Oshinima shotete

Kala u hole ovanhu, ndele haimaliwa nomaliko

OMBIBELI OTAI HONGO SHIKE? “Olwisho loimaliwa olo efina lowii aushe.” — 1 Timoteus 6:10.

MBELA ESHONGO LILIPI WA TAALELA? Ovashiivifi voipindi ohave tu ningifa tu kale tu udite kutya oinima oyo tu na nale inai wana. Ova hala tu longe efimbo lihapu opo tu likole oimaliwa tu dule okulanda oinima oyo opo ya kondo, ixwepo naayo inene. Ohatu dulu okukwatwa noupu kohole yokuhola oimaliwa nokukala twe i lenga neenghono. Ndele Ombibeli otai londwele kutya ovanhu ovo ve hole omaliko itava ka wanenwa nandenande. Ohamba Salomo oya ti: ‘Ou e hole oimaliwa ita wanenwa koimaliwa, ndele ou e hole oupuna, ita wanenwa keliko.’ — Omuudifi 5:9.

MBELA OSHIKE TO DULU OKUNINGA PO? Hopaenena Jesus mokukala u hole ovanhu shi dulife omaliko. Jesus okwa li e lilongekida nehalo liwa okuyamba po ashishe osho a li e na, nokuli nomwenyo waye omolwohole yaye yokuhola ovanhu. (Johannes 15:13) Okwa ti: “Okuyandja oku nelao komesho yokutambula.” (Oilonga 20:35) Ngeenge otwa kala tu na onghedindjikilile yokulongifa efimbo letu noiniwe yetu mokukwafela vamwe, navo otave ke tu ningila sha faafana. Jesus okwa ti: “Yandjeni, nanye yo otamu ka pewa.” (Lukas 6:38) Ovanhu ovo hava lalakanene oimaliwa nosho yo omaliko ohave lityuula nomaudjuu mahapu. (1 Timoteus 6:9, 10) Mepingafano naasho, ewaneno lashili ohali di mokukala u hole vamwe nosho yo ngeenge u holike.

Omolwashike ito likonakona u tale ngeenge oto dulu okukaleka onghalamwenyo yoye paunafangwa? Mbela ito dulu okuninipika oiniwe yoye ei u na nale ile oinima oyo wa hala okulanda? Ngeenge owa ningi ngaho, oto ka mona kutya ou na efimbo la wedwa po nosho yo eenghono dokulonga oinima oyo ya fimana monghalamwenyo, sha hala okutya, okukwafela vamwe nokulongela Kalunga oo e ku pa ashishe osho u na. — Mateus 6:24; Oilonga 17:28.

[Efano pepandja 4]

“Yandjeni, nanye yo otamu ka pewa”