a wanenena.

Pomhito imwe, ovashikuli vaJesus ovo va li ookaume kaye vopofingo ova li ve mu pula tava ti: “Omwene, tu longa okwiilikana.” (Lukas 11:1) Osha yela kutya kava li tava pula va hongwe oinima oyo twa dja nokukundafana, ndele ova li va halelela okushiiva kutya ove na okwiilikana kombinga yashike.

[Eendjovo dididilikwedi pepandja 6]

Opo omailikano etu a kale taa ti sha, otu na okwiilikana metwokumwe nehalo laKalunga, medina laJesus notu na eitavelo