“Onda li nda mona osho nda li nda halelela”
Emilia okwa li omukokolindjila wondjikilile omido omulongo nanhano da pita. Ndele lwanima okwa li a efa po oukokolindjila. Efimbo opo la di ko, okwa kala ha diladila shi na sha nehafo olo a li e na eshi a li omukokolindjila nokwa li vali a hala okutamununa mo oukalele waye.
Oilonga yaEmilia ohai pula efimbo laye lihapu naasho ohashi mu imbi a kale a hafa. Efiku limwe okwa li a kema povanailonga vakwao ta ti: “Ngeno onda li ngoo handi dulu okulonga eevili dinini!” Omuhona waye okwa li eshi uda ndele te mu pula ngeenge oshili ngoo. Emilia okwa li e mu lombwela kutya osho naanaa. Ndele opo osho shi dule okuningwa, okwa li a pumbwa okupewa epitikilo komuhona omukulunhu woilonga molwaashi omilandu dofeema otadi ufa ovanailonga aveshe va wanife po keshe osho tava pulwa. Omumwameme oo okwa li e lilongekida oku ka popya nomukulunhu woilonga; a li a ilikana opo a kale e na ombili nomukumo.
Pefimbo leenghundafana, Emilia okwa li a pula nelungi nonouladi opo a kale ha longo eevili dinini. Okwa li a yelifa kutya oha longifa efimbo laye olo ehe li koilonga mokukwafela vamwe, a ti: “Ame ondi li umwe womEendombwedi daJehova nohandi kwafele ovanhu pamhepo. Kunena, elihumbato lopaenghedi lovanhu vahapu ola xutuka. Ova pumbwa omafinamhango nosho yo omifikamhango da yela, nounongo oo handi va hongo okudja mOmbibeli ou na oshilonga kuvo. Inandi hala omalipyakidilo ange okonima yoilonga a kume oilonga yange omu, ashike onda hala okukala ndi na efimbo lihapu lokukwafela ovanhu. Nomolwaasho onda hala ndi kale handi longo eevili dinini.”
Omukulunhu woilonga okwa li a pwilikina nawa ndele ta ti naye oha diladila okulonga oilonga yokukwafela ovanhu. Okwa weda ko ta ti: “Omolwetomheno olo ondi wete kutya ondi na okutwa kumwe neindilo loye. Ndele owa didilika ngoo kutya oto ka kala ho kwata oimaliwa inini?” Emilia okwa ti oku shi shii nota ka nangwafapaleka onghalamwenyo yaye ngeenge osha pumbiwa. Okwa weda ko a ti: “Elalakano lange la fimanenena olo okukwafela ovanhu.” Omukulunhu woilonga okwa li e mu lombwela a ti: “Ondi hole neenghono ovanhu ovo hava longifa efimbo lavo okukwafela vamwe nopehe na okuliholamwene.”
Mofeema oyo inamu kala nande onale omunhu a pewa epitikilo la tya ngaho. Paife Emilia okwa pitikwa a longe ashike omafiku ane moshivike. Ondjabi yaye oya li ya wedelwa ndele ta kala ha kwata shi fike pwaashi a li ha kwata nale, naasho osha li she mu kumwifa. Okwa ti: “Onda li nda mona osho nda li nda halelela, molwaashi ohandi dulu vali okukokola ondjila.”
Mbela owa diladila ngoo nale okuninga omalunduluko opo u tameke ile u shune moilonga youkokolindjila?
[Ouyelele u li pepandja 32]
Omukulunhu woilonga okwe mu lombwela a ti: “Ondi hole neenghono ovanhu ovo hava longifa efimbo lavo okukwafela vamwe nopehe na okuliholamwene”