Konakona Eendjovo daKalunga

Oshike tashi ka ningwa po mEfiku lEtokolo?

Oshitukulwa eshi osha kundafana omapulo oo tashi dulika ho lipula kombinga yao, nosha ulika opo to dulu okulesha omanyamukulo mOmbibeli yoye. Eendombwedi daJehova otadi ka kala da hafa okukundafana naave omanyamukulo oo.

1. Efiku lEtokolo oshike?

Ngaashi sha ulikwa mefano olo li li kolulyo, ovanhu vahapu ohava diladila kutya mEfiku lEtokolo ovanhu omabiliyona otava ka kala ofika komesho yolukalwapangelo laKalunga opo va tokolwe she likolelela koilonga oyo va longa; vamwe vati otava ka pewa ondjabi yoku ka kala nomwenyo meulu, ofimbo vamwe tava ka hepekwa moheli. Ndele Ombibeli otai ulike kutya elalakano lEfiku lEtokolo olo okumangulula ovanhu meenghalo dokuhenouyuki. (Epsalme 96:13) Kalunga okwa nangeka po Jesus a kale Omutokoli, oo ta ka etifa ouyuki kombada yedu.— Lesha Jesaja 11:1-5; Oilonga 17:31.

2. Efiku lEtokolo otali ka etifa ngahelipi ouyuki?

Eshi omunhu wotete Adam a li a tukululila Kalunga oshibofa owina, okwa twala oludalo laye alishe moulunde, mokumona oixuna nosho yo mefyo. (Ovaroma 5:12) Opo okuhenouyuki kwa tya ngaho ku yukifwe, Jesus ota ka nyumuna ovanhu omabiliyona ovo va fya. Embo lEhololo otali ulike kutya osho otashi ka ningwa momukokomoko womido eyovi dokupangela kwaKristus Jesus.— Lesha Ehololo 20:4, 11, 12.

Ovanyumunwa otava ka tokolwa she likolelela kwaasho tava ka ninga ngeenge va lesha oshikalimo ‘shomambo’ oo a tumbulwa mEhololo etukulwa 20, ndele hakwaasho va ninga fimbo va li momwenyo. (Ovaroma 6:7) Omuyapostoli Paulus okwa ti kutya mokati kaavo tava ka nyumunwa noku ka mona omhito yokulihonga kombinga yaKalunga otamu ka kala ‘ovayuki novalunde.’— Lesha Oilonga 24:15.

3. Efiku lEtokolo otali ka etifa shike?

Ovo va fya fimbo inava shiiva Jehova Kalunga noku mu longela otava ka mona omhito yokuninga omalunduluko nokulonga ouwa. Ngeenge ova ningi ngaho, osha hala kutya ova ‘nyumukila omwenyo.’ Ndele ovanyumunwa vamwe itava ka kala va hala okulihonga eemhango daJehova, nomolwaasho otava ka ‘nyumukila etokolo.’— Lesha Johannes 5:28, 29; Jesaja 26:10; 65:20.

Pexulilo lomido eyovi dEfiku lEtokolo, Jehova ota ka alulila ovanhu ovo hava dulika mewaneneno. (1 Ovakorinto 15:24-28) Olo kali fi tuu etimaumbwile likumwifi kwaaveshe ovo hava dulika! Meyeleko laxuuninwa, Kalunga ota ka mangulula Satana Ondiaboli mombwili, omo ta ka kala a idililwa oule womido eyovi. Satana ota ka kendabala vali okwaamuna ko ovanhu kuJehova, ndele ovo tava ka dulika kuJehova otava ka kala nomwenyo fiyo alushe kombada yedu.— Lesha Jesaja 25:8; Ehololo 20:7-9.

4. Efiku letokolo limwe lilipi vali tali ka etela ovanhu ouwa?

Ombibeli oya longifa yo outumbulilo ‘efiku letokolo’ tai ulike koshiningwanima osho tashi ka hanauna po onghalelo ei yoinima. Efiku letokolo olo otali ke uya ombadilila ngaashi Eyelu lopefimbo laNoa, olo la hanauna po ovakolokoshi aveshe vopefimbo opo. Lao linene, ngeenge ‘ovahenakalunga’ va hanaunwa po, kombada yedu otaku ka kala oulikumwe wovanhu mupe notaku “ka kala ouyuki.”— Lesha 2 Petrus 3:6, 7, 13.

Opo u mone ouyelele muhapu, tala epandja 213-215 olo la ulikwa opo Ombibeli otai hongo lela shike?, la nyanyangidwa kEendombwedi daJehova.

[Efano pepandja 16]

“The Last Judgement,” by Gustave Doré, 1832-1883

[[Odjo yefano]]

Engravings by Doré