Ehena popepi naKalunga
“Ove ho djuulukwa oshilonga shomake oye”
OHASHI yahameke pamaliudo okutala omuholike woye ta mono oixuna nokufya. Nomolwaasho ohatu kala twa nyika oluhodi ngeenge twa filwa umwe. Ndele otashi hekeleke okushiiva kutya Omushiti wetu, Jehova Kalunga, oku tu uditile oukwao wananghali. Kakele kaasho, okwa hala okulongifa eenghono daye dinene okwaalulila oonakufya momwenyo. Natu didilike eendjovo deteelelo odo tadi hangwa muJob 14:13-15.
Natu ka taleni kutya Job okwa li monghalo ya tya ngahelipi. Job, omulumenhu weitavelo la tongomana, okwa li a pita momaupyakadi a kitakana oo a li a kwatela mo okukanifa oiniwe yaye, efyo lovana vaye aveshe ovaholike nosho yo ouyahame wa kwata moiti. Okwa li a ilikana Kalunga moluhodi linene a ti: “Akutu, ngeno u holeke nge moshovafi [onhele yopafaneko omo hamu i ovafi].” (Ovelishe 13) Job okwa li e wete shi li xwepo okuya moshovafi. Kungaho, okwa li ta ka kala a pepelelwa komaudjuu nokouyahame, onga emona la holekwa kuKalunga.a
Mbela Job ota ka kala moshovafi fiyo alushe? Job hasho kwa li a itavela ngaho. Okwa li a twikila neilikano laye a ti: ‘Akutu, pangelele nge efimbo opo nee u dimbulukwe nge vali.’ Job okwa li e na elineekelo kutya ita ka kala moshovafi fiyo alushe nonokutya Jehova ite ke mu dimbwa. Okwa faafanifa efimbo olo ta ka kala moshovafi ‘nomafiku aeshe oukwaita,’ sha hala okutya, efimbo la tulwa po lokuteelela. Mbela efimbo li fike peni? Okwa ti: “Fiyo olufo lange lokumangululwa la fika.” (Ovelishe 14) Osho otashi ulike kemanguluko lokumangululwa moshovafi, sha hala okutya, okunyumuka koufi.
Omolwashike Job a li a tomhwa kutya ota ka mangululwa? Omolwaashi okwa li e shii nghee Omushiti wetu omunahole e uditile ovalongeli vaYe ovadiinini ovo va fya. Job okwa ti: “Ove ngeno u ifane, ame nohandi ku nyamukula, Ove ho djuulukwa oshilonga shomake oye.” (Ovelishe 15) Job okwa dimina kutya ye oku li oshilonga shomake aKalunga. Omuyandjimwenyo nOmushiti waJob oo e mu shitila moshidalelo shaina ota dulu shili oku mu alulila momwenyo. — Job 10:8, 9; 31:15.
Eendjovo daJob otadi tu hongo kutya Jehova omunahole: Oha kala e na ekwatafano le likalekelwa naavo ve li ngaashi Job, ovo have liyandje momake aye nohave liefa e va me noku va vyula va ninge ovanhu va hokiwa kuye. (Jesaja 64:8) Jehova okwa lenga ovalongeli vaye ovadiinini. Okwa “djuulukwa” ovadiinini vaye ovo va fya. Omuhongwanhu umwe okwa ti kutya oshitya shOshiheberi osho sha tolokwa “djuulukwa” “nopehe na omalimbililo, oshimwe shomoitya oyo i na eenghono, oyo tai ulike komaliudo omoule e na sha nokudjuulukwa neenghono oshinima shonhumba.” Jehova iha dimbuluka ashike ovalongeli vaye ndele okwa hala yo oku va alulila momwenyo.
Embo laJob olimwe lomomambo Ombibeli oo a shangwa tete, omo Jehova a holola elalakano laye loku ka nyumuna oonakufya.b Jehova okwa hala oku ke ku hanganifa novaholike voye ovo va fya. Osho otashi ku kwafele u lididimikile noupu oluhodi. Omolwashike ito lihongo shihapu kombinga yaKalunga omunahole nosho yo nghee to dulu okuliefa u mewe kuye opo u kale wa wana oku ka kala po eshi elalakano laye tali ka wanifwa?
Elesho Lombibeli Muaprili:
[Omashangelo opedu]
a Embo limwe lomauyelele ola ti kutya eendjovo daJob odo kutya “holeke nge” otadi dulu okutya “tule [nge] ponhele ya amenwa onga oshinima shi na ondilo.” Odjo imwe vali oya ti kutya eendjovo odo otadi yandje ediladilo olo kutya “holeke nge onga emona.”
b Opo u lihonge shihapu kombinga yeudaneko lOmbibeli li na sha nokunyumukila mounyuni mupe wouyuki, tala etukulwa 7 lembo Ombibeli otai hongo lela shike? la nyanyangidwa kEendombwedi daJehova.